Римвийриз 11
11
Аллагьди Вичин халкь инкар тавун
1Гьавиляй за хабар кьазва: Аллагьди Вичин халкь инкарнани кьван? Гьелбетда, ваъ! Зун жув исраилви, Бунъяминан тайифадай тир Ибрагьиман эвлед я эхир. 2Аллагьди лап фадлай хкягъай Вичин халкь инкарнач.
ГьикӀ лагьайтӀа Ильяса, Каламдай мисалар гъиз, Аллагьдин вилик гьикӀ Исраилдик тахсирар кутунатӀа квез чизва: 3«Ребби, Ви пайгъамбарарни яна кьена, Ви къурбанганар чукӀурна. Тек са зун амукьна, ва абур зун кьин патал алахънава»#3-Пачагьар 19:10, 14..
4Амма Аллагьди адаз вуч жаваб гана? «За Жуваз Багьалан#11:4 Багьал – Исраилвияр къведалди Фелистинда уьмуьр тухвай къенанвийри къадим вахтара вичиз икрам ийиз хьайи аллагьрикай сад. Уьлкведа амукьай чкадин агьалийрин таъсирдик кваз исраилвийрини мукьвал-мукьвал Багьалаз икрам ийиз жедай. Абуру икӀ ийидайла, им халкьди Аллагьдин аксина ийизвай лап чӀехи тахсиркарвал яз гьисабдай. вилик метӀер чилиз ягъ тавур ирид агъзур кас хвена!»#3-Пачагьар 19:18. 5Аллагьдин берекатдив кьурвал хкянавайбур са кьадар исятдани ава. 6Берекатдив кьурвал хкянавайбур ятӀа, абур крариз килигна хкянавайбур туш, тахьайтӀа берекатдикай берекат жедачир.
7АкӀ ятӀа, вуч хьана бес? Исраилди куьхъди гьерекат авунатӀа, адаз гьам гьатнач, анжах хкягъайбуруз гьатна, амайбур, лагьайтӀа, терс хьана. 8Кхьенвайвал хьана:
«Гьисс тийирбур авуна абурукай Аллагьди,
абуруз такун патал, Ада абурун вилер агална,
абуруз ван татун патал, япар агална
та къенин йикъал къведалди» #
Киххьей Къанун 29:4; Яшай 29:10. .
9 Давуда лугьузва:
«Къуй абурун суфрадикай абуруз кемен ва желе хьурай,
кӀвач галкӀидай къван хьурай, кьисас хьурай.
10 Абуруз такун патал, вилер буьркьуь хьурай,
абурун кӀулар какур хьурай» #
Забур 68:23-24. .
Маса халкьар хилас авун
11Гьа икӀ за хабар кьазва: Эбеди яз агъуз хьун патал, чувудар татаб хьана жеди? Гьелбетда, ваъ! Амма абур чпин тахсирда агъуз аватуни маса халкьариз исраилвийрик чпикни гъайра#11:11 Гъайра – гзаф рикӀ гваз хьун. гзафардай хиласвал гъана. 12Абур агъуз аватуни дуьньядиз девлет гъанатӀа ва абуруз хьайи зиянри муькуьбуруз девлет гъанатӀа, абур имандал атуни гьихьтин чӀехи девлет гъида!
13За квез лугьузва, чувудар туширбур. Куь илчи яз, за зи къуллугъдиз чӀехи къимет гузва. 14За са гьикӀ ятӀани абурун гъайра туьнт ийида ва идалди зи халкьдикай са бязибур хьайитӀани хилас ийида лагьана умудзава. 15ГьикӀ лагьайтӀа, Аллагьди инкар авуни дуьньядиз туькӀуьн хъувун гъанатӀа, Ада абур мад гъилера кьабулуникай вуч жеда, им кьейидалай кьулухъ чан хтай хьтин кар жедачни? 16Тинидин са пай Аллагьдиз талукьарнавайди ятӀа, вири тини Гьадаз талукьарнавайди я; дувул Аллагьдиз талукьарнаватӀа, хилерни Гьадаз талукьарнавайди я.
17Къени зейтундин кьилди хилер ханваз, вун, чӀуру зейтун, абурун чкадал кӀалам яз илигнаватӀа ва вуна зейтун тарцин мижедикай хъвазватӀа, 18вун абурулай хъсан я лугьуз дамахармир. Вуна вун вине кьазватӀа, дувул вуна ваъ, дувулди вун кьазвайдакай фикир ая. 19Белки, вуна лугьуда: «Хилер, зун кӀалам яз илигун патал, хайиди я». 20Эхь. Абур чпихъ иман авачирвилиз килигна хайиди я, амма вун иман себеб яз кӀевиз акъвазнава. Гьавиляй дамах къачумир, амма кичӀе хьухь. 21ГьикӀ лагьайтӀа Аллагьди тӀебии хилериз инсаф авуначтӀа, Ада вазни инсаф ийидач.
22Аллагьдин дугъривиликай ва кӀевивал авуникай фикир ая: къакъатайбурухъ галаз кӀевивал авуникай ва вахъ галаз дугъри хьуникай, вични ахьтин шартӀуналди хьи, вуна Адан дугъривилик умуд кутазвай кьван гагьда уьмуьр тухун давамарзава, тахьайтӀа вунни атӀуда. 23Чувудар иман гвачиз амукь тавуртӀа, абур мадни кӀалам яз илигда, вучиз лагьайтӀа Аллагьдихъ абур мад илигдай къуват ава. 24Вун тӀебиатда чӀуру зейтун тарцелай атӀанатӀа ва тӀебиатдиз акси яз къени тарцел кӀалам яз илигнаватӀа, генани хъсандиз тӀебии хилери чпиз мукьва тарцел чка кьада!
Исраилдиз жедай хиласвал
25Стхаяр-вахар, куьне куьн квез авайдалай артух акьул авайбур яз гьисаб тавун патал, заз куьн ихьтин сирдикай са хабарни авачиз таз кӀанзавач: муькуь халкьарикай тирбур вири тамамдиз Аллагьдин рекьел къведалди, Исраилда авайбурун са кьадар терс жеда. 26И саягъда, кхьенвайвал, вири Исраил хилас жеда:
«Сигьандилай Хиласдайди къведа.
Якьубан эвледривай чалкечирвал Ада яргъа ийида.
27 Абурухъ галаз им я Зи Икьрар
абурулай гунагьар алудай чӀавуз» #
Яшай 27:9; 59:20; Ермиягь 31:33. .
28 Шад Хабардикай рахун хьайитӀа, и Хабар квев агакьун патал, абурукай куь хатурдай душманар хьана, амма хкягъуникай рахайтӀа, абур Аллагьдиз бан-бубайрин хатурдай кӀан я. 29Аллагьдин паяр Ада Вичи къуватдай вегьин тийидайбур я, ва Ада Вичи эвер гайибур гадарзавач. 30Куьн виликдай Аллагьдиз муьтӀуьгъбур тушир, амма гила абур муьтӀуьгъ тахьуниз килигна Аллагьди квез регьим авуна. 31Гила исраилвиярни гьа саягъда муьтӀуьгъ тахьана ава, ва гьа икӀ абурузни регьим авун патал Аллагьди квез регьим авунва. 32Аллагьди, вири халкьариз регьим авун патал, абур, садни хкуд тавуна, муьтӀуьгъ тежервилин рекьяй тухвана.
Чун аламатдин рекьерай тухузвай Аллагьдиз шукур
33 Аллагьдин девлетдин, камалдин ва чирвилин деринвал вуч я!
Кьиле гьакь тийирбур я Адан къарарар,
чириз тежербур я Адан рекьер!
34 «Ни кьатӀана Реббидин акьул
ва я вуж я Адаз меслятар гузвайди?» #
Яшай 40:13.
35 «Ни Адав са чӀавуз бурж вугана,
адав Ада бурж вахгана кӀандайвал?» #
Аюб 41:3.
36 Вири крар Гьадалай, Гьадалди,
Гьам паталди я.
Шукур хьурай Адаз даим! Амин.
Избрани в момента:
Римвийриз 11: ЛезПК
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© Институт перевода Библии, 2010-2024