Римвийриз 12
12
Аллагьди кьабулдай уьмуьр
1Гьавиляй за квез Аллагьдин регьимдин хатурдай тагькимзава, стхаяр-вахар, куь беденар чан алай, пак ва Аллагьдиз кӀани савкьватар яз гъваш. Гьа им куьн патал кутугай, куьне Адаз ийизвай къуллугъ жеда. 2И дуьньядин уьмуьрдин къайдадихъ галаз кьамир, амма дегиш хьухь, квевай Аллагьдин къаст, яни хъсанвал, менфятвал ва тамамвал, кьатӀуз хьун патал, куь акьул цӀийи хъия.
3Заз ганвай берекатдив кьурвал за квекай гьар садаз лугьузва: куьне куьн са акьван артух яз кьамир, кьил кьилеллаз, Аллагьди гьар садаз ганвай имандин уьлчмедалди куьне квекай веревирд ая. 4Гьар садахъ са беден ва адахъ гзаф паяр авайвал, амма а паяриз гьардаз вичин везифа авайвал, 5Месигьдиз талукь чакайни са беден жезва, ва чун вири сад садаз талукь я. 6Чаз ганвай берекатдив кьурвал чав жуьреба-жуьре паяр агакьнава. Са нихъ ятӀани пайгъамбарвал авунин пай аватӀа, къуй ада вичиз ганвай имандив кьурвал пайгъамбарвал авурай; 7им масадбуруз къуллугъ авунин пай ятӀа, къуй къуллугърай; им муаллимвал авунин пай ятӀа, къуй чирвилер гурай; 8им кӀубанар ва тагьким авунин пай ятӀа, къуй гьакӀ авурай; им муьгьтежбуруз куьмек гунин пай ятӀа, къуй жумартдаказ гурай; им гьакимвал ийиз алакьунин пай ятӀа, къуй гьакъисагъвилелди#12:8 Гьакъисагъвилелди – лап рикӀивай. гьакимвал авурай; им мергьамет гваз хьунин пай ятӀа, къуй а алакьун шадвилелди къалуррай.
9Къуй куь муьгьуьббат рикӀин сидкьидай хьурай. Писвал такӀан хьухь ва хъсанвал яхъ. 10Садаз сад стхаяр-вахар хьиз рикӀелди кӀан хьухь. Сада сад жувалай вине яхъ. 11Къуй куь гьакъисагъвал#12:11 Гьакъисагъвал – гьахъ-намус хьунухь. зайиф тахьурай, Реббидин Руьгьди квекай цӀай квайбур авурай, Реббидиз къуллугъ ая. 12Умудда шад хьухь, азабра сабур хуьх, дуьада дегиш тахьана амукь. 13Аллагьдиз талукь ксариз, абур муьгьтежвиле авайла, куьмек це, мугьманар кӀан хьухь.
14Куь геле къекъвезвайбуруз нуьсрет це – абуруз хийир-дуьа ая, лянет гумир. 15Шадвалзавайбурухъ галаз шадвал ая, шехьзавайбурухъ галаз шехьа. 16Сад садахъ галаз меслятвиле аваз уьмуьр твах. Лавгъа жемир, виниз тушир дережадин инсанрихъ галазни рафтарвал ийиз хьухь. Куьне куьн са акьван артух яз кьамир. 17Садазни писвиляй писвал ийимир, виридаз анжах хъсанвал ая. 18Виридахъ галаз квелай алакьзавай кьван ислягьвилелди уьмуьр твах. 19Зи дустар, куьне куь паталай кьисас къачумир, Аллагьдин хъел патал чка тур, гьикӀ лагьайтӀа Реббиди Каламда лугьузва: «Кьисас Зи Гъиле тур, За эвез гуда»#Киххьей Къанун 32:35.. 20Аксина:
«Ви душмандиз гишин ятӀа, фу це адаз,
хъваз кӀанзаватӀа, яд це адаз.
ИкӀ авуналди, вуна адан кьилел жуьгьенар
кӀватӀда» #
Келимаяр 25:21-22. .
21Жувал писвилив гъалиб жез тамир, амма хъсанвиливди писвилел гъалибвал къачу.
Избрани в момента:
Римвийриз 12: ЛезПК
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© Институт перевода Библии, 2010-2024