У пошуках супакоюУзор

Супакой, які дае Бог

Калі ты стала вывучаеш Біблію, дык ты, напэўна, заўважыў, што Бог часта выказвае Сваю пэрспэктыву праз параўнаньні ды кантраст. Напрыклад, Ён часта супрацьстаўляе багатых ды бедных, мудрых ды неразумных, цемру ды сьвятло, і - што тычыцца нашае тэмы - супакой, які прапануе Бог, супрацьстаўляецца супакою, што прапануе сьвет. Ісус сказаў:  Супакой пакідаю вам, супакой Мой даю вам, ня так, як сьвет дае, Я даю вам…” (Яна 14:27).

Думаю, зразумела, што Госпад гэтым выказаў, што супакой, які Ён дае сваім пасьлядоўнікам, адрозьніваецца ад супакою, які яны могуць знайсьці ў гэтым сьвеце. Кажучы пра “сьвет”, Ісус меў на ўвазе грамадзтва ды культуру, у якіх мы, людзі, жывем.

Ці ты калі-небудзь трапляў у марскую буру? Я дык трапляў некалькі разоў, і, шчыра кажучы, мне не хацелася б перажыць тое зноў! Вось як выглядае марская бура: вецер дзьме з хуткасьцю 65, 95, 160 кілямэтраў за гадзіну, ліе дождж, жыхаюць маланкі, грыміць гром, навокал бяздонная цемра, хвалі вышынёй да 15 мэтраў. Карабель у гэтакім шторме шугае нібыта цацачны човен, і яму вельмі лёгка згубіцца. Але пад паверхняю вады, усяго толькі 30 мэтраў ніжэй, буры няма. Усё цалкам спакойна. Ані гуку. Ані крыку. Ніякіх прыкметаў вэрхалу.

Гэты незвычайны факт прымушае мяне задумацца над Божым супакоем. Ён дапамагае мне лепей зразумець, што наш Госпад меў на ўвазе, калі Ён паабяцаў Сваім вучням Свой супакой. Ён сказаў Ім, што праз тое, што яны Ягоныя пасьлядоўнікі, яны меліся зазнаць скруху ў гэтым сьвеце. Ён нават сказаў, што некаторых зь іх будуць перасьледаваць. Але нягледзячы на тое, Ён паабяцаў, што Ён ніколі не пакіне Сваіх пасьлядоўнікаў, і што яны зазнаюць Ягоны супакой празь Ягоную сталую прысутнасьць зь імі.

Калі страх, трывога ды праблемы прыходзяць у тваё жыцьцё, шукай прыкметаў Божага супакою, які…

-Вышэйшы за ўсякія абставіны. Супакой часта адчуваецца найлепш сярод выпрабаваньняў ды турботаў. Нягледзячы на тое, што ты цяперака перажываеш, ведай наступнае: Бог - гэта твой супакой. Давярай Яму.

-Вышэйшы за ўсякі розум. Мы не заўсёды здолеем разумець Божы супакой. Але Ён дзейны й даступны для нас - нават калі мы ня здолеем зразумець яго.

-Даступны ўсім Ягоным пасьлядоўнікам. Бог прапануе супакой кожнаму чалавеку, які прымае Ісуса Хрыста за свайго Збаўцу, адмаўляецца ад грэху ды жыве паводле накірунку, які дае Божае Слова й Сьвяты Дух.

-Зьяўляецца нязьменным станам душы. У цяжкіх жыцьцёвых абставінах Сьвяты Дух прысутнічае, каб дапамагчы. Супакой - глыбокі, сапраўдны, дадзены Богам - можа быць тваёю штодзённаю “нормаю”.

Вандруючы па жыцьці, давярай і вер, што Бог хоча, каб ты адчуваў нязьменны супакой ва ўсякіх абставінах - супакой, які ўлучае ў сабе радасьць ды адчуваньне мэты ў кожнай сфэры твайго жыцьця.