У пошуках супакоюУзор

Пяць перакананьняў, неабходных дзеля супакою ў сэрцы


Калі ты зьяўляесься пасьлядоўнікам Хрыста, дык тваім жыцьцём кіруе толькі Бог. Ён - твая ўпэўненасьць. І ад пачатку сьвету, Ён ні на частачку сэкунды ня страчваў улады над Сваім стварэньнем. Ягоныя сіла ды магутнасьць ня сталі слабейшымі. Сёньня Ён гэтакі ж усеўладны, усёведны, усюдыісны й поўны любові, як і на пачатку чалавечае гісторыі.

Хоць мы й не заўсёды можам разумець Ягоныя намеры, разуменьне Божых шляхоў вядзе да ўсьведамленьня таго, што Ягоныя дзеі прыносяць Ягоным дзецям вечныя дабраславеньні. Зь цягам часу я адкрыў для сябе пяць перакананьняў, неабходных дзеля таго, каб мець супакой у сэрцы. Запрашаю цябе ўважліва, пільна паглядзець на твае перакананьні наконт Бога. Твой супакой вызначаецца ступеньню ўкараненьня гэтых ісьцінаў у тваю душу.

Перакананьне 1: Бог цалкам сувэрэнны.

Усьведамляць і прымаць праўду аб тым, што Бог мае найвышэйшую ўладу над усім, зьяўляецца істотным для твайго ўнутранага супакою. Тое азначае, што нічога з таго, што датычыцца цябе, не хаваецца ад Ягонага ўсёбачнага вока ды ласкавае апекі. (Каласянаў 1:17)

Перакананьне 2: Бог забясьпечвае цябе.

Ад першае да апошняе старонкі, Біблія ясна паведамляе нам, што Бог задавальняе ўсе твае патрэбы. Няма патрэбы, якая была б занадта вялікай, складанай або цяжкай для Ісуса. Біблія кажа нам: “Ня маюць нястачы тыя, што баяцца Яго.” (Псальма 33:10)

Перакананьне 3: Бог наўмысна стварыў цябе такім, якім ты ёсьць.

У тваім жыцьці ёсьць шмат рэчаў, якія ты ня можаш кантраляваць. Прымі іх як частку Божага пляну. Твая раса, культура, мова, нацыянальнасьць, пол ды твае іншыя фізычныя ўласьцівасьці зьяўляюцца “выбарам” Бога. Ён таксама даў табе таленты, здольнасьці, інтэлект, індывідуальныя рысы ды духоўныя дары, што, разам узятыя, робяць цябе ўнікальнаю асобаю на гэтай зямлі дзеля спаўненьня пляну, які Ён мае для цябе. (Псальма 138:13-16)

Перакананьне 4: У Бога ёсьць месца, да якога ты сапраўды належыш.

Бог стварыў цябе дзеля таго, каб ты сябраваў зь Ім ды зь іншымі вернікамі. Папрасі Яго дапамагчы табе прыдбаць моцнае пачуцьцё прыналежнасьці да Яго і даць табе “сям’ю” сувернікаў, зь якімі табе будзе ўтульна. Потым, па меры таго як ты будзеш расьці ў Ім, дапамагай іншым. (1 Пятра 2:9)

Перакананьне 5: У Бога ёсьць плян, які ты мусіш выканаць.

Дзеля сапраўднага ўнутранага супакою, чалавек мусіць ведаць, што ён кваліфікаваны, здатны, спраўны ды здольны зрабіць нешта. Ведаючы, што ты маеш усё, што трэба дзеля таго, каб добра выканаць нейкае заданьне або працу, ты будзеш мець цудоўнае адчуваньне супакою. (Эфэсцаў 2:10)

Калі ты прымеш гэтыя пяць перакананьняў як цэнтральны элемэнт твайго існаваньня ды будзеш верыць, што Бог дзее ў табе і празь цябе, дык ты зазнаеш сапраўдны ўнутраны супакой.