PANGERANGU 14
14
1Na kuru uma pa-pahadangu-ya ruku manggàna tau kawini,
tàka pa-nyungguru-ya ruku ndubana.
2Na tau na ma-patutungu na-mangàdatu dàngu natembi-ya i MIRI Ala;
na tau manda kunduhu lurina na-pawawa-ya Nyuna.
3Ruku abungu-na, na-mbuhangu pa-pabokulu wikina na tau nduba;
na tau manggàna napa namangga-nya paraï kareuku wikina.
4Nda ningu hapi luku, nda ningumbu ihi woka;
wàngu kapàru hapi, da-pabundungu da ihi paraï.
5Na hakahii ma-patutungu napeka mànu ma-padeningu,
na hakahii na paràka panda wai na-kambàliku mànu.
6Na tau ngànjangu nda jia njadi-ana tau manggàna,
tàka na tau halimu kotu namuda ba na pa-papekangu wikina.
7Àmbu pa-oringu-du la tau nduba;
ba nda ningua ràka pa-papeka wànanggau.
8Na tau manggàna napinya jàka nggàraya bàdi na pawunda-na,
na tau nduba na-panyonga-ya paraï ndubana.
9Na tau nduba nda na-kawelangu-a jàka jàmanja da njalana jàka ndiakai;
na tau hàmu duna na-mbuhangu ka jàmanja da njalana.
10Na mbaha eti dàngu na handuka eti pa-pakàpa la eti daluha;
na tau hawiangu nda napeku-a la papàda karia-nya.
11Na uma tau hàmu na-ndolaku pa-daingu;
na uma tau akatu jiangu-ma nanjoru.
12Ningu ànda na matànji ba itaya,
tàka la hupu njàpuna nuna na ànda hanggangu-nanya la meti.
13La hapapa-na nariki talànga wanguna ninya na hii;
na hawola na-ngalangu panjàpu wàngu handuka.
14Na tau akatu napàpu-ya na wua akatu-na,
na tau hàmu napàpu-ya na wua hàmuna.
15Na tau nduba nawai hàla biaya na kareuku,
na tau manggàna na-pananjarungu la pawunda-na.
16Na tau paeti narima mànungu dàngu na-wiliru-nya na akatu,
na tau nduba narengga hei na ma-karaü, hi namangu pa-mandangu.
17Na tau kàli mbeni, wàngu-nanya ndubana;
na tau manggàna na-lerangu etina.
18Na tau manda ndàmangu napa nalua-ya la nduba;
na tau manggàna na-bonjangu na pinguna.
19Na tau akatu na-karuduku la tau na ma-kunduhu etina,
la pakarai ka peku mila-nanya eti.
20Na tau mila nda pambuha-anya jiapa-kai paraï da angu lànggina;
tàka na tau wulu duna dadangu da kandua-na.
21Nggamu ma-pawawa tau hawiangu wunda-nanya manjala;
nggamu mahàmu-nya eti na tau mila, pa-paohangu-ya.
22Nggamu mawunda mahàmu, pawaiya dàngu patembi-ya;
nggamu mawuku-ya na ma-akatu ninya la ànda njàrangu.
23La nimbihu paràma ninya na pautu wangu;
na pabanjarungu manda palingu na pawiti-nya na pamila wàngu.
24Na tau manggàna pa-wotungu-ya ruku manggàna-na,
na tau nduba patanda-ya ruku ndubana.
25Jàka na-patànjingu na haàtu hakahii, pamara-nanya luri;
jàka na-kambàliku, kalekangu-nanya anguna.
26Na tau ma-tuturu lai MIRI na-mambiru na lurina,
tàka na ihi kuru umana ningu ngia pa-handera-na.
27Na tuturu lai MIRI jiaya na pingi pola pa-ohangu;
dàngu àndaya pa-hinggilu wànya na meti.
28Na bunjuku-na na maràmba jiaya na danguna na rayatu-na;
nda ninya na rayatu nda na-ngalangu-a pa-kawaha.
29Na tau manggàna nda narengga mbenia;
na tau nduba nda namàka-a pa-roputu wikina.
30Na eti mandangu pa-hayandalu wànguya;
na ngera himbu kangeha wiki beri hidu pameti wànguya.
31Nggamu mawunda mahàmu la tau mila, tembi-nanya na Alana;
nggamu ma-kapidihu tau lamanga, paaka-nanya na Ma-padika-nya.
32Na tau akatu na-tàlaru ruku pawunda-na na ma-akatu,
na tau hàmu naopa-nya paraï luri tànjina.
33Na kaminaku ni mànu-manya la kanandingu tau ma-paeti;
tàka pa-kapidihu-ya la kanandingu tau nduba.
34Na tànji dàngu na mahàmu jijiku-nanya na mandapu-na na banjaru,
tàka na njala na pawiti-nya na paràpu wàna na banjaru.
35Na maràmba nahàmu-nya eti na panggawi na ma-ànjaru;
tàka nambeni-nya na panggawi na manda palaku wai ngerana.
@LAI 1995 Indonesian Bible Society (Lembaga Alkitab Indonesia)