PANGERANGU 13
13
1Na ana ma-paeti na-katana-ya jàka napanau-nya amana;
na tau ngànjangu nda nabihu ka kanyàngi-nya.
2Na kareuku tau hàmu pautu wànguya;
na tau manda tànji nambuha-nya na pa-janggilu.
3Na tau ma-pananjarungu la kareuku-na naluri mambiru;
na tau na ma-àtalu kareuku biana najengi-nya ura dedi.
4Na tau mayau nadangu na parinju-na tàka nda haua pangala-na;
na tau na ma-mbangatu paràma nangala ndàbanya na parinju-naka.
5Na tau patutungu na-karaü-nya eti na kambàliku,
na nggoda nggàduku tau akatu pa-makia wànguya dàngu pa-paakangu-ya.
6Na patutungu naopa-nya na tau na maluri kunduhu;
na akatu na-pamija-ya na tau njala.
7Ningu ma-pahada tau wulungu, hi nda ningui pawulu wàna;
hi ningui ma-pahada tau milangu hi dira wulu biayai.
8Na tau wulu na-paluhu ndui ka peku luri mambiru-na;
na tau mila namara welingu la pangàdungu.
9Na tau maili lurina beri hambila ma-handaraku-ya;
na tau akatu beri palita mambàda-ya.
10Na abungu na-patàka-nya na palumungu-ma-a;
na tau manggàna na-mbuhangu pa-kataku lii papekangu.
11Da pawulu wàngu da mamuda la pangala-nja darengga pa-kawawaku;
tàka da banda da pa-ngalangu ba wàngu pangeri kangutungu da parukangu pa-pabonjangu.
12Jàka nda nalu hàrangu na monungu, nalàlu na eti dalu;
jàka ngalangu pawuku, da-minjalu da eti.
13Na tau na manda ihili-nya na lii papekangu-na i MIRI, pa-hanggamaru-nanya wikina;
na tau ma-karadaku-nya na Ukuna i Ala napa na-ngalangu wundana.
14Na lii papekangu tau manggàna beri pingi pola pa-ohangu-ya;
jàka ningu pangàdungu, nuna na lii papekangu na ma-pamara-ya.
15Na tau ma-paeti pa-wotungu-ya;
na tau panda monungu napa naharui na lurina.
16Na tau manggàna na-padiha mangilu-nyapa ba ndedi na-palaku-ya;
na tau nduba na-wewaru-nya na panduba wàna.
17Na tau pa-papalewa na manda palingu na-patàka-nya na hanggàmaru;
na tau pa-palewa naràka pa-monungu jiangu-ma na-ondungu.
18Na tau manda bihu ka papeka-nya nanjadi tau mila dàngu tau kudu;
na tau ma-kataku lii panaungu natembi-ya anguna.
19Nahàmu langatàka jàka ngalanya na pawuku!
Na tau na manduba nda nabihu pa-pambelingu welingu la akatu.
20Na tau ma-panggolu dànya na tau manggàna, nanjadi tau manggàna;
na tau ma-panggolu dàngu tau nduba, napa na-hanggàmaru.
21Na tau njala nayaulu mànuya kaba ura
na tau hàmu na-ngalangu mànu pa-ohangu.
22Na tau hàmu na-panduma-nja pawulu-na da ana umbuku-na;
da pawulu tau njala pa-pahàmu-ha nduma tau ma-kunduhu lurina.
23Na tana bulu napeku pawua padaa-nya pangangu na tau mila;
tàka na nda tànji na-pawiti-nya hi nda paràma-ya nuna na tana.
24Nda pa-ràmbahu ana, hamana ba nda pambuha-nya nyuna;
jàka mbuhanya, lupangu-ma toru mbeni pa-ràmbahu-ya nyuna.
25Na tau na mahàmu natoma mànu na lurina,
tàka na tau akatu duna nanjaka mànunya.
@LAI 1995 Indonesian Bible Society (Lembaga Alkitab Indonesia)