PANGERANGU 15
15
1Wànya na hema mandangu, na-wadaru na mbeni;
wànya na hema hanggàritu, wuda-nanya na ma-karaü.
2Na kareuku tau manggàna na-pawiti-nya la parinju-nya na papingu wàngu;
na kareuku tau nduba panduba wànguya na ihina.
3I MIRI naita hàla-maya na matumbu-ka la nggi - nggini;
na-hamata hàla-maya na mahàmu dàngu na ma-akatu.
4Na kareuku hàmu nabonja-ya na ringgitu,
na-kareuku ma-pahidu eti na-pamàli-ya na patikingu.
5Na tau nduba nda natunya wilina na panaungu amana,
na tau manggàna natunya wilina na lii kanyàngi.
6La uma tau hàmu dadangu da pawulu wàngu;
da pawulu tau akatu damànji ruku ura pàda.
7Na kareuku tau manggàna papingu wàngu ju - juaya,
tàka na kanandingu tau nduba nda tuna nua.
8I MIRI na-kataku-ya na hamayangu tau hàmu,
tàka huda eti-mananya na maraku pawotu tau akatu.
9I MIRI na-karaü-nya eti na huri luri tau katadaku,
tàka nanamu-ya na tau na ma-pamukarungu pa-palaku-ya na pawuku-na Nyuna.
10Na tau mawunda-ya na ma-akatu pa-pamayila-ya napa;
na tau manda bihu ka kanyàngi-nya napa nameti.
11I MIRI napinya na parai tau meti dàngu jàka nggi - nggikina;
nggiki hama pekuna kaka pa-kawiningu kanandingu-na na tau welingu lai Nyuna?
12Na tau na ma-mbuhangu pa-pawawa anguna nda na-mbuhangu-a ka kanyàngi-nya;
nda nabihu pakarai lii panaungu welingu la tau manggàna.
13Na eti mànjaku na-pawiti-nya na mata ma-hawola;
na eti ma-hawina na-poraku-ya na ringgitu.
14Na tau manggàna nahimbu papingu wàngu;
na tau nduba na-karamba ningu la ndubana.
15Na tau ma-kamundangu na-pajàrungu-ma bàdi la lurina,
tàka na tau ma-hawola ju - juaya naingu pa-ohangu-na.
16Narihi-pa pahàmu ba hakudu banda malanja tàka na pa-kariangu mangàdatu-nya i MIRI,
welingu ba dangu banda malanja tàka na pa-kariangu hala eti.
17Narihi-pa pahàmu ba ngangu rii muru pa-kariangu pa-mbuhangu,
welingu ba ngangu tolu mboka pa-kariangu pa-karaüngu eti.
18Na tau na marengga pambeni na-patumbu-ya na pa-palumungu wàngu,
na tau na ma-lerangu etina nangàndi luri peku.
19Na tau mayau nahunggu mànu ma-kalutu;
na tau tànji nda nahunggu-a harui.
20Na ana ma-manggàna na-pahàmu eti amana;
na ana na manduba nda na-wàrihu inana.
21Na panduba wàngu jiaya na pahàmu eti wàna na tau nduba,
na tau manggàna naluri kunduhu.
22Nda na-hàrangu na pawuku, jàka nda na-pakariangu padiha hahangu;
na-hàrangu na pawuku, jàka nadangu na ma-wuangu lii panaungu.
23Da kareuku da ma-jàngapu la rehina,
da patumbu-ya na mbaha eti.
24Na tau manggàna na lii ningu la ànda pa-kandekalu na ma-hanggangu la luri;
nda la ànda pa-kamburungu-a na ma-hanggangu la meti.
25I MIRI napa na-nyànggaru-ya na uma tau jangga eti,
tàka na tana manguna na haàtu kawini meti lei namangga-nya.
26I MIRI nakaraü-nya eti na pawuku na ma-akatu;
tàka da kareuku mahàmu da-pambaha-ya na etina.
27Nggamu mahimbu utu manda pa-deningu,
pamija-nanya na kuru uma wikina.
Nggamu ma-karaü-nja eti da ndui pakei li hambeli, na-paohangu na lurina.
28Na tau hàmu na-padaü-manyapa duna na kareuku-na;
na tau akatu natiki-ha da ma-iraku.
29I MIRI natingi-ya jàka na-hamayangu na tau hàmu,
tàka nda na-ihili-anya na tau ma-katadaku.
30Na mata ma-hawola na pambaha eti,
na lii langu mahàmu na-pahayandalu hamangu.
31Na tau na ma-wàrihu lii kanyàngi
la kaloka tau manggàna-ya.
32Na tau manda bihu ka panaunya, nda pawili-nanya na wikina;
na tau na ma-mbuhangu ka kanyàngi-nya, nalua-ya la paeti.
33Na ngera mangàdatu-nya i MIRI jiaya na lata pa-papekangu mahàmu;
na ma-ngalangu tembi na-karàda eti-mapa duna.
@LAI 1995 Indonesian Bible Society (Lembaga Alkitab Indonesia)