YUHUA 23
23
Na pamuangu-na i Yuhua
1Ngala mandaina ba nawua-nya luri mambiru na banjaru Ihirailu i MIRI; nda dahili kunggalu wa-anjapa pangàdungu paraïda muhuda. La rehi nu, kaweda halawàla-nanyaka i Yuhua. 2Ka paau-nanyaka nggubulu-na na banjaru Ihirailu, dàngumbu ba hapajia-ha da liku uru, ba hapajia-ha da hakimu, dàngu ba hapajia-ha da ngora tanatara, hi napanii, “Nàhu kaweda-nggunyaka. 3Mbàda ita wiki-mami-nyaka mbuu ndàbada da pawunda-na i MIRI na Alami la mbuu ndàbada da banjaru lai yiahu lumumi nyimi. Na mambeni hanggangu hurumi nyimi jia wikiya i MIRI na Alami. 4Na tanada da banjaru da ma-kanjepi-ipa, hamangui na tanada da banjaru pambàda pakàku-nggu, nu na tana ma-tayilingu piti welingu la pahunga loduna na Luku Yorundangu pangala tilangu la patama lodu lundu la Tehiku Padua, mbuu ndàbana nuna mbàda panduma-nggunggai-nyaka ka mangumi nyimiya. 5Napa na-pawiti-nya paraïna i MIRI na Alami ka dakàku nuda da banjaru dàngu ka dapalai welingu la hanggami nyimi jàkai lua pabera-ha nyuda. Napa imangunya na tanada nyuda, hama tuna na pambàda njanji-nanggai paraïna i MIRI na Alami. 6Jia ba tuna, màtawa kai eti waa pahàmu-nya la pa-karadaku-nja dàngu la pa-pahàra-nja mbuu ndàbada da pa-tulihu la Mbuku Ukuna i Muha. Àmbu jia haudu papangga-mi la uku nuda. 7Nu ba timi nu nda jia pa-kaürungu-ami dàngu da banjaru da ma-kanjepi-ipa la hongami nyimi. Dàngu àmbu jia tiki-mihaka da tamu marapu-da nyuda jàka ndia àmbu harangu la tamuda nuda. Dàngumbu ndai lumu-anjapa jàka ndia ndai marubuku-anjapa nuda da marapu. 8Màtawa ka pa-daingu tuturu-mi lai MIRI hama tuna ba mbàda tuturu-mi lundu nàhu lai Nyuna. 9Mbàda wàngga-nahaka i MIRI da banjaru bokulu ma-kapingatu lumumi nyimi; nda ana haàtu-a welingu lai nyuda ma-torungu pa-ndubaku kai nyimi. 10Nimbihu-na na tau lai nyimi na-ngalangu pa-pakàku tau riu rata, nadu ba i MIRI na Alami na ma-pabera hurumi nyimi, hama tuna na pambàda njanjina. 11Jia ba tuna, eti waa-manya la pambuha-nya i MIRI na Alami. 12Jàka ndai tuturu-pa, tàka hi pa-kaürungu dàngu da banjaru da ma-kanjepi-ipa la hongami nyimi, dàngu hi ipakuru uma dànja, 13namu-maya, jianguma ba nda nawàngga-ahapa napa, nuda da banjaru lumumi nyimi paraïna i MIRI na Alami. Na nyuna la kabeli nggarana, pa-hanggàmaru wànguha napa nyuda lai nyimi, nadu ba beri hiruha jàka ndia oka kahili-ha nyuda ndumami nyimi. Napa nyuda da-pawiti-nya na mayila dira matiki lai nyimi; nadu ba beri ràmbahu-ha napa la padua kajia-mi jàka ndia beri rii madàka-ya daa la wua matami. Napa nyimi ipa-nutakungu la pa-mayila lundu nda ana haàtu-a napa lai nyimi ma-kanjepi la tana hàmu yiana na pawua-nanggai nyimi paraïna i MIRI na Alami.
14Nàhu jia-yaka na rehi metinggu. Ipii hàmu-manya nyimi mbuu ndàbami haàtu - haàtu ba mbàda wua-nanggai-haka paraïna i MIRI mbuu ndàbada da mahàmu da panjanji-na. Mbàda pahàra-nanjaka nimbihu-da da panjanji-na; nda ana haua panda pahàra-na. 15Na nyuna hama tuna ba na-padeni-nja nimbihu-da da panjanji-na Nyuna lai nyimi, tuna numbu ba jiangu-ma napa na-pahàra-nja nimbihu-da da pangàdungu-na lai nyimi. 16Jàkai panggaya na lii pa-njanjingu na pambàda turana i MIRI lai nyimi la pa-karadaku-nya, tàka hi lua-minyai pa-lumungu dàngu pa-marubuku-nja da marapu, napa nahàngga i MIRI hi nahuku-nggai nyimi. Tàka ndedi nggi tuna mandaina molungu ndàba-minyaka welingu la tana hàmu yiana na pawua-nanggai nyimi i MIRI,” wàna.
@LAI 1995 Indonesian Bible Society (Lembaga Alkitab Indonesia)