YUHUA 22
22
Ba paràha-nja pabeli la ngaba tanada da kabihu la pahunga lodu
1Tunaka nu paau-nanjaka pa-pauhi paraïna i Yuhua da tau la kabihu Rumbingu, Nggàtu dàngu Manahi hawiangu la pahunga loduna na Luku Yorundangu, 2hi napanii-nja nyuda, “Mbuu ndàbada da pawunda ba wànanggai nyimi i Muha, na atana i MIRI, mbàda wunda-mihaka. Dàngumbu mbàda nunju ndàba-mihaka da hupu liinggu nyungga. 3Lundu nàhu ndedi ihandàkangu-ma papuli mehanja la pambeni hanggangu da angu dedimi da angumi pa-banjaru Ihirailu. Dàngu mbàda weli eti langatàka-mamika pa-karadaku-nja da hupu liina i MIRI Alami. 4Ba tuna, pa-namatu-nya na njanjina, mbàda wua-nanjaka mambiru da angu dedi angu banjaru-mi paraïna i MIRI Alami. Ba tuna, ibeliwa nàhu la ngaba tana wikimi dimi la pahunga loduna na Luku Yorundangu na pawua-nanggai nyimi àmangu i Muha. 5Dàngu namu-maya! Màtawa kai nunjuha da uku, ikaradaku-manja ba wànanggai nyimi i Muha; nu: Mbuha-nyawa i MIRI Alamu, kiku-nyawa na pawuku-na karadaku-njawa da hupu liina, tuturu-wa lai Nyuna dàngu weli eti weli puhu-miwa pa-rajaku lai Nyuna,” ba wàna. 6-9Hàlaka nu peka-nanjaka mahàmu paraïna i Yuhua hi napuli-nja pabeli la ngaba tanada ba dàngu tuna yia na-kamahi-nanja, “Nàhu wulu-minyaka dàngu dadangu da banda da malanja pangàndi-mi bai beli: banda luri, àmahu bara, amahu rara, wudu, bàhi dàngu paki. Pabe - beri-mbunjai duda da angu kabihu-mi hawiangu, banda dàngu malanja pariba-mi,” wànanja. Ka dunjaku-danjaka da tau Ihirailu hawiangu paraï da kabihu Rumbingu, Nggàtu, dàngu Manahi pahunga lodu, hi da-hadangu welingu la Hilu la Kanaàngu hi dalaku la tana wikida la ngabana la Nggiliatu. Dangia-nya nuna na tana la hupu liina i MIRI la ngaru-na i Muha.
(Na beri mandua-na na kabihu Manahi mbàda ngala-danyaka welingu lai Muha na tana la hapapa Luku Yorundangu, tàka na hili beri mandua haunai nu na kabihu Manahi dangala-nya welingu lai Yuhua na tana la patama loduna na Luku Yorundangu anguda da kabihu hawiangu.)
Na ngia pawotu maraku la lihi Luku Yorundangu
10Ba datàka-ka la Nggalilutu da kabihu Rumbingu, Nggàtu dàngu Manahi pahunga lodu – nu la patama lodu-mana-nyapa na Luku Yorundangu – pahadangu-danyaka hau ngia pawotu maraku ma-bokulu dàngu ma-manandangu la lihi luku. 11-12Da tau Ihirailu hawiangu darongu-ya na panii angu banjaru-da, “Da tau la kabihu Rumbingu, Nggàtu dàngu Manahi la pahunga loduna na Luku Yorundangu mbàda pahadangu-daka hau ngia pawotu maraku la Nggalilutu la lihi Luku Yorundangu la ngaba tananda nyuta!” wàda. Ka pauhi ndàba-danyaka la Hilu ka lua pa-pabera-dànja da kabihu Ihirailu la ngaba pahunga loduna na Luku Yorundangu.
13Tàka hi da-palewa-ya i Pineha anana i Ratu Eliahàru paraïna banjaru Ihirailu, palua la kabihu Rumbingu, Nggàtu, dàngu Manahi la ngabana la Nggiliatu, la pahunga loduna na Luku Yorundangu. 14Karia-na i Pineha dalua-mbu da hakambulu tau ma-pangora la banjaru Ihirailu, – maràngga haàtu welingu la nimbihu-da da kabihu la patama loduna na Luku Yorundangu nimbihu-da liku uru biliku-maha la kalibaru-da. 15Ka tàka-danyaka la pangia-da da kabihu Rumbingu, Nggàtu dàngu Manahi la ngabana la Nggiliatu. 16Hàla la hupu liina nggubulu-na na banjaru-na i MIRI dapanii-nja da tau la kabihu Rumbingu, Nggàtu dàngu na Manahi, “Ka nggikina dimi nyimi hi iwundaya yiana na ma-akatu hangganya i Ala Ihirailu? Bai pahada-nya yiana na ngia pawotu maraku nduma wikimi, ndubaku-minya i MIRI! Ndai nunju-ahapa da hupu liina! 17Ka mbàda nda namu-ami-nyapa na njalanda la Piuru? La rehi nu nahuku wànda hidu panggàbalungu, ka jiapa-kai ka banjaru wiki-nanda! Jiapa lundu nàhumbu taita-mayapa na injana. Ndedi-mapa nu natoma? 18Tàka nàhu hili taliuru-minyai i MIRI? Jàkai ndubaku-ya la lodu nàhu i MIRI, napa nambeni ndàbanya la lodu haromu na banjaru Ihirailu. 19Màla, jàka hada na-iraku nu na tanami ka tuya ngia pa-lumungu lai MIRI, lelingu biawa yiahu la ngaba tanana i MIRI, la ngia paninya na Uma Terana i MIRI. Karai biawa hawiangu ngaba tanama nyuma, na nyuna àmbi ndubaku-ya i MIRI jàka ndia la pa-ndubaku-kama nyuma bai hili pahadangu hili hau ngia pawotu maraku, nadu ba mbàda ningu-duka ngia pawotu maraku manguna i MIRI na Alanda. 20Namuya nu i Àkuhàngu anana i Heràhu, ba nda nabihu panunju-ya na hupu liina i MIRI rukuda da banda malanja pa-pamànji làti. Tàka nggàra-yaka na injana? Pa-hukungu-ya nggubulu-na na Ihirailu! Didi-aya làti i Àkuhàngu na manjala, tàka nda didi meha-aya na mameti!” wàda.
21Da tau la kabihu Rumbingu, Nggàtu dàngu Manahi pahunga lodu dahema-ha, 22“Na Mahupu Mambiha jiaya i MIRI! Na Mahupu Mambiha jiaya i MIRI! Napii-manya jàka nggikina hi mawunda ndàbaha yiada, dàngu ma-mbuhangu-mai, kai piimbunya nyimi! Ngera hama tuna ka ndubaku wànya i MIRI jàka wàma hi mawunda-ya nuna, jàka ndia rukuna ba nda mawai-ayapa Nyuna, pameti bia-kama nàhu memangu-ma! 23Jàka deningu-na ba wuku-manya la pa-ndubaku-ya i MIRI, nu ba ma-pahadangu ngia pawotu maraku nduma wikima ka wotu wàngu kameti maraku patunu jàka ndia ka wotu wàngu maraku uhu nggàndumu jàka ndia ka wotu wàngu maraku papeku màtawa ka i MIRI wikima duna na mahuku-nggama nyuma. 24Ai, ndia-a, angu dedi! Nda nuna-aya duna na pawuku-ma! Hi ma-pahada-nya nuna na ngia pawotu maraku, panaï-manya la lodu malamiri, napa hi tuna yia bia na paniida da ana umbuku-mi nyimi hanggangu la ana umbuku-ma nyuma, ‘Nda ana nggàra-a dimi pa-nuangu-mi dàngu i MIRI, na Ala Ihirailu! 25Tàngaru, i MIRI natuya yiana na Luku Yorundangu la henaku-nda nyuta jia-mayaka ka kahika-kama nyuma welingu lai nyimi tau Rumbingu dàngu Nggàtu. Nda ana nggàrama pa-nuangu-mi dimi nyimi dàngu i MIRI,’ hi wàda bianja napa wàma. Tàka nggàra-yaka na manjadi? Napa da ana umbuku-mi nyimi da-pawiti-nja da ana umbuku-ma nyuma ka da-jiakangu palumu-nya i MIRI. 26Ba tuna, hi ma-pahadangu ngia pawotu maraku, nda nduma kameti maraku patunu-a jàka ndia nda ndumada da hunggu maraku-ma nyuma-a, 27tàka màta ka hau tandaya nu lai nyuta hapapa - hapapa, dàngu la ana umbuku-nda la lodu malamiri, ba ma-langatàka-maya duma nalumu-manya i MIRI la Uma Tera Ngia Paninya Nyuna, ba mawàngu pangàndi kameti maraku patunu, hunggu maraku dàngu hunggu maraku papeku. Nu ba tuna nu, nda jia panii adapa napa da ana umbuku-mi nyimi, ba nda ana nggàra-a pa-nuangu-da lai MIRI da ana umbuku-ma nyuma. 28Ba tuna, yiana-ya duma na pawuku-ma: Ngera hama tuna jàka tuna nu na paniida da ana umbuku-mi nyimi, peku-daka duda papanii tuna yia da ana umbuku-ma nyuma, ‘Tàngaru-ya nina na ngia pawotu maraku! Da boku la mangilu-ma nyuma da-pahadangu hau ngia pawotu maraku mahama-nya na ngia pawotu maraku manguna i MIRI ngalangu pawàda. Nda nduma kameti maraku patunu-aya jàka ndia nda nduma hunggu maraku-aya, tàka màta ka tandaya lai nyuta hapapa - hapapa,’ wàma duma. 29Wai biaya nu na paniima, ba nda jia ndubaku-amanya duma i MIRI jàka ndia nda jia jiakangu-ama duma pa-rajaku lai Nyuna wàngu pahadangu-ma hili hau ngia pawotu maraku nduma kameti maraku, jàka ndia maraku uhu nggàndumu, jàka ndia hunggu maraku, bundu ninya padua na ngia pawotu maraku manguna i MIRI na Alanda la hangga Uma Tera Ngia Paninya i MIRI,” wàda.
30Mbuu ndàbana na pa-kalokangu-da da tau la kabihu Rumbingu, Nggàtu dàngu Manahi pahunga lodu, da katàmbalu-nya paraï da i Ratu Pineha dàngu da ma-hakambulu-da da ngora banjaru Ihirailu welingu la patama loduna na Luku Yorundangu. Ka jia hàmu-yaka la etida nu na lii kaloka. 31Ka panii-nanjaka da tau la kabihu Rumbingu, Nggàtu dàngu Manahi pahunga lodu paraïna i Pineha anana i Ratu Eliahàru, “Nàhu pii-duma-nyaka ba na-angunda nyuta i MIRI, ba ndai ndubaku-duya Nyuna. Nu pamara-dimi-nyaka na banjaru Ihirailu welingu la hukungu-na i MIRI,” wàna.
32Hàlaka nu, beli-danyaka i Pineha dàngu ba hàpajia-ha nu da ma-pangora Ihirailu. Damàta-nja da tau Rumbingu dàngu Nggàtu la Nggiliatu, hi dabeli la Kanaàngu, hi dapatàka-nya nuna la banjaru Ihirailu na ngerana nuna. 33Ka jia hàmu-yaka la etina na banjaru Ihirailu na ngerana nuna, hi dawo - wotunya i Ala. Dàngu nda dapanii wa-anyapa na pawuku-da la pahada-nja da tau Rumbingu dàngu Nggàtu, dàngu la pa-patàlaru-ya na tanada.
34La njàpuna, panii-danyaka da kabihu Rumbingu dàngu Nggàtu, “Hakahii-yaka lai nyuta mbuu ndàbanda yiana na ngia pawotu maraku ba Alaya i MIRI,” wàda. Ka patamu-danyaka “Hakahii” nuna na ngia pawotu maraku.
@LAI 1995 Indonesian Bible Society (Lembaga Alkitab Indonesia)