YUHUA 24
24
Ba napanii dànya na banjaru Ihirailu la Hikimu i Yuhua
1Mbuu ndàbana na kabihu banjaru Ihirailu napaau-nja pa-pauhi la Hikimu paraïna i Yuhua, hi na-paràha-nja pa-hurungu la hangga ba hapajia-ha da ma-pangora, da liku uru, da hakimu dàngu ba hapajia-ha da ngora tanatara. Ka mai-danyaka la hanggana i Ala. 2Tunaka nu panii-naka i Yuhua lai nyuda mbuu ndàbada, “Patingi-nya jàka nggàraya na papanii-nanggai nyimi i MIRI, na Ala Ihirailu, ‘La handàka-na la hapapa Luku Epuràtu-ha da-ngiangu ningu da boku la mangilu-mi, dàngu da-hamayangu marapu. Na haàtu la hongada nyuda jiaya i Tera, amada i Ambarahàmu dàngu i Nahuru. 3Tunaka nu hi kupiti-ya i Ambarahàmu, na boku la mangilu-mi, welingu la tana la hapapa Epuràtu, hi ku-paràha-nya panjada-nya nggubulu-na na tana Kanaàngu. Kuwua padaanya ana umbuku-na. La kawunga-na jiaya i Ihàku na pawua-nggunya, 4hàlaka hi kuwua-nya tau madua anana i Ihàku, nu i Yakupu dàngu i Ehaü. I Ehaü kuwua-nya na ma-palindingu la Endumu ka tana mangu-nanya. Tàka i Yakupu, na boku la mangilu-mi, na-lelingu la Mehiru karia-da da anana. 5La rehi malamiri ku-palewa-ha i Muha dàngu i Harungu, hi ku-patàka-nya harui rara na Mehiru, tàka hi ku-paluhu-kai nyimi welingu lai nu. 6Kuluhu ngàndiha da boku la mangilu-mi welingu la Mehiru hàla hi dayaulu wànja kareta - kareta pabera dàngu tanatara li la njara paraï da tau Mehiru. Tàka ba datàka-ka la Tehiku Tibuhala da boku la mangilu-mi, 7dawara-ngga Nyungga pakarai pa-ndulangu. Ka pa-kapàta-nggunyaka la henaku-da nyuda dàngu da tau Mehiru, dàngu hi ku-patàka-nja wai tehiku pa-lumburu-nja da tau Mehiru hi lundu da-mumuhu ndàba. Na kababa-na jàka nggàraya na pawunda-nggunya na Mehiru, mbàda pi ndàba-mami-nyaka.
Tunaka nu dira mandaikai bai ngiangu la maràda wara. 8La hambeli-na nu ku-karia-nggai la tana tau Amori da ma-ngiangu la pahunga loduna na Luku Yorundangu. Nyuda nu dahada-nggai nyimi, tàka Nyungga duku ku-pawiti-nggai nyimi la patalu-ha nyuda. Iwàhi-ya na tanada nyuda, tàka hi ku-patàlaru-ha. 9Hàla, hi na-ndubaku-kai paraïna hanganji Muapu, nu i Mbalàku anana i Hipuru. Na-palewa tau lai Mbiliamu anana i Mbeuru la pakaraï-ya ka naràtu-nggai nyimi. 10Na nyuna Nyungga duku nda kununju-aya na pawuku-na i Mbiliamu, tàka hi na-pakanyuru-nggai nyimi. Tuna nu na pawànggu ba ku-pamara-kai welingu lai Mbalàku. 11Tunaka nu pala-minyaka na Luku Yorundangu, hi itàka la Yeriku. Dahada-nggai tau Yeriku, hamangui da tau Amori, tau Perihu, Kanaàngu, Heti, Nggiringgahi, Hewi dàngu Yembuhu. Tàka Nyungga duku kuwua-nggai talu hanggangu lai nyuda. 12Bai ndàharungu-ka dimi nyimi pahada-nja nyuda, ku-pawiti-nja hi dambingu dàngu hi dira mangàdatu-ha nyuda, hi lupa dapalai nu da hanganji Amori tau madua welingu la hanggami nyimi. Nda ruku hapanda-ami dàngu nda ruku pana-mbumi na patalu wàmi nyimi. 13Na tana pambàda wua-nggunggai nda nyimia mapoka-ya. Dàngu da paraingu pambàda wua-nggunggai nda nyimimbu matura-ha. Tàka nàhu nyimika ma-ngiangu lai nu, dàngu nyimi-mbuka mapàda-nja da wua angguru hamangui da wua haitungu-da, tàka nda nyimiai làti ma-pamula-ha,’ wàna,” wànanja.
14“Jia ba tuna, nàhu,” hili wàna i Yuhua, “màtawa kai tembiya i MIRI. Rajaku weli etingu-wa lai Nyuna dàngu wàngu tuturu-mi. Payila-njawa da marapu palumu-da da boku la mangilu-mi la handàka-na la Mahupatamia dàngu la Mehiru. Rajaku-nyawa i MIRI-a bàdi. 15Ngera hama tuna jàka ndai bihu pa-rajaku lai MIRI, wua memangu-ma botangu la lodu nàhu, jàka nggamuya na ngia pa-rajaku-mi: jàka la marapu - marapu palumu-da da boku la mangilu-mi la handàka-na la Mahupatamia, jàka ndia da marapu tau Amori da-pangia-mi tanada nàhu. Na nyuna nyuma duma – nyungga dàngu ihi umanggu – mbulungu lai MIRI-a duma na ngia pa-rajaku-ma,” wàna.
16Ka hema-nanyaka na banjaru Ihirailu, “Nda jia dunjaku-amanya duma napa i MIRI la pa-rajaku ninja da marapu hawiangu! 17Jiaya i MIRI na Ala-mandaka na ma-pahàla-ha da boku la mangilu-nda dàngu nyutambu welingu la ngia pa-ata la Mehiru. Mbàda ita manda-haka da pa-hangàtarungu pawunda-na i MIRI. Naopa mànu-manda i MIRI la mbuu ndàbana na ànda ngarangia-nda ba tali ningu la tana tau hangàdangu. 18Dàngu ba tatama-nyaka na tana yiana, nawàngga paluhu ndàbaha i MIRI da tau Amori da ma-ngiangu lai yiahu. Jia ba tuna, ma-mbuhangu-ma duma pa-rajaku lai MIRI, ba jiaya Nyunadu na Alanda nyuta!” wàda.
19-20Hi napanii i Yuhua, “Talànga wanguna hi ndai duluku bia napa pa-rajaku lai MIRI, ba Ala ma-matua-ya duna Nyuna, Mahupu Mbulungu-ya. Nda nangàdu-a ka ningu ma-hihiku-ya. Jàkai dunjaku-nya Nyuna tàka hi mi-rajaku ningu la marapu hawiangu nda jia jàma-ananja da njalami. Tàka na kabeli njàngana napa na-ndubaku-kai hi nahuku-nggai. Napa na-pamolu-nggai jiapa-kai ka nahàmu-nggai làti amangu,” wàna.
21Ka hema-danyaka da tau Ihirailu, “Ai ndia-a duma! Nda jia rajaku-ama duma la marapu - marapu hawiangu. Lai MIRI-a duma ma-rajaku ningu!” wàda.
22Hi napanii i Yuhua, “Naa, nyimi wiki-maka hakahii-na ba mbàda bota-minyaka la pa-rajaku lai MIRI-a,” wàna.
“Deningu-mana,” wàda ba dahema, “nyuma wiki-maka duma hakahii-na,” wàda.
23“Jàka tuna nu, payila-njawa da marapu-da da banjaru hawiangu da maninja lai nyimi,” wàna i Yuhua, “dàngu pa-njanjingu-wa, bai tuturu napa lai MIRI, na Ala Ihirailu,” wàna.
24Hi dapanii nu da tau lai Yuhua, “Mbulungu lai MIRI-a duma na Alanda na ngia pa-rajaku-ma napa. Napa ma-karadaku-manja da hupu liina,” wàda.
25Ka tura-danyaka pa-njanjingu la lodu nu la Hikimu i Yuhua dàngu na banjaru Ihirailu; dàngu nawua-njaha lai nu da uku dàngu da kalaratu ka lupangu-ma danunju-ha. 26Mbuu ndàbada nuda da uku dàngu da kalaratu, na-tulihu-ha la Mbuku Ukuna i Ala paraïna i Yuhua. Tunaka nu napiti hau watu bokulu, hi na-pandolaku-ya la lumbu ai bokulu la hau pangia pa-panduma-nya i MIRI. 27Hàlaka nu panii ndàba-nanjaka nuda da tau i Yuhua, “Yiana na watu jiaya na hakahii-nda. Mbuu ndàbada da patiki-na i MIRI lai nyuta, pambàda tiki-haka la hanggana yiana na watu. Jia ba tuna, hakahii-yaka napa yiana na watu lai nyimi, la pa-panamu-nggai, ka àmbi ndubaku-ya na Alami,” wànanja. 28La hupu njàpuna paràha-nanjaka pabeli nuda da tau i Yuhua; hi dabeli ndàba la ta - tanada.
Ba dameti i Yuhua dàngu i Eliahàru
29Tunaka nu meti-nanyaka na atana i MIRI i Yuhua anana i Nungu la hangahu hakambulu-na na ndaungu lurina. 30Pa-taningu-ya la tana manguna la Timunàtu-Hera la ma-palindingu la Epuraïmu la diana na Palindi Nggaàhu.
31La ngala lurina i Yuhua, na-rajaku lai MIRI na banjaru Ihirailu. Dàngu la taliu meti-mbuna pa-daingu rajaku-mada lai MIRI ba talànga ni-injapa da liku uru la hongada, nu da maita-ha mbuu ndàbada da pawunda-na i MIRI nduma tau Ihirailu.
32Na metina i Yuhupu, na pangàndi-da da banjaru Ihirailu welingu la Mehiru, datani-nya la Hikimu, la tana na ma-wilingu hangahu àmahu bara ba nakeiya i Yakupu welingu la a - anana i Hemuru, amana i Hikimu. Na tana nuna pa-pakangehangu-ya la ana umbuku-na i Yuhupu.
33Tunaka nu meti-mbuna-nyaka i Eliahàru anana i Harungu, hi taninya la Nggimbia, nu na paraingu la ma-palindingu la Epuraïmu. Pambàda wuangu lai Pineha anana i Eliahàru-yaka nuna na paraingu.
@LAI 1995 Indonesian Bible Society (Lembaga Alkitab Indonesia)