2 HAMUILU 7
7
Na lii pa-patàka-na i Natàngu lai Ndautu
(1 L Nd. 17:1-15)
1I MIRI na-katindi-maya i Ndautu welingu la muhu-naka na ma-ngganggitu-ya, jia-duyaka hi peku nguduna la uma hanganji-na. 2Ka panii-nanyaka na hanganji la wunangu Natàngu, “Tàngaru, nyungga yia ngiangu-nggunya la uma hanganji, na pawulu wàngu ai kajiu Limbanongu, tàka na Pàti Pa-ràndingu-na i Ala jiapa bia-yapa ba pahàmu-ya la maü tera!” wàna.
3Nahema i Natàngu, “Màlama nu hi Tamu umbu kau palaku-ya mbuu hàlana na pawuku etimu, nadu i MIRI ba ndutu-nanggau-padua,” wànanya.
4Tàka la rudungu nuna i MIRI napanii-nya i Natàngu, 5“Luawa kau patàka-nya na atanggu i Ndautu na liinggu yiana, ‘Kanii hi nyumuika ma-pahadangu uma ndumanggu Nyungga. 6Piti welingu ba ku-pahàla-ya na banjaru Ihirailu welingu la Mehiru lundu nàhu, ndedi ku-handàkangu-ma duku pa-ngiangu uma, tàka jia-ma-a la pa-njadangu mànu dàngu hi ku-ngiangu la maü tera. 7Nu la dalu njada karia-nggunya na banjaru Ihirailu, ndedi ku-handàkangu-a pa-paàrangu la liku uru - liku uru#Talànga wanguna na-njenjangu ningu-mapa: liku uru - liku uru; Imbarani: kabihu - kabihu. da papindi-nggu, nggikina Nyungga hi nda dawulu-ngga uma ai kajiu Limbanongu,’ wàna.
8Jia ba tuna, Natàngu, patàka-nya na atanggu i Ndautu, nu Nyungga MIRI Mahupu-mbiha, kupanii-nya nyuna, ‘Nyumu kupiti-kauka welingu la paràma-mu la pa-pawangu mbimbi la maràda dàngu hi kutukau hanganji la banjaru-nggu na Ihirailu. 9Nyungga kulaku karia-nggau la nggi bia mulua ningu, dàngu mbuu ndàbada da muhumu ku-pamolu-njaka la rehi pa-kangaburungu-mu. Napa nyumu ku-pawuwa-kau hama tuna da liku uru da marihi bokulu la pinu tana. 10-11Hili hinggilu-na, na banjaru-nggu na Ihirailu, mbàda payema-manggu-nyaka pa-ngiangu dàngu ku-paràha-nya la pa-padaingu lai nu, ka peku ngalangu-da paluri mambiru, dàngu nda hili ningu ma-kuwaru-ha. Piti welingu na tàkada la tana yiana àmangu, dàngu ba kuwotu-nja liku uruda, nyuda na-kangaburu-haka tau ma-mbuhangu pa-pajanggilu, tàka nda hili ningu-apa napa matuna nu. Ku-paràndingu, ba mambiru-munyaka napa welingu la mbuu ndàbana na muhu-muka, dàngu napa kuwua-nggau wàla wuamu. 12-13Napa ngeru, jàka toma-yaka na njàpumu, dàngu ba taninggau la pangia-da da boku la mangilu-mu, na haàtu welingu la anamu napa kuwotu-ya la pa-hanganji. Nyuna duna napa na mawulu-ngga uma Nyungga, dàngu na pa-hanganji-na napa ku-paundu-nya, tàka napa na haàtu wàla wuana na-pareta ba hanganji-ya lundu nu-nu. 14Nyungga napa Ama-nangga, dàngu nyuna napa ana-nggunya. Jàka era tuna manjala, napa kuhuku-nya hama tuna na haàtu ama na ma-hukungu anana. 15Tàka Nyungga duku pa-daingu wunda-nggunya nyuna mahàmu nunjuya na njanjinggu. Na panjanji-nggunya nyuna pa-daingu paundu-manggunya, nda hama tuna na pawunda-nggunya i Haulu na pambàda tulaku-nggu welingu la ngia pa-mandapu-na ka peku njadimu hanganji nyumu. 16Nyumu napa nuangu-mana ba ningu wàla wuamu dàngu napa na pa-hanganji-mu ku-pamàndu-nya lundu nu - nu. Lundu nu - nu napa na haàtu wàla wuamu na-pareta ba hanganji-ya,’ wàna wàmunya,” wàna.
17I Natàngu na-wàlahu-nya i Ndautu mbuu ndàbana na pa-pabowa-na i MIRI lai nyuna.
Na hamaya pa-malangungu-na i Ndautu
(1 L Nd. 17:16-27)
18Ka tama-nanyaka i Ndautu la Maü Terana i Miri. Na-uhuku hi na-hamayangu, “Dou MIRI Mahupu-jangga, nyungga dàngu kuru umanggu nda ràka-ama duma la pa-kataku hàlaya na kanyuru na pa-paloha-mu lundu nàhu. 19Jiapa narihi-kipa welingu lai nu na pawunda-mu dou MIRI Mahupu-jangga; Nyumu mbàda pa-ràndingu-muka rukuna na ngerada da wàla wuanggu la rehi na manàmu-nya. Dàngu bau pajiliku-ngganya na rukuna nuna lai nyungga, jiapa-kai ba tau-aka duku,#Talànga wanguna na-njenjangu ningu-mapa: na rukuna nuna ... tau-aka duku; Imbarani: yiana hau ukuya nduma tau pinu tana. dou MIRI Mahupu-jangga! 20Hili nggàra wànggu-nggauipa MIRI? Mbàda pi-mamu-nyaka Nyumu na ngeranggu nyungga atamu. 21Paraï rukuna na paràndi-mu dàngu na ma-jàngapu la pawuku-mu, Nyumu mbàda wunda-muka pawunda ma-bokulu la pa-ajaru-ka nyungga yia atamu. 22Nyumu ma-bokulu langatàka-kau, dou MIRI Ala! Nda ningua majia hamanggau Nyumu. Hi kiri pimanya nuna ba mbàda pa-paniingu-kamaka weli àmangu. 23Nda ningua banjaru la pinu tana yiana mahama-nya na Ihirailu. Na Ihirailu didi meha-maaya na banjaru na pambàda pahàla-mu welingu la paata, ka peku tumunya hau banjaru wikimu. Mbuu ndàbana na paraï rukumu na ma-bokulu dàngu na pa-maratangungu na pa-patumbu-munja nyuda,#Talànga wanguna na-njenjangu ningu-mapa: nyuda; Imbarani: nyimi. na-pakàni kadanya-ka na mbii hambungaru-na na tamumu la pa-nggubulu awangu. Da banjaru hawiangu lupa da marapu-da mbàda wàngga-munjaka#Na hau pa-haleli ndai: mbàda wàngga-munjaka; Imbarani; nduma tanamu. ba jiaya na-ndàharungu-na na banjaru-mu la pa-kangaburungu. 24Na banjaru Ihirailu mbàda tu-munyaka banjaru wikimu lundu nu - nu, tàka nyumu dou MIRI, Alada nyuda-kauka.
25Tàka nàhu dou MIRI Ala, màla àru kau paundu-nya na ràndi na pambàda wundamu na manggàna-ya na wikinggu nyungga dàngu wàla wuanggu. Màla àru kau pa-langatàka-nya jàka nggàraya na pambàda ràndimu. 26La nggi - nggini na-pabokulu mànuya tau napa na tamumu tàka hi dapanii, ‘I MIRI Mahupu-mbiha Nyuna Ala la Ihirailu-ya,’ wàda. Na haàtu welingu la wàla wuanggu napa lundu nu - nuya ba na-pareta-ya yiana na banjaru. 27MIRI Mahupu-mbiha! Hi kutoru mbeni pawotu-nggaunya yiana na hamayangu-nggu, nadu ba Nyumu wiki-madu ma-wàlahu-ngganya ba jiaha da ana umbuku-nggu handalaru handàdiku da pawotu-mu la pa-hanganji-nya yiana na banjaru.
28Dou MIRI Mahupu-jangga, jiakau Nyumu Ala; mbuu ndàbada da paràndi-mu mu-patutu-nja, dàngu na ngerana nuna na ma-manandangu mbàda ràndi-munyaka lai nyungga. 29Jia ba tuna, ku-kamahi-nggau, màla àru kau pa-kanyuru-ha da wàla wuanggu ka nua naingu-na napàda-danya na mbuha-munja. Dou MIRI Mahupu-mbiha, nuda mbuu ndàbada mbàda ràndi-munyaka, da wàla wuanggu napa pa-kanyuru pangala-munjaka lundu nu - nu,” wàna.
@LAI 1995 Indonesian Bible Society (Lembaga Alkitab Indonesia)