2 HAMUILU 23
23
Da hupu liina i Ndautu
1I Ndautu anana i Ihai napindi-ya la pa-hanganji dàngu na-bohuru pa-bokulu-ya paraïna na Alana i Yakupu. Nyunamai na ma-pandoi-ha da ludu hangia - hangia ndumana na Ihirailu. Yiada-haka da hupu liina i Ndautu da ma-malamiri dehi:
2Na Ngahuna i Miri mbàda panii-naka la ngarunggu nyungga;
na lii langu dàngu na lii panaungu-na la tàda ngaru-nggunya.
3Na Alana i Yakupu mbàda panii-naka;
na ma-katindi-ya na Ihirailu napanii-ngga nyungga,
“Na hanganji na ma-pareta rayatu wàngu mamola
na ma-pakapipi wàngu karadaku-na lai MIRI,
4Nyuna hama tuna harii pabarahu ma-tambàkahu-ya
la harii mbaru ba na-habola na awangu.
Nyuna hama tuna taraku lodu la malàna urangu
na ma-pamuru-ya na rumba hi na-kalilangu,” wàna.
5Tuna numbu ba na-pakanyuru-ha da wàla wuanggu i Ala,
na paràndi-na lai nyungga nda na-panjilu-nya,
na ràndina na-padaingu dàngu na-lundungu,
na-lànyapu la mbulu ndàba-naka.
I Ala jiaya na matanggu-nya na talunggu
dàngu na-patutu hàlanya na pawuku etinggu.
6Tàka da tau manda karadaku lai MIRI
hama tuna rii madàka pa-kawukangu-ha.
Na lima tau nda na-torungu-a pa-yopulu-ha;
7nda ningu haàtu mabihu pa-jonggaru-ha
jàka nda pawànja ai jàka ndia bàhikai.
Da tau nuda dambuta na-pakehi-ha epi.#Ndalaru 6-7 nda na-lohangu-a na hilu Imbarani-na.
Da panjuri-na i Ndautu da mawuwa ta muda
(1 L Nd. 11:10-41)
8Yiada-haka ba hapajia-ha da parawira-na i Ndautu da mawuwa tamuda: Na ma-wungangu jiaya i Ihumbaalu, tau Hàkumoni, liku uru “Parawira Pa-katailungu”.#Na hau pa-haleli ndai: Parawira Pa-katailungu; Imbarani: na patailu, wàda. Handàka la hau pa-kangaburungu nalawa-nja da tau walu ngahu, na-pameti hàla-maha ba nawàngu nimbuna.#Talànga wànguna na ihina na-njenjangu ningu-mapa: ba nawàngu nimbuna.
9Na padua wàda la Parawira Pa-katailungu jiaya i Eliahàru anana i Ndondu, welingu la biliku Ahohi. Nyuna natundu-nya i Ndautu ba da-hanobaku-ha da tau Pilitingu da mambàda pauhi la pa-pabera. Tàka ba jia-yaka na-kandulingu-na na pamba Ihirailu, 10i Eliahàru pa-ngalangu-mananya pa-patara hi lupa na-pameti mbutaha da tau Pilitingu, hi lupa nanjili ailulu. Na limana nawàngu pa-halata, hi lupa nda peku pahàla-nanya na hapanda-na. La lodu nuna i MIRI nawua-nja talu manda najaru da tau Ihirailu. Da pamba Ihirailu da ma-kandulingu kawai beli-danyaka la pangia-na i Eliahàru pa-kangaburu, hi da-pahili-ha da kalembi pabera welingu la mameti-ka lai nu.
11Na patailu wàda la Parawira Pa-katailungu jiaya i Hama anana i Anggi, welingu la Harari. Ba na-pauhi na tau Pilitingu la Lehi, la hau woka na mambinu wàngu kambii rara, da pamba Ihirailu dapalai welingu la tau Pilitingu. 12Tàka i Hama daingu patara-mana, hi na pameti-ha dàngu hi natalu-ha da tau Pilitingu, hi lupa na-ngalangu pa-pamàndu-nya nuna na woka. Tuna nu i MIRI ba nawua-nja talu manda najaru.
13-14La hilu hau lodu ba mareni rehi muti-yaka,#Talànga wanguna na ihina na-njenjangu ningu-mapa: ba mareni rehi muti-yaka. da tau matailu welingu la tailu kambulu parawira-na i Ndautu dapuru la liangu Andulàmu. La rehi nu ninya Ndautu la tindingu la liangu nuna. Da tau Pilitingu pa-maüngu-danya la Lolangu Repayimu, tàka na hapamba welingu lai nyuda hanggau-danyaka la Mbetulehimu. 15I Ndautu nanamu-ya na kawindu na talora-na, hi napanii, “Hai-a-ai, ka ningu-aka làti mawua-ngga wai welingu la humuru la lihi pindu bokulu la Mbetulehimu!” wàna. 16Ba darongu-yaka nuna da parawira ka-tailungu da-turuku-ma-a la ma-pauma terangu tau Pilitingu, hi dataku wai welingu la humuru nuna, hàla hi dangàndi-nya i Ndautu. Tàka i Ndautu nda nabihu paunu-nya, na-paliri-maanya la pa-maraku wànya i MIRI. 17Napanii, “Ou MIRI, nda peku-ana ba kuunu-nya na wai yiana, ba beri unu-nggunya na wai riada da tau da ma-pajàmangu lurida!” wàna. Jia-duyaka i Ndautu hi nda ana bihu-mana paunu-nya nuna na wai.
Nuna-duyaka na hàmuda da Parawira Ka-tailungu da ma-kanjupu taraha.
18-19Da tau tailu kambulu parawira da mawuwa tamuda, “Parawira Pa-katailu kambulungu,”#Na hau pa-haleli ndai: Tailu kambulu parawira; Imbarani: Ma-kaborangu pa-katailu-da. wàda-mbunja. Nyuda nu na maliku urunja jiaya i Ambihai erina i Yuàpu, anana i Haruya. Handàka na-pameti tau tailu ngahu wàngu nimbuna. Jia-duyaka hi nawuwa. Tàka na nyuna nda natoma-aha da “Parawira Pa-katailungu.”
20Na hili haàtu parawira na mawuwa, jiaya i Mbanaya anana i Yuyanda, tau Kàpuheyilu. Kanjupu taraya. Tau madua-ha da mini mbeni hanggangu welingu la Muapu da pa-pameti-na. Handàka la hau lodu ba napuru na ura kamba natama nyuna la makubu, hi na-pameti-ya na heu na hinga lai nu. 21Hili handàka na-pameti-ya na haàtu na tau Mehiru, na bai mini bokulu jangga na mambeni wàngu nimbu. I Mbanaya na-hàngapu wànya hapungu-a tokungu. Na nimbu na maninya la limana nuna na tau Mehiru nawàhi-maaya hi na-pameti wànya na tau nuna. 22Nuna-duyaka na ruku tara mbenina na pawàna i Mbanaya, na haàtu welingu la “Parawira Pa-katailu kambulungu.”#Talànga wanguna na ihina na-njenjangu ningu-mapa: Tailu kambulu parawira; Imbarani: Parawira Katailungu. 23La pamba nuna, nyuna-maka i Mbanaya na mangia ngaba, ba tuna ndedi nahama-anja da “Parawira Pa-katailungu.” I Ndautu nawotu-ya nyuna kapala tau mamangga-nya na wikina.
24-39Da anggota-da hawiangu welingu la “Tailu kambulu parawira” jia-duhaka:
i Ahaïlu, erina i Yuàpu
i Elihanàngu, anana i Ndondu welingu la Mbetulehimu
i Hama dàngu i Elika, tau Harutu
i Helihu, tau Paluti
i Ira, anana i Ikihu tau Takua
i Ambiyehiru tau Anatutu
i Membunai tau Huha
i Hàlamongu tau Ahohi
i Maharai tau Netopa
i Helipu, anana i Mbaana tau Netopa
i Itaï anana i Rimbai tau Nggimbia la ngaba kabihu Mbanyamingu
i Mbanaya tau Piratungu
i Hindai, welingu la lolangu Nggaahu
i Ambialumbongu tau Aramba
i Àhamawitu, tau Mbahurimu
i Eliyàmbàhu tau Halambungu
Da anana i Yahingu
i Yunatàngu
i Hama tau Harari
i Ahiamu anana i Haràru, tau Harari
i Elipahelitu anana i Ahambai tau Maaka
i Eliamu anana i Ahitopilu tau Nggilu
I Hehirai tau Kàramilu
i Païrai tau Àrumbi
i Yinggàlu anana i Natàngu, welingu la Homba
i Mbani tau Nggàta
i Heliku tau Amungu
i Naharaï tau Mbaerutu, mangàndi-nya madàka i Yuàpu,
i Ira dàngu i Nggaripu, tau Yetiri
i Uria tau Heti.
Mbuu ndàbada tau tailu kambulu mapihu-ha da panjuri da mambana wuwada.
@LAI 1995 Indonesian Bible Society (Lembaga Alkitab Indonesia)