2 HAMUILU 24
24
I Ndautu ba na-patumbu-ya na diha
(1 L Nd. 21:1-27)
1I MIRI hilu mbeni-nanyai na Ihirailu, hi na-pamanda-nya i Ndautu la pa-patàka-nya ma-kalutu na banjaru nuna. Napanii-nya paraïna i MIRI, “Patumbu-ya na diha nggubulu la Ihirailu dàngu Yahunda,” wànanya. 2Ka panii-nanyaka i Ndautu lai Yuàpu, na ngora tanatara-na, “Lua karia-njawa da parawira-mu, la mbuu ndàbada da kabihu Ihirailu la nggubulu-na na tananda kau wundaya na diha. Ka kupinya nggubulu-na na tau wànggu,” wàna.
3Tàka nanapa-ya i Yuàpu la hanganji, “Mili àru i MIRI na Alamu Tamu umbu ka na-pambira wundangu pabonja-ya na tau Ihirailu ka lupa na-pahangahu wundangu welingu la nggubulu-na nàhu, dàngu mili àru nyumu Tamu umbu ka pa-daingu luri-mupa ka peku ita-munya. Ba tuna nggàra lingu-naka nu hiu patiki-nya yiana na diha?” wànanya. 4Ba tuna na hanganji pa-daingu kata undu-mananya na pareta-na, jia-duyaka i Yuàpu dàngu ba hapajia-ha da parawira-na, hi dalaku la padiha-ya na banjaru Ihirailu.
5Ba dapala-yaka na Luku Yorundangu, i Yuàpu dàngu da tau la wawana da-pamaüngu la mbara luru welingu la Arowiru, na paraingu la padua lolangu la ngabana na Nggàtu.#Talànga wanguna na ihina na-njenjangu ningu-mapa: Arowiru ... Nggàtu. Welingu lai nu hi dalaku hu dia, la Yaehiru, 6hi da-pangalangu la Nggiliatu dàngu la Kandihu la ngaba tau Heti.#Na hau pa-haleli ndai: Kandihu, la ngaba tau Heti; Imbarani: la tana Tahatimu, Hòtuhi. Tunaka nu hi dalaku la Ndàngu, dàngu welingu la Ndàngu hi da-wikitu hanggangu la#Talànga wanguna na ihina na-njenjangu ningu-mapa: dàngu welingu la Ndàngu hi da-wikitu hanggangu la. patama lodu, la Hindungu. 7Welingu lai nu dalaku hu luru la Tiruhu na paraingu maningu tindingu. Na pangalangu-na laku-danyaka la mbuu ndàbada da paraingu tau Hewi dàngu tau Kanaàngu, hi da-panjàpu-ya la Mbiruhemba, la ngaba Yahunda mbara luru. 8Nyuda danjada-nya nggubulu-na nuna na tana hiwa mbua wulangu dua kambulu loduda. Hàlaka nu beli-danyaka la Yeruhali 9hi da-wàlahu-nya na hanganji na pangala-da la diha nuna. Nggubulu-na na mini na ràka ma-palaku-ya na ndihi tanatara ningu tau 800.000-ya la Ihirailu dàngu 500.000-ya la Yahunda.
10Tàka ba nahàla-ka i Ndautu pa-palundu-nya na diha, pàda-nanyaka na njalana, hi napanii-nya i MIRI, “Ou MIRI, kanjupu njala-ma-kaka! Jàma àrunya na njalanggu, nadu nuna na pawunda-nggu manduba ailulu-ya,” wàna.
11-12I MIRI napanii-nya na Wunangu Nggàtu, na matanggu palua maingu lai Ndautu dàngu lai MIRI, “Luawa kau paniinya i Ndautu, Nyungga kuwua-nya tailu ngia papindi-na. Nggàra biaya na papindi-na kuwunda-maya napa,” wàmu, wànanya. Hadangu harii ba na-pawàla-ka i Ndautu welingu la katuda-na, 13tàka-nanyaka na Wunangu Nggàtu pa-hurungu la hanganji hi na-patàka-nya na pareta-na i MIRI, “Nggiya na papindi-mu Tamu umbu: Na tana yiana ka natuya rimbangu la dalu tailu#Da pa-haleli ndai da manda pirada: tailu; Imbarani: pihu. mbua ndaungu, jàka ndia nyumu Tamu umbu kau palai ba nakeha-nggau muhu la dalu tailu mbua wulangu, jàka ndia na tana yiana ka nanggàna-ya tàparu la dalu tailu mbua lodu? Bota memaya nàhu jàka nggàra-yaka bàdi na pa-patàka-nggunya i MIRI,” wànanya.
14Nahema i Ndautu, “Ai-inai ura dedi-nggunyaka! Welingu ba nahuku-ngga angunda patau, narihi hàmupa nyuta mbuu ndàbanda ka nahuku-nda i MIRI bia, nadu ba na-bokulu-du na paaï pa-namungu-na,” wàna.
15Hàlaka nu i MIRI na-patàka-nya na hidu pa-nggàbalungu la tau Ihirailu piti weli la mbaru nu lupa la rehi na pambàda kawuku-na. La nggubulu Ihirailu tau 70.000-ya na mameti. 16Na papalewa-na i MIRI na mangàndi pameti wàngu mbàda tàkana-ka la ngia pa-parina manguna i Arauna, tau Yembuhu. Ba naita-yaka paraïna i MIRI na papalewa ba mbàda hawanjiru-naka la pa-patàlaru-ya la Yeruhali, i MIRI na-panjilu-nya na botangu-na tàka hi na-pànjangu la pahuku-nya na banjaru nuna. Hi napanii-nya na papalewa, “Jiaka! Pànjangu-wa!” wànanya.
17I Ndautu naita-maya na papalewa na ma-pameti-ya na rayatu, hàla hi napanii lai MIRI, “Nyungga-maka manjala ba nyunggama ma-pandoi-ya na manjala yiana. Tàka nggàra-yaka na njalana duna yiana na banjaru na ma-manjurangu? Huku biangga nyungga dàngu kuru umanggu!” wàna.
18La lodu nu-ma i Nggàtu ba namai pa-hurungu lai Ndautu hi napanii-nya, “Màla làti Tamu umbu kau hei dita la ngia pa-parina uhu nggàndumu manguna i Arauna, kau pahadangu lai nu ngia pawotu maraku ndumana i MIRI,” wànanya. 19Ka laku-nanyaka i Ndautu pa-namatu-nya na pareta-na i MIRI na pa-patàkangu lai nyuna la ngaruna i Nggàtu. 20Jia pàkuya ba talànga ngaduna hu wawa nyuna i Arauna, hi naita-ya na hanganji dàngu da ma-karia-nya ba maidanya lai nyuna. I Arauna na-marubuku la hanggana i Ndautu, 21tàka hi na-paàrangu, “Nggàraya na pawuku-mu Tamu umbu hiu mai?” wànanya.
Nahema i Ndautu, “Mainggunya pakeiya yiana na ngia pa-parina-mu uhu nggàndumu, ka pahadangu ngia pawotu maraku ndumana i MIRI la yiahu ka najiaka wàngu yiana na hidu pa-nggàbalungu,” wànanya.
22Napaya i Arauna, “Piti biaya duna hi Tamu umbu kau maraku-nya lai MIRI, nggàraya na mahàmu ba wàmu. Yiada-haka da hapi da patu kameti, dàngu ka pa-mutungu wàngu bia tandai luku dàngu da kapambalu pa-pàmbalungu wàngu uhu nggàndumu,” wàna. 23Nyuna i Arauna nawua hàla-maha la hanganji,#Talànga wanguna na ihina na-njenjangu ningu-mapa: la hanganji; Imbarani: la hanganji, na hanganji. hi napanii, “Màla àruki i MIRI na Alamu Tamu umbu, ka na-kataku-ha da maraku-mu Tamu umbu,” wàna.
24Nahema na hanganji, “Ndia-a! Keiya wàngguma duku. Nda kubihu-a duku pa-maraku-nya kameti maraku pangala juangu lai MIRI Alanggu,” wàna. Ka kei-nahaka i Ndautu nu na ngia pa-parina uhu nggàndumu dàngu da hapi wàngu lima kambulu àmahu bara. 25Hàlaka nu pa-hadangu-nanyaka ngia pawotu maraku lai nu i Ndautu ndumana i MIRI, tàka hi nawotu kameti maraku patunu dàngu kameti maraku pa-papeku wàngu. I MIRI na-kataku hàmuya na hamayangu-na i Ndautu, hi na-pànjangu nuna na hidu pa-nggàbalungu la Ihirailu.
@LAI 1995 Indonesian Bible Society (Lembaga Alkitab Indonesia)