2 HAMUILU 22
22
Na ludu taluna i Ndautu
(Paml. 18)
1Ba nahàla-ka i MIRI pa-pamara-ya i Ndautu welingu lai Haulu dàngu la muhu - muhu-naka hawiangu, wunda-nanyaka i Ndautu na ludu yiana ndumana i MIRI:
2[Kumbuha-nggau Nyumu, ou MIRI,
jiakau Nyumuma na kapàru-nggu.]
3I MIRI hama tindingu kapàru-ya
ngia paini-nggu.
Na Alanggu hama palindi watuya,
ngia pa-pamaü-nggu.
Hama tuna temingu-ya ba na-pandàda-ngga,
dàngu namangga-ngga ka ku-mandangu mànu.
4Kuwara-nya i MIRI na paràka pa-wotungu,
na-pahàla-ka Nyuna welingu la muhunggu.
5Na-winggiru-ngga hanggàmaru pameti wàngu
dàngu na-lumburu-ngga iwa manjurangu.
6Na-winggiru-ngga manjurangu pameti wàngu,
na oka kahili-na na meti ninya padua la hangganggu.
7La dalu handuka-nggu kuwara-nya i MIRI,
ku-kaladaku la Alanggu pakarai pa-ndulangu.
Welingu la Umana na patingi-nya na talia liinggu
dàngu naeti wànya na waranggu.
8Hàla hi na-yoyangu dàngu na tandidu na tana,
da lata palindi danggoda dàngu da-kandàndaku
ruku hànggana i Ala!
9Na kutungu na-hamburatu welingu la kubu uruna,
na epi dàngu na wàla epi na-tapanjiru welingu la ngaruna.
10Nabika-ya na awangu, hàla hi napuru Nyuna,
wàngu karumangu kapàtangu la lumbu wihina.
11Na-hawurungu Nyuna ba na-kaliti patau awangu;
nahiri la pinu ruu kàpa ngilu.
12Nyuna na-palumburungu wikina wàngu kapàtangu;
na karumangu kapàta mitingu na-winggiru-nya Nyuna.#Da pa-haleli ndai da manda pirada: karumangu kapàta mitingu na-winggiru-nya Nyuna.
13Welingu la kajilaku kabilaku la hanggana,
luhu-nanyaka na karumangu, na ura watu mboka dàngu na epi.
14Ka kangguruku-nanyaka i MIRI welingu la awangu,
i Mahupu-jangga na parongungu-ya na talia liina.
15Na-pahàla-nja da panana,
hi na-paiha nggangganja da muhu.
Na pahàla hili weli - hili welinya na kabàla-na
hi kiri palaida nyuda.
16Na lata tehiku na-hakubu, na lata pinu tana na-tabunggahu
ba jiaya na kayàka-nanya na muhuna wàngu hànggana i MIRI.
17Weli ditangu i MIRI na-pajolangu limana;
nayàpa-ka tàka hi nabinda-ka welingu la wai manjolungu.
18Na-pamara-ka welingu la muhu ma-kaborangu
dàngu welingu la tau da-mapaumbi-ngga
nadu ba darihi kapàru welingu lai nyungga.
19Nyuda da-ràkapu-ka ba nanggàna-ka manjurangu
ba tuna i MIRI jiaya na mandula-ka.
20Nyuna na-pahàla-ka welingu la hanggàmaru
tàka hi na-pamara-ka ruku mbuha-nangga.
21I MIRI na-palimba-nya na pawunda-nggu na ma-padeningu;
na-pakanyuru-ngga ba nda kunjala.
22Nyungga ku-karadaku la pareta-na i MIRI,
dàngu nda ku-pambelingu welingu la Alanggu.
23Mbuu ndàbada da ukuna kueti wànja,
da pareta-naka nda ningu palànja-nggu.
24Nyuna napi-mangga ba nda ningu nyuranggu
dàngu ba ku-pamaraungu wikinggu welingu la njala.
25I MIRI na-palimba-nya na pawunda-nggu na ma-padeningu
nadu ba napingga ba nda kunjala.
26MIRI, la tau ma-tuturu Nyumu mu-tuturu-mai dumu
dàngu muhàmu la tau#Talànga wanguna na ihina na-njenjangu ningu-mapa: tau; Imbarani: tau ma-kapàru. hàmu.
27La tau ma-matua mu-palohangu wikimu ba umatua,
tàka na tau na ma-akatu mupapa-nya.
28Na tau karàda eti mu-pamara-ya;
tàka na tau jangga eti mu-pawawa-ya.
29Nyumu mu-paroka-ya na palita-nggu;
na MIRI Alanggu na-paharii-ya na kapàtangu-nggu.
30Nyumu mu-paàtalu-ka la pa-patàlaru-ya na muhu;
wàngu pa-ndulangu-na na Alanggu ku-bàriku ngia pa-torungu muhu.
31Na pawunda-na i Ala na-lànyapu,
ràka pawaiha da paràndi-naka!
Nyuna hama tuna temingu-ya
nduma mbuu ndàba tau na ma-handera lai Nyuna.
32Nadu ba jiaya i MIRI-a na Ala;
jiaya i Ala-a na ma-kahiri-ta nyuta.
33Jiaya Nyunama na Ala na ma-paàtalu-ka nyungga
dàngu na-pamambiru#Talànga wanguna na ihina na-njenjangu ningu-mapa: na-pamambiru.-ya na àndanggu.
34Na pa-kapànduku-ha da wihinggu hama tuna wihi ruha,
dàngu namangga-nya na malundungu-nggu la ma-palindingu.
35Nyuna na-pandàma-ngga la pa-pabera,
hi peku pandàngi-nggu pàndi pana ma-màndungu halawàla.
36MIRI, Nyumu muopa-ngga dàngu mu-pamara-ka,
dàngu mutula-ngga wàngu mbihamu
kurihi meha rukuna na pawunda-mu.
37Mumangga-ngga ka àmbu ku-tanawangu
dàngu hi ndedi ku-handàkangu-ma panjoru.
38Kuyaulu-ha da muhunggu lupa kutalu-ha,
nda hidama pa-kandulingu lundu da-tàlaru.
39Ku-ndakilu-nja hi lupa nda da-hadangu beli,
da-tanulahu la wihinggu hi nda da-pawidi.
40Nyumu muwua-ngga kapàru la pa-pabera,
dàngu la patalu-ha da muhunggu.
41Mu-pawiti-nya hi dapalai-ngga muhunggu;
da tau ma-paumbi-ngga ku-patàlaru-ha.
42Nyuda da-kaladaku, tàka nda ningu mandula-ha,
dawara lai MIRI, tàka nda nahema-aha.
43Ku-palàjaru-ha hi hama kumburu tana ma-tanyalangu,
kuwari-ha hama kapihaku la ànda.
44Mu-pahàla-ka welingu la banjaru ma-katadaku,
hi mu-panjadi-ka ma-kuaha-ha da banjaru;
na banjaru panda tandanggu làti, danjadi-haka atanggu.
45Da tau hangàdangu danyàku lai nyungga,
da-patundungu ba darongu-ya na pareta-nggu.
46Na-mbulangu hàla na kaborangu-da;
da-kandàndaku hi daluhu#Talànga wanguna na ihina na-njenjangu ningu-mapa: kandàndaku hi daluhu; Imbarani: daluhu hi da-hawaritu pa-pabera. welingu la tindingu-da.
47I MIRI naluri! Pawotungu-ya na ma-kahiri-ka!
Pa-mangunju-yawa na bokulu-na i Ala na ma-pamara-ka!
48Nawua-ngga patalu wàngu hanggangu la muhunggu,
dàngu na-panyàku-ha da banjaru la hangganggu,
49na pamara-ka welingu la papa-ngguka.
MIRI, muwua-ngga patalu wàngu hanggangu la muhunggu,
muopa-ngga welingu la tau mambana eti.
50Jiaya hi ku-pamangunju-kau la hongada da banjaru,
dàngu ku-ludungu lodu wotungu lai Nyumu.
51I Ala nawua-nya talu manda najaru na hanganji pawotu-na,
na-padaingu na mbuha-nanya na tau papindi-na,
nu i Ndautu dàngu wàla wuana
lundu nu - nu.
@LAI 1995 Indonesian Bible Society (Lembaga Alkitab Indonesia)