Yorhaq 21
21
Zaqlanr Shif Ghaq-anr Bimawr-euq
1Khoernar-aq, Deqbeqlir lan landzer, Yeqsur, zaqlanr deuq-anr tiq pov parbi mawr-euq mae. Aqyawf, aqyawf-euq mawrdo bimawr-euq garkawv-aq heulof-aer mae. 2Sirmoq Beqtuvluv, Zaqdzm laer kur-eu Tormav, Gaqliqlaer mirkhanq-euq Gaqnaq tsawrhaq Naqdaqneqlar, Zeqbeqdaer-euq zaqyo nyiq ghaq hawr-eu zaqlanr nuideuq nyiq ghaq, aqyawfmaf tiqgar taef-aer jawrluf-eu mae. 3Sirmoq Beqtuvluv, aqyawf maf-anr aernaeq-eu, “Ngar, za dzae-ir ma.” Khoerngae, aqyawfmaf, aqyawf-anr aernaeq-eu, “Nga’maf khawf, nawq naeq-aer oe ma.” Khoernar-aq, aqyawfmaf, lawq-anr ur-awr tiqpov taef-aer dov-ir-euq mae. Khoerngae mir, aqyawfmaf ngaqshaq tiqmawr-iq maq dzaemi-aq.
4Uqbya byataw, Yeqsur, lan landzer yawfluf-eu mae. Aerkhawf, zaqlanr deuq, Yeqsur nga laer maq hawsiq-aq.
5Khoerngae, Yeqsur, aqyawf maf-anr aernaeq-eu, “Zaqdeuq-or! Nawmaf ngaqshaq dzaemi-euq ma lor?”
Khoerngae, aqyawfmaf, aqyawf-anr aerkhof naeq-eu, “Maq dzaemi-aq.”
6Yeqsur, aqyawf maf-anr aernaeq-eu, “Nawmaf, lawq-euq armar paw za dzae’anr ghae-awq. Khoerlof-aer dzae’anrghae nar-aq, nawmaf uicuiv dzaemi taef-a.” Khoermirnae, aqyawfmaf za dzae’anrghae ngae, ngaqshaq ghawqmya’ni pafler-euq mirnae, za maq gheudov coer-a.
7Khoerngae, Yeqsur zawr gaq-eu zaqlanr khoerghaq, Beqtuvluv-anr, “Sanqpaq Yeqsur nga” laer aernaeq-euq mae.
Sirmoq Beqtuvluv, Sanqpaq Yeqsur nga laer aer-eu gar yagaq ngae, maeqtsoeq maq dmluf-eu mirnae, paerkhanq paermanr tiq kanr lanrcuf-awr, lan-anr tsawqpuf ghae-euq mae. 8Aerkhawf, zaqlanr nuideuq-aq, lawq lawqzaq-anr ur-awr, ngaqshaq tiqbyanni pafler taq-euq za-anr, lan landzer gheudov laf-euq mae. Aqjeq mirnae aernar-aq, aqyawfmaf jawr-eu khoer-aq, lan landzer-anr nae ghawqmanrni maqkaq-a, 50 lmr aerghaq kaq-eu taef mae. 9Aqyawfmaf landzer davdov ler-euq naeq-aer, khoergar khaqgheuq bawdof taq-euq gar ya’mawr-euq mae. Ngaqshaq taeqba taq-awr, kaqmur khawf jav-eu gar ya’mawr-euq mae.
10Yeqsur, aqyawf maf-anr aernaeq-eu, “Uqsoe nawmaf nae dzaemi-euq ngaqshaq heumyav mawr yurlaf-awq.”
11Khoerngae, Sirmoq Beqtuvluv, lawq-euq lafkhoer urler-awr, ngaqshaq yawhuiq tiqbyanni pafler taq-euq za-anr lan landzer gheudov laf-euq mae. Ngaqshaq yawhuiq khoer dawqtawvluf 153 mawr byan-eu mae. Ngaqshaq khoermyav myav-aer pafler-euq khawf, za khoerkanr maqpyaq-ir-aq. 12Yeqsur, aqyawf maf-anr aernaeq-eu, “Lar-awr shawqhawq dzaqlar-awq.” Aqyawf-aq, Sanqpaq Yeqsur nga laer siqnya-eu mirnae, zaqlanr deuq, aqyawf-anr “Nawr aqsur ghaq le?” laer tiqghaq-iq maq narhaq peuq-a. 13Khoernar-aq, Yeqsur oe-awr, kaqmur yur-awr aqyawf maf-anr bifnaeq-awr, ngaqshaq khawf yur-awr bifnaeq-euq mae. 14Yeqsur, shir-euq gar nae ghofdaef lar-euq nar-aq, aqyawf-euq mawrdo aqyawf-euq zaqlanr deuq-anr bimawr-euq heupov-aq, smq pov tiqpov mae.
Yeqsur, Beqtuvluv-anr Smq Pov Keuvni Narhaq-euq
15Aqyawfmaf shawqhawq dzaqghaq ngae, Yeqsur, Sirmoq Beqtuvluv-anr narhaq-eu, “Yornav-euq zaqyo Sirmoq-or! Nawr heudeuq-anr navmaqtser ngaq-anr gaq ma lor?”
Beqtuvluv, aqyawf-anr aerkhof naeq-eu, “Gaq ma Sanqpaq-or! Ngar, nawq-anr gaq-eu nawr siqnya mae.”
Yeqsur, aqyawf-anr aernaeq-eu, “Ngaq-euq yawrzaq deuq-anr bidzaq bidawr-awq.” 16Yeqsur, aqyawf-anr nyiq pov tiqpov par narhaq-eu, “Yornav-euq zaqyo Sirmoq-or! Nawr, ngaq-anr gaq ma laq?” Khoerngae, Beqtuvluv par aerkhof naeq-euq, “Gaqma Sanqpaq-or! Ngar, nawq-anr gaq-eu nawr siqnya mae.” Yeqsur, aqyawf-anr aernaeq-eu, “Ngaq-euq yawrdeuq-anr bosav-awq.”
17Yeqsur, aqyawf-anr smq pov tiqpov par narhaq-eu, “Yornav-euq zaqyo Sirmoq-or! Nawr, ngaq-anr gaq ma lor?” “Nawr, ngaq-anr gaq ma lor?” laer Yeqsur, aqyawf-anr smq pov narhaq keuvlaf-euq mirnae, Beqtuvluv noeqshaq lar-awr, aqyawf-anr aerkhof naeq-eu, “Sanqpaq-or! Nawr, yawqjeq navluf siqnya-eu mae. Ngar, nawq-anr gaq-eu nawr siqnya mae.” Yeqsur, aqyawf-anr heulof-aer aernaeq-euq mae, “Ngaq-euq yawrdeuq-anr bidzaq bidawr-awq. 18Ngar, nawq-anr aqdirma-aer aernaeq nyar, nawr zaqguq ngae, yawqhar yawqha jofpaf paf-awr, khar irmawf-eu gar ir-eu mae. Aerkhawf, nawr mawq-ir ngae, nawr aqlaf cawqja-awr, aqcawq, nawq-anr jofpaf pafnaeq-awr, nawr maq irmawf-eu gar sheuqghae naeqlaf taef-a.”
19Yeqsur khoerlof-aer aer-eu-aq, Miqyaer-euq yawshaef khanqsaer za’ni, aqkar Beqtuvluv aqjox-aer yashir-eu garkawv-anr toeqmaeq mawf-eu mae. Khoerlof-aer aerghaq-euq nar-aq, Yeqsur, Beqtuvluv-anr aernaeq-eu, “Ngaq-euq maeqnan cantae lar-awq.”
Yeqsur Zawr Gaq-eu Zaqlanr Khoerghaq-euq Garkawv
20Beqtuvluv nanrghof ghofhaw ngae, Yeqsur zawr gaq-eu zaqlanr khoerghaq cantaelaf luf-eu gar ya’mawr-euq mae. Zaqlanr khoerghaq-aq, cifhawq dzaqtaf ngae mir, Yeqsur-euq khanq-anr khawqdar-awr, “Sanqpaq-or! Nawq-anr anqdzaq-eu aqsur ghaq la?” laer narhaq-euq khoerghaq mae. 21Beqtuvluv khoerghaq-anr ya’mawr ngae, Yeqsur-anr narhaq-eu, “Sanqpaq-or! Teughaq-anr lawr nae, aqjeq ya pyeuflar-eu la?”
22Yeqsur, aqyawf-anr aernaeq-eu, “Ngar ghofle ngae keuvni, ngar, aqyawf-anr bi jawrmawf nar-aq, nawq-anr aqjeq taf-eu la? Nawr-aq, ngaq-euq maeqnan cantaelaf nar-aq ghaq-ar.”
23Khoermirnae, zaqlanr khoerghaq maqya shir-a jer laer aqyuif aqnyir deuq-euq ghanrcae jabyan taq-euq mae. Aerkhawf, Yeqsur, zaqlanr khoerghaq maqya shir-a laer aermawf-eu maqngeur-a. “Ngar ghofle ngae keuvni, ngar, aqyawf-anr bi jawrmawf nar-aq, nawq-anr aqjeq taf-eu la?” laer aer-eu taef mae.
24Zaqlanr khoerghaq-aq, garkawv heudeuq sarkir kamq-awr, bof-euq ghaq mae. Aqyawf-euq sarkir-aq, tsaq-awr dawr-eu mae laer nga’maf siqnya ma.
25Yeqsur nae mr-euq gar ghawqmya’ni javganq-a siq. Aqyawf nae kharmr kharshar-euq garkawv, aqyawf kawv aqyawf-aer boftaq lawnmr-aq, bofdov taq-euq sanqbof pardmq khoerdeuq, mirtsaq-euq khoertav khawf maq derler-ar laer ngar noeq mir-a. Aqmeq.
Цяпер абрана:
Yorhaq 21: AKA
Пазнака
Падзяліцца
Капіяваць
Want to have your highlights saved across all your devices? Sign up or sign in
2018 ©
Bibles International ®
The Bible Society of Baptist Mid-Missions