Ghaqkhaer Jashaw-eu Dawq
Jashaw-eu Dawq
Yaerbof yawoer-euq lafkhoer Meqsirya-euq garkawv, Miqyaer gharduq ngaeqdan taq-euq mae. Iqsaqyar, Meqsirya-euq gar mr-eu Yurdav tsawrhaq-euq gharduq taef-aer maqngeur-eu aqcawq tsawrjeuq-euq gharduq khawf, mr taef-a laer aertaq-euq mae (Isy 42:1-7; 49:1-7). Yeqsur, mirtsaq-euq khoertav canluf ngae-aq, myaqmyaqni Yurdav tsawrhaq naeq-aer jawr-awr mr-euq mae. Aerkhawf, Ghaqkhaer sanqbof-euq lafkhoer Yeqsur, aqyawf-euq gar aqcawq tsawrjeuq tsawrca-anr mrkeuv-ir-euq garkawv boftaq-euq mae. Beqdeqgordeq yawbui bui-eu arnan-anr, Yeqsur Kali, Kalizaq-euq khoertav aqyawf-euq muiq-eu Saflar shaevka lef-awr, mirtsaq doeni khaerdov ghae-euq mae. Ghaqkhaer sanqbof deuvzaq yawbae deuv-anr boftaq-euq lof-aer, Ghaqkhaer sanqbof heu-aq, Tawrpirlu-anr tsaqtsov-awr bofnaeq-euq, Lurkaf nae bof-euq sanqbof nyiq pur tiqpur mae. Aqcawq tsawrjeuq tsawrca Kalizaq armur-anr ghaq bif-eu gharduq, sanqbof heupur-euq lafkhoer yawbae zir-euq Kalizaq armur-euq zirga dzanrga, A.D. 30-60 khof-euq yawkaq-anr pyeuflar-euq garkawv deuq boftaq-euq mae. Lurkaf, Ghaqkhaer sanqbof A.D. 61 khof-anr bof-euq ngeur-eu dur.
Ghaqkhaer sanqbof-aq, aqcawq tsawrjeuq Kalizaq geuflar-awr, Kalizaq armur aqjox-aer baelar-euq la laer yagaq ngae ghawqmya jeq narhaq mawf-eu deuq-anr aerkhof-eu sanqbof pyeuf-eu mae. Ghaqkhaer sanqbof, Yeqsur Kali yashir-awr bi bafpanq-euq gar nae ghofdaef lar-euq garkawv, arnavni huiq-eu garkawv pyeuf-awr aqdui-anr aqjox-aer taf-eu la laer toeqmaeq naeqlaf-eu mae. Khoeruqtaf, Yurdav-euq zanr hawr-eu Kalizaq aqjox-aer taf-eu la laer khawf jashaw naeqlaf-eu uqtaf, Yeqsur Kali-anr jan-eu mirnae, Yurdav tsawrhaq hawr-eu aqcawq tsawrjeuq tsawrca-euq tsawrhaq tiqpaeqzaq pyeuflar-euq la laer khawf toeqmaeq naeqlaf-eu mae. Ghaqkhaer sanqbof-euq lafkhoer, Kalizaq jan-eu jeq-aq Lormav mirkhanq-euq dzoeqdzaq-anr puiq-eu zanr maqngeur-a laer Lurkaf toeqmaeq-awr, mirtsaq doeni Yeqsur Kali-anr jan-eu heu irkeuv-euq zirga dzanrga boftaq-euq mae.
Lurkaf, Ghaqkhaer sanqbofbof ngae, Kalizaq geuflar-euq tsawrhaq jawr-eu mirtsaq mircoer-anr dawqpaeq taq-awr nae boftaq-euq mae. Khoer-aq, Ghaqkhaer 1:8 lafkhoer, Sanqpaq Yeqsur nae aqyawf-euq zaqlanr deuq-anr dawq bif-euq gar tsaq-eu mae. Lurkaf, sanqbof heupur kof pav birpav-awr arsaq saqler-eu gar dawq uqdzan boftaq-euq mae (Ghkh 6:7; 9:31; 12:24; 16:5; 19:20; 28:30-31). Birpav taq-euq kof pav heulof-aer mae: Yeqlursaqlaeq (Ghkh 1:1-6:7), Yurdav, Gaqliqlaer hawr-eu Saqmaqliv (Ghkh 6:8-9:31), Aqdirawq (Ghkh 9:32-12:24), Aqsir mircoer (Ghkh 12:25-16:5), Aerjir iqmalavshav ganqkaq (Ghkh 16:6-19:20), Lormav (Ghkh 19:21-28:31).
Ghaqkhaer sanqbof arsaq saqlar-eu pav-anr haw ngae, Yeqsur Kali-euq gar ya mrdav lef-eu nga laer mawrlar-eu mae. Aqdir ya’aer nar-aq, Yeqsur Kali iqnan keuvni aqyawf-euq Saflar, aqyawf-euq dawq hawr-eu aqyawf-euq zaqlanr-anr ghoe-awr nae, aqyawf-euq armur bi dovlar bi huiqlar luf-eu mae (Ghkh 13:47; Isy 49:6).
Ghaqkhaer Sanqbof-euq Mawrkawr:
I. Yeqlursaqlaeq meuq-anr jawr-eu Sanqpaq Yeqsur-euq zaqlanr deuq (Ghkh 1:1-6:7)
II. Yeqsur-euq zaqlanr, Yurdav, Gaqliqlaer hawr-eu Saqmaqliv-anr maeqkeuv-ir-euq (Ghkh 6:8-9:31)
III. Yeqsur-euq zaqlanr, Aqdirawq meuq-anr maeqkeuv-ir-euq (Ghkh 9:32-12:24)
IV. Yeqsur-euq zaqlanr, Aqsir mircoer-anr maeqkeuv-ir-euq (Ghkh 12:25-16:5)
V. Yeqsur-euq zaqlanr, Aerjir iqmalavshav ganqkaq-anr maeqkeuv-ir-euq (Ghkh 16:6-19:20)
VI. Yeqsur-euq zaqlanr (Pawrluv) Lormav meuq-anr maeqkeuv-ir-euq (Ghkh 19:21-28:31)
Цяпер абрана:
Ghaqkhaer Jashaw-eu Dawq: AKA
Пазнака
Падзяліцца
Капіяваць
Want to have your highlights saved across all your devices? Sign up or sign in
2018 ©
Bibles International ®
The Bible Society of Baptist Mid-Missions