Yorhaq 20
20
Yeqsur Ghofdaef Lar-euq
Mt 28:1-8; Mk 16:1-8; Lk 24:1-12
1Tiqjaw-euq lafkhoer yawbae ngae nan, uqbya maqbya lar-euq minav-aer, Maqliv Maqgaqdaqlar, lmqbymr-anr ir-euq mae. Aqyawf irkeuv ngae, lmqbymr-euq ghaqkhaeq-anr ngawqtsoeq taq-euq khaqlo khoersiq ngawqdzae taq-euq gar ya’mawr-euq mae. 2Khoermirnae, caevghof laf-awr, Sirmoq Beqtuvluv hawr-eu Yeqsur zawr gaq-eu zaqlanr khoerghaq jawr-eu gar le-awr aer-eu, “Aqcawq, Sanqpaq Yeqsur-euq mawrdo, lmqbymr-anr nae bafdov ghae-euq nga. Aqyawfmaf, aqyawf-anr aqgeugar baftaq-ir-euq nga laer nga’maf maq siqnya nya.”
3Khoerngae, Beqtuvluv dov-ir-awr, zaqlanr yawqghaqyawq khawf dov-ir-awr lmqbymr-anr ir-euq mae. 4Aqyawfnyaf tiqkawv lof-aer caevghae-euq khawf, zaqlanr khoerghaq, Beqtuvluv-anr caevdzeur-awr, lmqbymr-anr jeqhu caevkeuv-euq mae. 5Aqyawf awkhof-awr lafkhoer cuhu ngae, sheqsha saqpar khoergar jav-eu gar ya’mawr-euq mae. Aerkhawf, aqyawf, lmqbymr-euq lafkhoer maq urler-aq. 6Khoerngae, Sirmoq Beqtuvluv oekeuv-awr, lmqbymr-euq lafkhoer urler ngae, aqyawf sheqsha saqpar khoergar javluf-eu gar ya’mawr-awr, 7Yeqsur-euq uqduq-anr lanrcuf-euq parjae, sheqsha saqpar naeq-aer tiqgar taef-aer maqjavni, byavtaq-awr yawqgaryawq jav-eu gar ya’mawr-euq mae. 8Khoerngae, lmqbymr-anr jeqhu caevkeuv-euq zaqlanr khoerghaq khawf urler-awr ya’mawr-euq mirnae jan-euq mae. 9Khoerngae keuvni, Yeqsur shir-euq gar nae ya ghofdaeflar mae laer, Yaerbof-euq lafkhoer boftaq-euq gar aqyawfnyaf maq siqnya-aq siq. 10Khoernar-aq, zaqlanr khoer nyiq ghaq yawqha-euq nymr-anr par ghofler-euq mae.
Yeqsur, Maqliv Maqgaqdaqlar-anr Bimawr-euq
Mt 28:9-10; Mk 16:9-11
11Aerkhawf, Maqliv-aq, lmqbymr-euq lafnyir paw yawf-awr ngoerluf-eu mae. Aqyawf ngoerngoer-aer awkhof-awr lmqbymr-euq lafkhoer cuhu-euq mae. 12Khoerngae, maeqtsoeq pyurdeuqni dmluf-eu mqtav ghaqkhaer nyiq ghaq, Yeqsur-euq mawrdo baftaq-euq khoertsanr-anr, uqghmq paw tiq ghaq, kuirbi paw tiq ghaq laer nuirluf-eu gar ya’mawr-euq mae.
13Khoerngae, mqtav ghaqkhaer, aqyawf-anr narhaq-eu, “Zaqmiq aqbur-or! Nawr aqjeq mirnae ngoer-eu le?”
Aqyawf, mqtav ghaqkhaer-anr aernaeq-eu, “Aqcawq, ngaq-euq Sanqpaq-euq mawrdo-anr bafghae-awr, aqyawfmaf, aqyawf-anr aqgeugar baftaq-ir-euq la laer ngar maq siqnya nya.” 14Khoerlof-aer aerghaq-awr, aqyawf nanrghof ghofhaw ngae, Yeqsur khoergar yawfluf-eu gar ya’mawr-euq mae. Aerkhawf, Yeqsur nga laer maq siqnya-aq.
15Yeqsur, aqyawf-anr narhaq-eu, “Zaqmiq aqbur-or! Nawr aqjeq mirnae ngoer-eu le? Nawr aqsur ghaq-anr povluf-eu le?” Maqliv-aq, aqyawf-anr yarkmr mr-eu tsawrhaq jeq nga laer noeq-awr aer-eu, “Aqyuif-or! Nawq nae aqyawf-anr bafghae-euq ngeur nar-aq, nawr, aqyawf-anr aqgeugar baftaq-ir-euq le laer ngaq-anr aernaeq laf-awq. Ngar, aqyawf-anr bafkhof laq-ir ma.”
16Yeqsur, aqyawf-anr, “Maqliv-or” laer kur ngae, Maqliv nanrghof ghofhaw-awr, “Laqbornir-or” laer aqyawf-anr kur-euq mae (Laqbornir laer aer-eu-aq, saqlaq laer aermawf-eu mae).
17Yeqsur, aqyawf-anr heulof-aer aernaeq-euq mae, “Ngaq-anr taq gheutaeq. Aqjeq mirnae aernar-aq, ngar, ngaqDa jawr-eu gar maq ghofdav ler-aq siq. Nawr, ngaq-euq aqyuif aqnyir deuq jawr-eu gar le-awr nae, ‘NgaqDa hawr-eu nawmaf-euq Aqda pyeuf-awr, ngaq-euq Miqyaer hawr-eu nawmaf-euq Miqyaer khawf pyeuf-eu, ngaqDa jawr-eu gar ngar ghofdavler ma’ jer laer aernaeq ler-awq.”
18Maqliv Maqgaqdaqlar, zaqlanr deuq jawr-eu gar ghofler-awr, aqyawf, Sanqpaq Yeqsur-anr ya’mawr-awr, aqyawf-anr aernaeq laf-euq deuq khawf, aqyawf maf-anr aernaeq-euq mae.
Yeqsur, Zaqlanr Deuq-anr Bimawr-euq
Mt 28:16-20; Mk 16:14-18; Lk 24:36-49
19Khoernar-aq, tiqjaw-euq lafkhoer yawbae ngae nan, uqcif paw zaqlanr deuq, Yurdav tsawrhaq-anr guv-eu mirnae, aqyawfmaf uiqler taq-euq jawrduq-euq larghov piqtaeqjir taq-euq mae. Khoerngae, Yeqsur urlar-awr, aqyawf maf-euq ghanrcae yawf-awr aqyawf maf-anr aernaeq-eu, “Nawmaf, nuisar of luf-ur!”
20Khoerlof-aer aerghaq-awr, aqyawf-euq aqlaf hawr-eu byarghar, aqyawf maf-anr bihaw-euq mae. Zaqlanr deuq, Sanqpaq Yeqsur-anr ya’mawr ngae laqkhaqcaer duidui-eu mae.
21Khoerngae, Yeqsur, aqyawf maf-anr par aernaeq-eu, “Nawmaf, nuisar of luf-ur! Aqda, ngaq-anr khaerghae lef-euq lof-aer, ngar khawf, nawmaf-anr khaerghae-eu ma.” 22Khoerlof-aer aerghaq-euq nar-aq, aqyawf maf-euq khoertav saf baw-awr heulof-aer aernaeq-euq mae, “Yawshawr Saflar-anr hageuf-awq. 23Nawmaf nae iqbax pyaeqnaeq-euq tsawrhaq-anr, Miqyaer khawf iqbax pyaeqnaeq taef-a. Nawmaf nae iqbax maq pyaeqnaeq-euq tsawrhaq-anr, Miqyaer khawf iqbax maq pyaeqnaeq-ar.”
Tormav Maqjan-eu
24Ghaqkhaer 12 ghaq-euq lafkhoer keuq-eu Zaqdzm laer kur-eu Tormav khoerghaq, Yeqsur oe ngae aqyawfmaf naeq-aer maqjawr-a.
25Khoerngae, zaqlanr nuideuq, aqyawf-anr aernaeq-eu, “Nga’maf, Sanqpaq Yeqsur-anr ya’mawr-euq ma.”
Khoerngae, Tormav, aqyawf maf-anr aernaeq-eu, “Ngar, aqyawf-euq aqlaf-anr shmrsaeq nae taf-euq marbyawf-anr maqya mawr-aer, ngaq-euq lafnoer nae marbyawf khoer-anr maqya toeqhaw-euq uqtaf, ngaq-euq lafnoer nae aqyawf-euq byarghar-anr maqya toeqhaw-euq khoer-aq ngar maqjan.”
26Khoernar-aq, yaef nan dzeur-ir-awr, aqyawf-euq zaqlanr deuq, nymr-euq lafkhoer par uiqler-awr jawr ngae, Tormav khawf aqyawfmaf naeq-aer jawrluf-eu mae. Aqyawfmaf larghov dawqtawvluf piqtaeqjir taq-awr jawrluf ngae, Yeqsur urlar-awr, aqyawf maf-euq ghanrcae yawf-awr aer-eu, “Nawmaf, nuisar of luf-ur!”
27Khoernar-aq, aqyawf, Tormav-anr aernaeq-eu, “Nawq-euq lafnoer heugar toeqhaw lar-awr, ngaq-euq aqlaf-anr khawf haw-awr, nawq-euq aqlaf cawqlaf-awr, ngaq-euq byarghar-anr toeqhaw-awq. Maq jancoer-aer maqghaeni jan-awq.”
28Khoerngae, Tormav, aqyawf-anr aerkhof naeq-eu, “Ngaq-euq Sanqpaq, ngaq-euq Miqyaer-or!”
29Yeqsur, aqyawf-anr aernaeq-eu, “Nawr-aq, ngaq-anr mawr-euq mirnae jan-eu ngar-a. Ngaq-anr maqya mawr-euq khawf jan-eu tsawrhaq-aq, guiqlanqhuiq taef-a.”
Aqjeq Mirnae Sanqbof Heupur Bof-euq
30Sanqbof heupur-euq lafkhoer, aqdirma-aer Yeqsur nae aqyawf-euq zaqlanr deuq-euq maeqshi mr-euq bisiq bimawr-eu jeq, maq bofanr taq-euq ghawqmya’ni jav-eu mae. 31Aerkhawf, Yeqsur-aq, Kali pyeuf-eu Miqyaer-euq Zaqyo ngar-a laer nawmaf jan-awr, aqyawf-anr jan-eu mirnae, aqyawf-euq tsawrmyanr-euq lafkhoer nawmaf daef-eu jeq za’ni garkawv heudeuq boftaq-euq ma.
Цяпер абрана:
Yorhaq 20: AKA
Пазнака
Падзяліцца
Капіяваць
Want to have your highlights saved across all your devices? Sign up or sign in
2018 ©
Bibles International ®
The Bible Society of Baptist Mid-Missions