Yorhaq 19
19
Yeqsur Yashirni Dartsaev-euq
Mt 27:15-31; Mk 15:6-20; Lk 23:13-25
1Khoernar-aq, Pirlav, Yeqsur-anr bi sheuqdov ghae-awr bijuif-euq mae. 2Guirzaq deuq, aqgan cirni darkhanr khanr-awr, uqdzanq lof-aer dzeuf-awr, aqyawf-euq uqduq-anr nyaefkhov naeq-awr nae, aqyawf-anr nerpuir puir-eu paerkhanq paermanr sheudm naeq-euq mae. 3Khoernar-aq, aqyawfmaf aer-eu, “Yurdav tsawrhaq-euq Sanqpaq zirbaw zirza luf-ur!”
Khoernar-aq, aqyawfmaf, aqyawf-anr aqlaf nae taev-euq mae.
4Pirlav tiq pov par irdov-awr aqyawf maf-anr aernaeq-eu, “Narhaq sher-eq. Ngar, tsawrhaq heughaq-euq lafkhoer yawlaeq tiqjeq-iq maq povmawrnya nya laer nawmaf yasiqni, ngar, aqyawf-anr nawmaf jawr-eu gar sheuqdov lef-euq ma.”
5Khoerngae, Yeqsur-aq, aqgan uqdzanq dzanq-awr, nerpuir puir-eu paerkhanq paermanr dm-awr dovle-euq mae. Pirlav, aqyawf maf-anr aernaeq-eu, “Tsawrhaq heughaq-anr hawsher-eq!”
6Pirma aqyuif deuq hawr-eu lofpir-eu kuirlaf deuq, Yeqsur-anr ya’mawr ngae gur-awr aer-eu, “Aqyawf-anr lafyaq-euq khoertav tafsaef-awq, aqyawf-anr lafyaq-euq khoertav tafsaef-awq!”
Pirlav, aqyawf maf-anr aernaeq-eu, “Nawmaf, aqyawf-anr sheuqghae-awr tafsaef-ir-awq. Ngar-aq, aqyawf-euq lafkhoer yawlaeq tiqjeq-iq maq povmawrnya nya.”
7Yurdav tsawrhaq aerkhof naeq-eu, “Nga’maf zanrdawq jav-eu ma. Nga’maf-euq zanrdawq jav-eu lof-aer nar-aq, aqyawf shir-eu tsaq mae. Aqjeq mirnae aernar-aq, aqyawf-aq, Miqyaer-euq Zaqyo ma laer aer-eu mae.”
8Khoerngae, Pirlav dawq khoerdawq-anr yagaq-awr, yawbae navmaqtser guv-eu mae. 9Aqyawf, guirmaf dzoeqnymr-anr par urler-awr Yeqsur-anr narhaq-eu, “Nawr aqgeugar nae oe-euq le?”
Aerkhawf, Yeqsur, aqyawf-anr tiqjeq-iq maq aerkhof naeq-aq. 10Khoerngae, Pirlav, aqyawf-anr aernaeq-eu, “Nawr, ngaq-anr dawq maq ngaeqcawq lor? Ngar, nawq-anr tafsaef-eu aryaq hawr-eu nawq-anr pyaeqnaeq-eu aryaq jav-eu laer, nawr maq siqnya-eu le laq?”
11Yeqsur aerkhof-eu, “Laftav paw nae nawq-anr aryaq maqbif-euq nar-aq, nawr, ngaq-euq khoertav aryaq tiqpawf-iq maqjav-a. Khoermirnae, ngaq-anr nawr jawr-eu gar sheuqha lar-euq tsawrhaq-aq, nawq-euq navmaqtser iqbax naf-eu mae.”
12Khoerngae nae nar-aq, Pirlav, Yeqsur-anr pyaeqnaeq-eu garma pov-euq mae. Aerkhawf, Yurdav tsawrhaq deuq gur-awr aer-eu, “Nawr teughaq-anr pyaeq nar-aq, nawr-aq, sanqpaq Gaersaq-euq cawq maqngeur-a. Yawqhar yawqha sanqpaq ma laer kharaer-eu tsawrhaq-aq, sanqpaq Gaersaq-anr puiq-eu tsawrhaq mae.”
13Pirlav dawq khoerdawq-anr yagaq ngae, Yeqsur-anr bi sheuqdov ghae-awr, Heqbyaer dawq Gaqbaqdaq laer kur-awr, Khaqlo khawqtaq-euq jawrduq laer kur-eu gar jav-eu yarkhaq dar-eu nuirmanq-anr nuir-euq mae. 14Khoerngae nan-aq, Baqsaqkaq yawbui bui-eu gharduq laeqhmq-eu arnan pyeuf-awr, nanlov caelar mawf-eu mae. Pirlav, Yurdav tsawrhaq-anr aernaeq-eu, “Nawmaf-euq sanqpaq-anr hawsher-eq!”
15Aqyawfmaf gur-eu, “Aqyawf-anr lavsaef byov-awq, aqyawf-anr lavsaef byov-awq! Aqyawf-anr lafyaq-euq khoertav tafsaef-awq!”
Pirlav, aqyawf maf-anr narhaq-eu, “Ngaq nae nawmaf-euq Sanqpaq-anr bi tafsaef le lor?”
Pirma aqyuif deuq aerkhof naeq-eu, “Sanqpaq Gaersaq maqngeur nar-aq, nga’maf sanqpaq nuighaq maqjawr!” 16Khoernar-aq, Pirlav, Yeqsur-anr bi tafsaef-eu laer aqyawfmaf jawr-eu gar bi sheuqghae-euq mae. Khoermirnae, aqyawfmaf, Yeqsur-anr sheuq-awr irdov-euq mae.
Yeqsur-anr Tafsaef-euq
Mt 27:32-44; Mk 15:21-32; Lk 23:26-43
17Yeqsur, aqyawf-euq lafyaq baf-awr, Uqduqkhmq laer kur-eu tsanr-anr le-euq mae. Jawrduq khoertsanr-aq, Heqbyaer dawq, Gawrlaqgawrda laer kur-eu mae. 18Khoergar, aqyawfmaf, Yeqsur-anr lafyaq-euq khoertav taftaeq-euq mae. Tsawrhaq nuideuq nyiq ghaq-anr khawf, aqyawf naeq-aer tiqpaw tiq ghaq-aer, Yeqsur-anr-aq, ghanrcae laer taftaeq taq-euq mae.
19Khoerngae, Pirlav sanqbof bof-awr, lafyaq-euq khoertav tafmyanq taq-euq mae: YURDAV TSAWRHAQ-EUQ SANQPAQ, NAQZAQLAER TSAWRHAQ YEQSUR. 20Yeqsur-anr tafsaef-euq khoertsanr-aq, meuq-euq dawqpae jav-eu mirnae, Yurdav tsawrhaq ghawqmya’ni sanqbof khoer-anr gui-eu mae. Sanqbof khoer-aq, Heqbyaer sanqbof, Lormav sanqbof hawr-eu Heqlaqsar sanqbof nae boftaq-euq mae. 21Khoermirnae, Yurdav tsawrhaq-euq pirma aqyuif deuq, Pirlav-anr aernaeq-eu, “ ‘Yurdav tsawrhaq-euq Sanqpaq’ laer maqngeur-eu, ‘Aqyawf, “Ngar-aq, Yurdav tsawrhaq-euq Sanqpaq ma” laer aer-eu’ mae laer bof-awq.”
22Pirlav aerkhof naeq-eu, “Ngar bofmawf-eu jeq ngar bofdzeur-euq ma.”
23Guirzaq deuq, Yeqsur-anr lafyaq-euq khoertav taftaeq ghaq-euq nar-aq, aqyawf-euq maeqtsoeq yur-awr, oeq bymr bymr-awr nae, tiq ghaq tiq bymr geuf-euq mae. Lafkhoer dm-eu paerkhanq khoerkanr khawf aqyawfmaf yur-euq mae. Paerkhanq khoerkanr-aq, parkhawr maqbaw-aer, tiq kanr kanrlanni zaf-awr zaftaq-euq mae.
24Khoermirnae, aqyawf maf-euq yawkaq ja-eu, “Aqdui, paerkhanq heu maq caeqpyaqni, aqsur ghaq za’nya-eu nga laer shaevtsaqtsaq kar-eur.”
Heu-aq, Yaerbof-euq lafkhoer boftaq-euq dawq heudawq bi byanlar-eu gharduq mae,
“Aqyawf maf-euq yawkaq, ngaq-euq maeqtsoeq lafnyir kanr birgeuf-awr,
Ngaq-euq paerkhanq lafkhoer kanr shaevtsaq tsaqgeuf-euq mae.” (Jc 22:18)
Khoermirnae, guirzaq deuq khoerlof-aer janr-euq mae.
25Yeqsur-euq lafyaq-euq dawqpae aqyawf-euq aqma, aqyawf-euq aqmui, Gaqlawrpar-euq nymrdanq Maqliv hawr-eu, Maqliv Maqgaqdaqlar yawfluf-eu mae. 26Yeqsur-aq, aqyawf-euq aqma hawr-eu aqyawf zawr gaq-eu zaqlanr khoerghaq, aqyawf-euq aqma-euq dawqpae yawfluf-eu gar mawr-awr, aqyawf, aqyawf-euq aqma-anr aernaeq-eu, “Zaqmiq aqbur-or! Haeq, teughaq-aq, nawq-euq zaqyo mae!” 27Khoernar-aq, zaqlanr khoerghaq-anr aernaeq-eu, “Haeq, nawqma-anr hawsher-eq!” Khoerngae yamq-anr nae nar-aq, zaqlanr khoerghaq, Yeqsur-euq aqma-anr aqyawf-euq irkanr-anr sheuqkhof ghae-awr bijawr-euq mae.
Yeqsur Saf Tsaev-euq
Mt 27:45-56; Mk 15:33-41; Lk 23:44-49
28Khoerngae, yawqjeq navluf mrluiv jir-euq ma laer Yeqsur siqnya-awr, Yaerbof-euq lafkhoer boftaq-euq dawq byanlarni aer-eu, “Ngar ircuf maef nya!”
29Khoergar, caermyawvni ghae-eu aqgaf dzaruir tiqbyanni danq-eu ciqcur curzaq tiq siq jav-eu mae. Khoerngae, aqyawfmaf, iqmalavshav-euq arhmr tiq pyaeq, caermyawvni ghae-eu aqgaf dzaruir-euq lafkhoer dawvduiv-awr, hursor arkanq-anr ganrcuf-awr, aqyawf-euq khaqmae-anr cawqmir naeq-euq mae.
30Yeqsur, caermyawvni ghae-eu aqgaf dzaruir khoer-anr myeufhaw ghaq-euq nar-aq aer-eu, “Mrluiv jir-euq ma!” Khoernar-aq, uqduq ga’mof-awr nae saf tsaev-euq mae.
Yeqsur-euq Byarghar-anr Ganq Nae Tsawv-euq
31Khoerngae nan-aq, zanr janr-eu gharduq laeqhmq-eu arnan pyeuf-eu mae. Yurdav tsawrhaq, Pirlav jawr-eu gar le-awr, landaw jawrnan ngae nan (zawr taqhuiq-eu arnan pyeuf-eu mirnae), lafyaq-euq khoertav tsawrshir mawrdo maqya javni, aqyawf maf-euq aqkuir bi daekhaef-awr, shirtaq-euq mawrdo khoerdeuq-anr bi bafdov ghaeni sharler-euq mae. 32Khoernar-aq, guirzaq deuq lar-awr, yawbae ghaq-euq aqkuir-anr daekhaef-awr, Yeqsur naeq-aer taftaeq taq-euq yawqghaq yawq-euq aqkuir-anr khawf daekhaef-euq mae. 33Aerkhawf, Yeqsur jawr-eu gar larkeuv ngae, aqyawf shirtsaev taq-euq gar ya’mawr-awr, aqyawf-euq aqkuir maq daekhaef-aq. 34Aerkhawf, guirzaq tiq ghaq, Yeqsur-euq byarghar-anr ganq nae tsawv-awr, shiq hawr-eu ircuf tiqpov taef-aer yoerdov lef-euq mae.
35Nawmaf khawf ya janni, khoer-anr ya’mawr-euq ghaq sarkir kamq-eu mae. Aqyawf sarkir kamq-eu khoer-aq, tsaq-awr dawr-awr, aqyawf aer-eu khoer-aq, yawtsaq yawdawr mae laer aqyawf siqnya-eu mae. 36Heulof-aer pyeuflar-euq-aq, Yaerbof-euq lafkhoer boftaq-euq heudawq byanlar-euq mae,
“Aqyawf-euq shaqyoeq tiqkanq-iq maqbi khaef-ir-ar.” (Di 12:46; Bts 9:12)
37Yaerbof yawqtsanryawq par boftaq-euq,
“Aqyawfmaf nae tsawv-euq ghaq-anr aqyawfmaf haw taef-a.” (Zkl 12:10)
Yeqsur-anr Bafpanq-euq
Mt 27:57-61; Mk 15:42-47; Lk 23:50-56
38Khoernar-aq, Aqlirmaqtaeq-anr nae lar-euq Yorsaev, Yeqsur-euq mawrdo-anr bafghaeni Pirlav-anr sharler-euq mae. Aqyawf-aq, Yeqsur-euq zaqlanr pyeuf-eu khawf, Yurdav tsawrhaq-anr guv-eu mirnae, aqcawq-anr maqbi siqni Yeqsur-euq zaqlanr geufluf-eu mae. Khoerngae, Pirlav, aqyawf-anr arnmq bif-euq mirnae, aqyawf lar-awr, Yeqsur-euq mawrdo bafghae-euq mae. 39Dzeurlaf ngae, uqcif paw, Yeqsur jawr-eu gar lar-euq Nirgawrdiq khawf, murlaq hawr-eu arjawq keuq-euq 30 jawf-iq aerghaqni yurghae-euq mae. 40Yurdav tsawrhaq, tsawrshir bafpanq ngae zanr jav-eu lof-aer, aqyawfnyaf khawf yawsaw jeq dawvdawv-aer, Yeqsur-euq mawrdo-anr sheqsha#19:40 Sheqsha Heudawq-aq, Heqbyaer dawq mae. “Pishta” laer kur-eu arbawq-anr nae janrdov laf-euq zawr poeq-eu saqpar-anr aermawf-eu mae. saqpar nae mawrtawv tawv-euq mae. 41Yeqsur-anr tafsaef-euq dawqpae yarkmr tiq kmr jav-eu mae. Yarkmr heukmr-euq lafkhoer, tsawrhaq tiqghaq-iq maq bafpanq haw-euq khaqlo-anr taftaq-euq lmqbymr yawshuif tiq bymr jav-eu mae. 42Khoerngae nan-aq, Yurdav tsawrhaq-euq zanr janr-eu gharduq laeqhmq-eu arnan pyeuf-awr, lmqbymr khoer khawf dawqpae jav-eu mirnae, aqyawfnyaf, Yeqsur-anr khoergar bafpanq-euq mae.
Цяпер абрана:
Yorhaq 19: AKA
Пазнака
Падзяліцца
Капіяваць
Want to have your highlights saved across all your devices? Sign up or sign in
2018 ©
Bibles International ®
The Bible Society of Baptist Mid-Missions