Proverbios 10
10
1Ti kjuaxrexinkaon jína chrónka Salomón:
Ti ixjan chónta kjuaxrexinkaon jína la nchechéhe̱ ti itꞌé,
a̱ndá ti ixjan lo̱nti̱ la nchekꞌává ti ìñé.
2Ti nkehe imá tjete kjuacha sin kixin ti nkehe nduáhya kjuíchꞌe sin la ó chónkó,
la ti nkexro jína tjejó la si̱chꞌiyéhya sin chojni la xi̱kaha isé tsꞌejó sin.
3Itꞌéni Díos la títo̱ehya tsꞌenxín kjinta ti nkexro ndoá itjen;
kjánchó tsjajonhña chꞌan ti nkehe tjinkaon ti chojni jínahña.
4Ti nkexro chꞌehya ixra̱ la tso̱nóa,
a̱ndá ti nkexro tóxakohen sichꞌe ixra̱ la tso̱rico.
5Ti nkexro itjá ti ña̱o tꞌóna nkehe la ijnko chojni nohe jína,
a̱ndá ti nkexro tꞌajua ti ña̱o tꞌóna la imá tso̱suéhe̱.
6Itꞌéni Díos la ncheñao ti nkexro jína tjejó,
a̱ndá ti nkexro nduáhya tjenka̱yáxin la nchemá ti nkehe jínahña ichꞌe.
7Ti nkexro ndoá itjen la nkochríxín tsoxraxinkaon chojni,
a̱ndá ti nkexro nduáhya tjenka̱yáxin la náhí.
8Ti nkexro nohe la kaín a̱sén sinchexiteyá ti nkehe tsíkꞌituehen,
a̱ndá ti chojni chji̱ñé nixja mé tsꞌitjáña.
9Ti chojni jína ixri ti nti̱a ndoá la tsochrakonhña,
a̱ndá ti chojni ixri ti nti̱a nduáhya la tso̱noxín ti ijie̱ chónta sin.
10Ti chojni tjanka xrakon chꞌiyehe kícho mé tíha la tsji̱ka̱o kjuatꞌává
la ko ti chojni chji̱ñé nixja la tsꞌitjáña.
11Éxi ti tꞌaxrje ìnta̱ tjajon kjuachón mé xi̱kaha ti nkehe nixja ti nkexro ndoá itjen,
a̱ndá ti chojni jínahña la nchemá ti nkehe jínahña ichꞌe.
12 #
Stg. 5:20; 1Pe. 4:8. *Ti kjuachji̱no̱xíhin la tji̱ka̱o ti tjajo̱n chojni;
a̱ndá ti tso̱tjue̱heni kíchóni la tsꞌitjáña kaín ti ijie̱.
13Ti nkehe nixja ti chojni nohe la chónta ti kjuaxrexinkaon jína;
a̱ndá ti sin lo̱nti̱ la tsjasótexín ti nkehe chji̱ñé nixja.
14Ti chojni nohe la tjenka̱yáxin kixin imá sínkí ti kjuaxrexinkaon jína;
a̱ndá ti chojni lo̱nti̱ la ti nkehe nixja mé tsji̱ka̱o kjuaxikaon tsꞌitjáñaxín sin.
15Ti sin rico la ti nkehe chónta sin la tꞌayakohen ti jehe sin éxi ijnko tja̱tꞌo̱ tse̱he̱;
a̱ndá ti sin nóa la tsjasótexín sin ti nóa sin.
16Ti ixra̱ ichꞌe ti sin ndoá tjejó la mé tsjacha kixin kjuaxróxin tsꞌejó sin,
a̱ndá ti nkehe tsjacha ti sin nduáhya tjenka̱yáxin la mé ti ijie̱.
17Ti nkexro titekaon ti ó xrjenduehe la tsꞌaji ti nti̱a tjajon kjuachón.
A̱ndá ti sin titekakonhña la tsjichròe sin.
18Ti nkexro chꞌia la nchemá ti kjuanínkaon kuènté
la ti nkexro imá xritjonta iso chojni la mé ijnko chojni lo̱nti̱.
19Ti chojni chji̱ñé nixjé la tjasin ijie̱;
a̱ndá ti nkexro jína tjenka̱yáxin la chji̱ñéhña nixja.
20Éxi ti plata náxrjón, tjete sínkí ti nkehe nixja ti chojni jína,
a̱ndá ti chojni tjenka̱yáxinhña jína la ninkehó sínkíhya ti nkehe nixja sin.
21Ti nkehe nixja ti chojni jína la tjinki̱tsa nchónhña chojni;
a̱ndá ti chojni lo̱nti̱ la táhó tꞌitjáñaxín sin kixin tjenka̱yáxinhña sin jína.
22Ti ó Itꞌéni Díos sincheñao ijnko chojni la a̱ntsí jína tsꞌejó sin,
kjánchó ti nkexro tóxakohen sichꞌe ixra̱ la ninkehó tsjachahya sin.
23Ti nkexro lo̱nti̱ la tóxríhi̱n tsakítsje kjuasáye;
a̱ndá ti nkexro nohe la tóxríhi̱n ti kjuaxrexinkaon jína.
24Ti nkehe chráko̱nhe̱n ti nkexro tjenka̱yáxinhña jína la táha tsi̱hi̱ sin;
a̱ndá ti sin jína la tsꞌáyéhe̱ sin ti nkehe jína tjinkaon sin.
25Éxi chrókꞌuatsínka ijnko xri̱nto̱xejnki mé xi̱kaha chrókꞌuitjáña ti sin tjenka̱yáxin ti nkehe jínahña;
a̱ndá ti sin tjenka̱yáxin jína la jína tsꞌejó sin nkochríxín.
26Éxi vinagre nchekjote ñeno chojni o̱ éxi ihnchi tjiankí ikon chojni,
mé xi̱kaha ti chojni séhe nchekoninkaon sin ti lamoé sin.
27Ti sin tjikosáyehe Itꞌéni Díos la itsjé ña̱o tsꞌejó sin,
kjánchó ti sin tjenka̱yáxin ti nkehe jínahña la séhya tsꞌejó sin.
28Ti nkehe tjejóchóhen ti sin jína la mé tsjajon kjuachéhe̱
a̱ndá ti nkehe tjejóchóhen ti sin tjenka̱yáxin ti nkehe jínahña la ó chónkó.
29Itꞌéni Díos la tꞌayakohen ti sin tꞌaji ti nti̱e chꞌan,
a̱ndá ti sin ichꞌe nkehe jínahña la sinchekꞌitjáña chꞌan.
30Ti sin jína la tsꞌitsínkahya sin,
a̱ndá ti sin tjenka̱yáxin ti nkehe jínahña la í tsꞌejóhya sin chjasintajni.
31Irꞌua ti chojni jína la tꞌaxrjexín kjuaxrexinkaon jína,
a̱ndá ti chojni nixja ti nkehe náxrjónhña la tsꞌitjáña sin.
32Ti chojni jína la nixja sin nkehe jína tsjinki̱tsa íjnko chojni;
a̱ndá ti sin tjenka̱yáxin ti nkehe jínahña la jehó nkehe náxrjónhña nixja sin.
Цяпер абрана:
Proverbios 10: poeNTplus
Пазнака
Падзяліцца
Параўнаць
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2016, Wycliffe Bible Translators, Inc. All rights reserved.