Proverbios 11
11
1Itꞌéni Díos tóxrìe̱nhña ti nkexro nduáhya nchekjìinxín nkehe,
a̱ndá tóxríhi̱n chꞌan ti nkexro ndoá nchekjìinxín ti nkehe nchekji.
2Ti kjuahnke mé tji̱ka̱o kjuatosuéhe̱,
a̱ndá ti sin nkehya la tja̱ko̱xi̱n kixin jína nohe sin.
3Ti tjenka̱yáxin chojni jína la tjinki̱tsa kixin jína tsꞌejó sin,
a̱ndá ti chojni chꞌiyehe kícho mé tsꞌitjáñaxín sin ti chꞌia sin.
4Ninkehó sínkíhya ti nkehe tjete chónta chojni ti ña̱o sinchekito̱exín Díos,
a̱ndá ti chojni ndoá tja̱ko̱xi̱n mé tsaá sin.
5Ti ndoá tjenka̱yáxin ti chojni jína la tíha mé tjéndo̱a ti nti̱e sin.
A̱ndá ti chojni tjasin ijie̱ la tsꞌitjáñaxín sin ti nti̱a jínahña ixri sin.
6Ti nkehe ndoá tjenka̱yáxin ti chojni jína la tíha tsaáxin sin.
A̱ndá ti sin chꞌia la ti nkehe tjinkaon sin tsochónta sin itsjé nkehe la éxi tjejóchjinaxín sin tíha.
7Ti itsꞌen ti chojni tjenka̱yáxin ti nkehe jínahña la kja̱xin itsꞌen ti nkehe tjenka̱yáxin sin
la ko ti nkehe tjenka̱yáxin sin tsochónta sin mé tsꞌitjáña kja̱xin.
8Díos tsjinki̱tsa ti chojni jína kixin jína tsꞌaxrjexín sin kaín nkehe náxrjónhña tso̱hen sin.
A̱ndá ti chojni tjenka̱yáxin ti nkehe jínahña la tsꞌatsínka sin itsjé nkehe náxrjónhña.
9Ti nkehe nixja ti sin tjenka̱yáxin ti nkehe jínahña la nchekꞌitjáñaxín sin íso chojni;
a̱ndá ti kjuaxrexinkaon kuènté ti sin jína la tjinki̱tsa kixin tsꞌaxrjexín sin jína.
10Ti tsjacha sichꞌe ixra̱ ti chojni jína la tso̱chéhe̱ ti chjasin,
a̱ndá tso̱chéhe̱ chojni ti ó itsꞌen ijnko chojni tjenka̱yáxin ti nkehe jínahña.
11Ti ijnko chjasin tjejó chojni jína kjuíncheñao Díos la a̱ntsí jína tsjakꞌe ti chjasin.
A̱ndá ti nkehe ndáchro ti chojni jínahña la tsꞌitjáñaxín ti chjasin.
12Ti nkexro chóntahya kjuaxrexinkaon jína la titekakuenhña kícho.
A̱ndá ti nkexro chónta kjuaxrexinkaon jína la chji̱ñéhña nixja.
13Ti chojni xriko kjuachꞌia la chronka kaín ti nkehe ómó sítóhen.
A̱ndá ti nkexro jína, la kjónté nohe ichrén nkehe sítóhen, la táníkoá.
14Ti kohya nkexro nohe tsꞌe̱to̱an ti chjasin la tso̱kohya kjuaxróxin.
A̱ndá ti siín itsjé ti nkexro jína tjenka̱yáxin la jína chrókjuákꞌe ti chjasin.
15Jehya jína chróndáchrua kixin chrókjuènka ti nkehe síká íjnko chojni chóxinhña,
ícha jína chrókjuínki̱tsahya sin kixin ndá jína chrókjuakꞌe.
16Ti chojnichjin jína a̱sén la tsꞌáyéhe̱ kjuasàya.
A̱ndá ti chojnindoa xra̱hya tónínkaon la chichaon ó tsjacha sin.
17Ti nkexro tjinki̱tsa íjnko chojni la kjuaxróxin tsjakꞌe;
a̱ndá ti chojni jie̱he la jehó nchekjasótexín a̱sén.
18Ti nkehe tsjacha ti chojni tjenka̱yáxin ti nkehe jínahña la jehó kjuachꞌia,
a̱ndá ti nkexro ichꞌe ti nkehe jína la éxi chrókꞌue̱nka̱ sin ti nkehe jína la tsotjá sin kaín ti nkehe jína, tsjeje̱hya.
19Ti nkexro ndoá ixri, jína la isé tsjakꞌe;
a̱ndá ti nkexro tjenka̱yáxin ti nkehe jínahña la xritjeyá ti nkehe tsꞌenxín.
20Itꞌéni Díos nínkakohen ti chojni ichꞌe nkehe jínahña;
a̱ndá ti sin ndoá ixri la tóxríhi̱n chꞌan.
21Ijnko nkehe la chaxín, ti nkexro tjenka̱yáxin ti nkehe jínahña la tsjasóte sin.
A̱ndá ti chojni ndoá tjejó la kjuaxróxin sátsji sin, tsjasótehya sin.
22Éxi ijnko kochꞌa̱ninko oro tjenta xrito ijnko kochíno
mé xi̱kaha ti chojnichjin náxrjón tsjehe ndá chóntahya kjuaxrexinkaon jína.
23Ti nkehe tjinkaon ti chojni ndoá ixri la tsꞌaxrje jína;
a̱ndá ti nkehe tjinkaon ti chojni tjenka̱yáxin ti nkehe jínahña la jehó tsꞌitjáñaxín.
24Ti sin tóxika̱ye̱he ti nkehe chónta la a̱ntsí itsjé tsochónta sin;
a̱ndá ti chojni tjekohen la tso̱nóa sin.
25Ti chojni ncheki̱to̱nhe̱n ti sin nóa ti nkehe chónta la jína tsꞌejó,
la ko ti nkexro sincheki̱to̱nhe̱n jnko vaso ìnta̱ ijnko chojni la kja̱xin íso chojni tsjajon sin ìnta̱ itsꞌi ti nkexro kjuajon.
26Ti nkexro jehó tꞌe̱nka̱chji̱na ti noa la sincheno̱to̱n chojni ti nkexro a;
a̱ndá ti nkexro sinchekji ti noa la tjikosáyehe ti sin tꞌe̱na.
27Ti tsjéyá ti nkehe jína la tsꞌayéhé kjuasàya;
a̱ndá ti tsjéyá ti nkehe jínahña la tíha tsꞌitjáñaxián.
28Ti nkexro imá tsotjinkaon ti nkehe chónta la tíha tsjasótexín;
a̱ndá ti nkexro jína la tsochónta ni̱xién fuerza la tso̱yóhe̱ sin éxi ijnko inta yoa.
29Ti nkexro tꞌayakuenhña ndo̱e la ko ti nkehe chónta la tsꞌitjáña kaín;
la ko ti nkexro lo̱nti̱ la ticháxi̱n sichꞌehe ixra̱ ijnko chojni nohe.
30Ti chojni jína la mé yóhe̱ éxi ijnko inta tꞌóna ito tsjajon kjuachón;
a̱ndá ti nkexro jína tja̱ko̱he̱ íso chojni la chónta sin kjuaxrexinkaon jína.
31 #
1Pe. 4:18. *Ti chojni ndoá tjejó la tsjacha nkehe jína ntihi chjasintajni;
a̱ndá ti sin tjasin ijie̱ la jehó ti nkehe jínahña tsjacha sin.
Цяпер абрана:
Proverbios 11: poeNTplus
Пазнака
Падзяліцца
Параўнаць
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2016, Wycliffe Bible Translators, Inc. All rights reserved.