New Testament in Carrier (CA:crx:Carrier)

Yak'usda Ooghuni

ꞋEt hukwꞌelhꞌaz Galilee bun kꞌut ꞌet Jesus nyan wheinki, ꞌi bunghun za Tiberias bun kꞌut huyúlhni. Ndudane butoh tube huwa ꞌítꞌen tuneꞌ ꞌutꞌen ꞌet hinilhꞌen, ꞌinka tube lhane ꞌilhunaoosdilne huyununúdilh. ꞋEt Jesus yasúya whe yugha hodulꞌehne tubulh, ꞌon do shusyaz kꞌut ꞌet nátlꞌaꞌhudiltsꞌiꞌ. ꞋEt ꞌawet whenghoh whudizulh Lizwifne Yakꞌusda oolizas Butus Lhuséya whúnahulnih-un.
ꞋEt Jesus whunilhꞌen tube lhane dune hitsꞌú lhodulh, ꞌet ꞌubunilhꞌen whe la Philip ꞌulhni, “Ntsꞌe za lhes tsꞌoket ha la, ꞌet de daꞌ ndunne dune ꞌuhooꞌalh?” ꞋEt Jesus didutchꞌoh datínelh la tꞌéwhunínzun, ꞌet hoontsꞌi Philip ꞌen yóolhdzih whe ꞌutni.
ꞋEt Philip ꞌutni, “$200.00 ꞌudustlꞌus ꞌultsuk-i, lhes ꞌaw buba soo lheꞌyiltsuk, ꞌi ꞌilhoghun hinli whe ntsool-iyaz hanꞌal ꞌet hoontsꞌi.”
ꞋIlhoghun Jesus yugha hodulꞌeh-un, Andrew, Simon Peter bulhutsin, ꞌen Jesus ꞌuyulhni, “Njan ꞌilhoghun duneyaz netoh ꞌutꞌen-un, ꞌen lhes sutꞌe kwulaiꞌ cha ꞌinkꞌez lho ntꞌum-iyaz nanki cha, ꞌi yutꞌi, ꞌet hoontsꞌi di ooleꞌ lheꞌultsukne yutiꞌulh huba?”
ꞋEt Jesus ꞌutni, “Tsꞌiyanne hudóltsꞌiꞌ budáhni.” ꞋEt nyo ꞌuhutꞌen-un tlꞌoyaz kꞌut hoonli, ꞌet dunene 5,000ne atꞌenne hinli whe ꞌet natlꞌáhudiltsꞌiꞌ. ꞋEt Jesus lhes yílhchoot, Yakꞌusda tsꞌun musi ni whe tenadidli, ꞌinkꞌez yugha hodulꞌehne butlꞌa yánla, dilhtsꞌíne tsꞌiyawh butahuyólelh wheni. ꞋEt lhoyaz yílhchoot ꞌinkꞌez ꞌi cha ꞌet ndúyinla. Tsꞌiyanne soo ꞌúltsuk whe huyílhchoot ꞌinkꞌez hiyanꞌal.
ꞋInkꞌez tsꞌiyanne ꞌuhunisdai whe, Jesus yugha hodulꞌehne ubúlhni, “Ndai la chꞌutízkat-i, soo tsꞌiyawh nalhdzooh, ꞌet de la ꞌaw hoonli nintaookat ꞌaítꞌoh.” ꞋInka soo tsꞌiyanne ꞌanꞌal hukwꞌelhꞌaz, ndai la highá ꞌozꞌal-i kwulaiꞌ lhes sutꞌe ꞌinkꞌez nanki lhoyaz bulh, chꞌutízkat-i nahuyalhdzoo whe whunizyai ꞌon ꞌat nanki chalhyal ꞌi dizbun.
ꞋEt ndunne dune honalhꞌen whe Jesus dahoolcho-un la ꞌuja-un, “ꞋEt ꞌalha ꞌuhoontꞌoh whe ndun ꞌen nus hóoꞌen-un yun kꞌeítayalh-un, ꞌen ꞌuntꞌoh,” hutni. ꞋEt Jesus tꞌéwhunínzun dulerwe tileh-un, ꞌet nehuyuntayulh hukwaꞌ huninzun, ꞌinka doo cha za dichꞌoh shusyaz kꞌuz whenája.

ꞋAwet hulhgha suliꞌ whe yugha hodulꞌehne bunghun tsꞌe nahoosdil, ꞌinkꞌez tsꞌi be náhidil nyan keyoh Capernaum tsꞌe whuz nahutikelh hukwaꞌ huninzun. ꞋAwet tube tsahólhgus suliꞌ ꞌinkꞌez Jesus ꞌawhuz bughu nalhusdai. Tube nilhtsi ulhtus, ꞌet huwa too kꞌut tatsi díncha suliꞌ. ꞋAwet bunghun lhulcho atꞌen hikelh whula, Jesus too kꞌut uyalh whe hitilhꞌen, ꞌinkꞌez ꞌawet butsꞌi ye nghoh úyalh whe tube húnuljut. ꞋEt, “Nulhjut íloh, si ꞌustꞌen!” ubúlhni. ꞋEt ndúbulhni hukwꞌelhꞌaz huhóontꞌiꞌ whe butsꞌi be naja. ꞋEt bughu denája ibulh, ꞌaho ntsꞌe la yun kꞌut hutizki tsꞌe, ꞌet yahúzki.

ꞋOm bun dzin ꞌet la ndunne bunghun nyaz tsꞌe ꞌilhozdil inléꞌne, tsꞌiyaz ꞌilho za ꞌet hinalhꞌen ínleꞌ, ꞌet huwa Jesus ꞌaw yugha hodulꞌehne bughu denálhidal, hiyit whenáki tꞌéhonínzun. ꞋEt hoontsꞌi nyo ndet daꞌ neMoodihti Yakꞌusda tsꞌun lhes ba tenadidli ꞌinkꞌez dune tainínla huyooꞌalh-un wheni, ꞌet whuzih, ꞌet hukwꞌelhꞌaz ꞌuyoo tsꞌi cha Tiberias whuz de hainkat. ꞋEt nyo ꞌilhozdílne tsꞌiyawh tꞌehonanzin Jesus hooloh ꞌinkꞌez yugha hodulꞌehne cha tsꞌiyawh huhooloh, ꞌet huwa didut cha tsꞌiyawh tsꞌi be hándil ꞌinkꞌez nyan Capernaum tsꞌe hoozki Jesus hikunúta wheni.
ꞋEt ndunne ꞌilhozdílne bunghun lhéya huninki whe Jesus nahuyilhti ꞌinkꞌez huyoodulhkút, “Rabbi nkedaꞌ njan ꞌet whusaínya?” húyulhni.
ꞋEt Jesus ubúlhni, “Soo tsꞌihꞌun unꞌa nohdúsni, ꞌaw njan nohnalh huwa ꞌítꞌen túneꞌ ꞌustꞌen-un, ꞌet huwa iloh skunáhta. Lhes nohgha núsꞌai, ꞌinkꞌez be soo ꞌuhja, ꞌi ha za ꞌahtꞌen skunúhta. Ndi tꞌalh-i gak nadleh whe ꞌuntꞌoh, ꞌaw ꞌi iloh ookunáhta, kꞌus ndi ꞌutꞌalh-i dune ꞌilhiz ooleꞌ huye khúna-i, ꞌi ookunáhta. Yinka Dune Yeꞌ, ꞌi nohghá yoꞌalh, ooBá Yakꞌusda ꞌen yugha óoninꞌai, ꞌen ooYeꞌ ꞌuntꞌoh ꞌet huwa.”
ꞋEt ꞌuhuyúlhni, “Datsꞌútꞌen whe ndi Yakꞌusda be ꞌutꞌen ꞌuztilhꞌelh?”
ꞋEt Jesus ꞌubulhni, “Mbe la ndun Yakꞌusda nohtsꞌu whusayálhꞌaꞌ-un, ꞌen nohba ꞌalha ꞌootꞌeꞌ. Ndi ꞌi Yakꞌusda be ꞌutꞌen ꞌuntꞌoh.”
ꞋInka ꞌuhuyúlhni, “Dantꞌi ꞌutꞌen ꞌutalhꞌelh? ꞋIlhoghun huwa ꞌítꞌen-un neba ꞌuhoonleh, ꞌet de la tsꞌonoolhꞌen, ꞌinkꞌez neba ꞌalhaꞌ ꞌontꞌeꞌ. Wheni netsodaꞌne ꞌaw dune lhuhootꞌih-un tsꞌe manna ndus de hainkat-i, ꞌi huyanꞌal. Yakꞌusda be ꞌudustlꞌus kꞌut ꞌukꞌu nusguz-i ooghuni, ꞌi ꞌutni, ‘Lhes yakꞌuz haínkat-i, ꞌi bugha íninꞌai huyooꞌalh wheni,’” huyulhni.
ꞋEt Jesus ꞌubulhni, “Soo tsꞌihꞌun unꞌa nohdúsni, ꞌaw Moses ꞌen íloh ndi lhes yakꞌuz hainkat-i nohgha yáꞌaih inleꞌ, ꞌet kꞌus sBá ꞌen ꞌutꞌen yakꞌuz whules nohgha yúꞌaih. Ndi Yakꞌusda ooles ꞌen ꞌuntꞌoh ndus de yakꞌuz haínya-un ꞌinkꞌez yinka whuduneꞌne ꞌilhiz wheni huye khútinalh-i bugha nínꞌai.”
ꞋEt ꞌuhuyúlhni, “NeMoodihti, ꞌahoolhyiz ndi lhes negha ínꞌaih.”
ꞋEt Jesus ubúlhni, “Si ꞌustꞌoh ndi lhes ndai la dune yugha khúna-i usdli. Mbe la sghu yaih-un, ꞌen ꞌaw ꞌilhiz wheni ooyeꞌóoltsꞌilh ꞌaítꞌoh, ꞌinkꞌez mbe la si ooba ꞌalhaꞌ ꞌustꞌoh-un, ꞌaw ꞌilhiz wheni taꞌódaꞌ ꞌaítꞌoh. ꞋEt nohdúsni ꞌandit sihꞌen ꞌet hoontsꞌi ꞌaw nohba ꞌalhaꞌ lheꞌústꞌoh. Tsꞌiyanne sBá sgha bunínlane, ꞌenne la stsꞌun hútoodilh, ꞌinkꞌez mbe la sghu yaih-un, ꞌaw oochꞌaz naóozꞌah ꞌaítꞌoh. ꞋEt hukwa ndus de yakꞌuz tsꞌe hásya. ꞋAw sichꞌoh hukwaꞌ nuszun te néꞌtistꞌen huba iloh, mbe la whuz de sútilhꞌaꞌ-un, ꞌen ntsꞌoh tula daóotanelh hukwaꞌ ninzun-un, ꞌi ꞌutꞌen oosdleh wheni whusásya. ꞋInkꞌez sBá, whuz de sútilhꞌaꞌ-un, mbene la sgha buninlane ꞌaw ꞌilhoghun hoontsꞌi nintaoostelh hukwa lheꞌnízun, ꞌinkꞌez la ꞌudekꞌez dzin de dunabudosdlelh. Mbene la Yakꞌusda ooYeꞌ tꞌeinínzunne ꞌinkꞌez ꞌen buba ꞌalhaꞌ ꞌuyintꞌohne, ꞌilhiz wheni huye khúna-i hitátꞌelh ꞌinkꞌez ꞌudekꞌez dzin de ꞌenne dunabudutásdlelh. Ndun whuz de sútilhꞌaꞌ-un njan ꞌet hukwaꞌ ninzun ꞌet huwa,” ubúlhni.
ꞋEt Lizwifne Jesus hichꞌaz yáwhenilhduk, “Datni whe ꞌutni si ndi lhes yakꞌuz tsꞌe haltsꞌut-i ꞌustꞌoh ni?” ꞋInkꞌez cha ꞌuhutni, “Ndun ꞌutní-un, ꞌen Joseph ooyeꞌ Jesus ꞌen ꞌuntꞌoh, ꞌinkꞌez oobá cha, ooloo cha, tꞌébuznínzun. Ntsꞌenꞌa ꞌutni ndus de yakꞌuz tsꞌe hásya ni?” hutni.
ꞋEt Jesus ubúlhni, “ꞋAw nohni nohtoh schꞌaz yálhduk iloh! Mbene la sBá stsꞌú butilhꞌaꞌne, ꞌenne za la stsꞌun hutoodilh ꞌinkꞌez ꞌudekꞌez dzin de ꞌenne dunábudutásdlelh. Nus hooꞌenne ndi ꞌi ꞌukꞌu nuhúyuzguz ínleꞌ, ‘Yakꞌusda ꞌen tsꞌiyanne hubodutilhꞌeꞌ,’ ꞋEt huwa mbene la sBá highuni dantsꞌo ꞌinkꞌez ꞌi gha huhodilꞌeꞌ de, ꞌenne stsꞌun hutidulh. ꞋAw sBá yanꞌenne hooloh ꞌet hoontsꞌi Yakꞌusda ootsꞌu haínya-un ꞌuntꞌoh, ꞌen za yanꞌen. ꞋAlhaꞌ nohdúsni, mbene la si buba ꞌalhaꞌ ꞌustꞌohne, ꞌenne ꞌilhiz ooleꞌ huye khúna-i hutꞌi. Si ꞌustꞌoh lhes dune ye khúna-i, ꞌi usdli. Nohtsodaꞌne ꞌaw dune lhuhootꞌih-un tsꞌe huwhutꞌi ínleꞌ, ꞌinkꞌez manna ꞌi huyanꞌulh ꞌet hoontsꞌi yahadla. ꞋEt ndi lhes yakꞌuz tsꞌe haínkat-i, mbene la yanꞌal de, ꞌaw dahóotsah ꞌaítꞌoh. Ndi lhes yakꞌuz tsꞌe haltsꞌut-i, ꞌilhiz ooleꞌ wheni huye khúna-i, ꞌi ꞌustꞌoh. Mbene la ndi lhes yanꞌal de, ꞌenne ꞌilhiz wheni huhutinalh, ꞌinkꞌez ndi lhes nohgha tísꞌalh-i, ꞌi syustꞌe ꞌuntꞌoh. ꞋI huwa tísꞌalh, ꞌi gha la yinka whuduneꞌne, ꞌilhiz ooleꞌ wheni huhutinalh,” ubúlhni.
ꞋEt doo cha ndunne Lizwifne huwun lhdulhyoh ꞌuhudutni, “Ntsꞌenꞌa ndun dune ooyustꞌe tsꞌutiꞌulh?” hutni.
ꞋEt Jesus ꞌubulhni, “Tsꞌihꞌun ꞌunohdusni, ꞌaw ndun Yinka Dune Yeꞌ ooyustꞌe lháhꞌulh ꞌinkꞌez buzkaiꞌ cha lháhtnel de, ꞌet de ndi ꞌilhiz wheni huye khúna-i ꞌaw lháhtꞌih whe ꞌuhtꞌoh. Mbe la syustꞌe yaꞌal ꞌinkꞌez suzkaiꞌ cha ꞌutnaiꞌ, ꞌen ꞌilhiz wheni hutinalh ꞌinkꞌez ꞌudekꞌez dzin de dunádutástelh. Syustꞌe ꞌutꞌalh-i ꞌuntꞌoh ꞌinkꞌez suzkaiꞌ cha soo ꞌutnai-i ꞌuntꞌoh. Mbe la syustꞌe yanꞌál-un, ꞌinkꞌez suzkaíꞌ cha yitnaíꞌ-un, ꞌen ꞌilhiz wheni sulh ꞌútitꞌelh ꞌinkꞌez si cha bulh ꞌútistꞌelh. SBá, ꞌilhiz wheni khuna-un, ꞌen whuz de sútilhꞌaꞌ. ꞋEn gha si cha ꞌilhiz wheni khusna. ꞋEt whuz unꞌa mbe la skꞌut dune unli-un, si sgha ꞌilhiz ooleꞌ hutinalh. ꞋI ꞌuntꞌoh, ndi soo lhes unli whe ndus de yakꞌuz tsꞌe haínya. ꞋAw manna dulhiltꞌoh nohtsodaꞌne ꞌaw dune lhuhootꞌih-un huwhutꞌi ꞌinkꞌez huyanꞌal inleꞌ, ꞌet hoontsꞌi yahadla. Ndi lhes ꞌandit ooghu yasduk-i, mbe la yaꞌál-un, ꞌilhiz wheni hutinalh,” ubúlhni. Jesus njan ꞌet ndutni inleꞌ keyoh Capernaum huwhútni ꞌet lugliz dune hodulꞌeh daꞌ.
ꞋEt huwa lhane yugha hodulꞌehne daja ni la hidántsꞌo hukwꞌelhꞌaz ꞌuhutni, “Njan whuneodulhꞌeꞌ, ꞌet neba howu whulnaꞌ kꞌunꞌa ꞌutni. Ntsꞌenꞌa ookwꞌúneꞌ ꞌuztitꞌen?”
Jesus dichꞌoh tꞌéwhunínzun yugha hodulꞌehne daja ni la ꞌet huwun dudzi yo tsꞌe hichꞌaz yálhduk, ꞌinka uboodulhkut, “Nohba dzoh ꞌúdusni eh? ꞋInkꞌez Yinka Dune Yeꞌ ndo ntsꞌe la whutsodaꞌ usda tsꞌe, whuz nadalh nulhꞌen de, daja ntihzilh? Ndoni ꞌen ꞌutꞌen yinka duneꞌne ꞌilhiz huhutinalh-un bugha whuꞌaih. Dune yustꞌe ꞌaꞌalh-un, ꞌaw hoonli lhuhooloh wheꞌ hoontꞌoh. Ndi khuni be nóhbulh yasduk-i, ꞌi be la ꞌilhiz wheni huhutinalh. ꞋEt hoontsꞌi nohtoh whulohne ꞌaw nohba ꞌalhaꞌ lheꞌhootꞌoh.” Jesus ꞌudaꞌ tꞌeooninzun mbene buba ꞌalhaꞌ lheꞌhootꞌoh, ꞌinkꞌez mbe yeꞌ óotakulh-un, ꞌet cha tꞌeoonínzun ꞌet huwa. ꞋEt Jesus ꞌutni, “ꞋInka ꞌunohdúsni, mbene la sBá bugha óoninꞌaine, ꞌenne za stsꞌun hutídulh wheꞌ hintꞌoh,” ubúlhni.
ꞋEt whutsꞌun lhane yugha hodulꞌehne hichꞌa nasdil ꞌinkꞌez ꞌaw ꞌon ꞌat huyulh núlhusdil.
ꞋEt Jesus ndunne whunizyane ꞌon ꞌat nane yugha hodulꞌehne uboodulhkut, “Nohni cha eh schꞌa natihdulh hukwaꞌ nahzun?” ubúlhni.
ꞋEt Simon Peter uyúlhni, “NeMoodihti, mbe suba ootsꞌuztoodilh? Nyun za khuni ꞌilhiz wheni be tsꞌúkhuna-i ꞌintꞌi, ꞌinkꞌez neba ꞌalhaꞌ ꞌintꞌoh. Tꞌétsꞌonínzun nyun Christ ꞌen ꞌintꞌoh. Yakꞌusda ꞌilhiz wheni khuna-un, ꞌen ooYeꞌ ꞌintꞌoh!” yúlhni.
ꞋEt Jesus ꞌubulhni, “ꞋAlhaꞌ iloh lakw nohni whunizyane ꞌon ꞌat nane, ꞌenne ꞌutáhanóhisdla, ꞌinkꞌez nohtoh ꞌilhoghun ꞌen netsudule unli.” Judas Iscariot, Simon ooyeꞌ, ꞌen ghu yalhduk whe ꞌutni, ꞌen ꞌutinelh yeꞌ óotakulh tꞌéwhunínzun ꞌinka ꞌutni. ꞋEn cha whunizyane ꞌon ꞌat nane ꞌilhoghun butoh ꞌuntꞌoh.

Listen to John 6