Doh lah terjemahan Kitab Kuy Temiar rik mulak. Puꞌdoh hòj mok ènsekh bukuk Kitab nak, dak akal kitabeh wèl bukuk Kitab rik gèhnih bil hòj mok. Èn kelòj bukuk Kitab doh, Tuhan naꞌoglèkh Gah Méj ma èk: Tuhan hòj naꞌog Kuwòt rik Eh, rik bekenëh Yèsus, najadik sènꞌòy gerèk èk. Dak Yèsus nakebes untok namtèrgos ma èk kenèmbek, supaye Allah namꞌampon ma dose èk. Dak pas nak Tuhan natèrwòg Yèsus nòm kènbes Eh! Jadik puꞌdoh chok rik hèh-hoh ma tenènglèkh Yèsus, Tuhan naterime ma kelòj kewarge rik Eh, bok èk boléh èmgos jalꞌéng samak Rik Nak.
Terjemahan Temiar doh tok samak ma terjemahan Bahasa Malaysia. Udoh kedak terjemahan nòm BM, tapik nòm bahasa asal Kitab (Bahasa Yunani ròb Ibrani). Sebab nak kandék hòj kisemak terjemahan doh samak maròp-maròp guruk Kitab ròb pakar terjemahan, supaye kenèmbek maksod eh kemën bok tehad gerèk kuy asli Kitab nak. Dak kisemak keꞌjèk samak jajéh sènꞌòy Temiar, supaye maksod eh najadik tèꞌlalah èn kelòj Kuy Temiar.
Inilah terjemahan Alkitab Bahasa Temiar yang pertama. Sekarang sudah ada separuh buku Alkitab itu, dan nanti kami akan tambah lagi buku Alkitab bila sudah ada. Dalam buku Alkitab ini, Tuhan memberitahukan Berita Baik kepada kita: Tuhan sudah memberi AnakNya sendiri, yang bernama Yesus, Dia menjadi manusia seperti kita. Lalu Yesus mati untuk menyelamatkan kita semua, supaya Allah akan mengampunkan dosa kita. Dan selepas itu Allah membangkitkan Yesus dari kematianNya! Jadi sekarang sesiapa yang ikut ajaran Yesus, Tuhan menerima dalam keluargaNya sendiri, dan kita boleh hidup kekal bersama Dia.
Terjemahan Temiar ini tidak sama dengan Bahasa Malaysia. Ini bukan terjemahan dari BM, tetapi dari bahasa asal Alkitab (Bahasa Yunani dan Ibrani). Sebab itu kami sudah semak terjemahan ini bersama beberapa guru Alkitab serta pakar terjemahan, supaya semua maksudnya benar dan tepat seperti bahasa asli Alkitab itu. Dan kami semak juga bersama ramai orang Temiar, supaya maksudnya menjadi jelas dalam Bahasa Temiar.

℗ 2025 Wycliffe Bible Translators, Inc.

Gah Méj: Kitab Kuy Temiar

Mèn guruk agama nòm pitak Parisi umkeyòkh gah Yèsus hòj nabebaptis ma sènꞌòy bok hèhoh Eh nak hòj lebéh ibuk nòm Yohanès Pembaptis. (Yab che kènmën eh nak kedak Yèsus rik bebaptis ma sènꞌòy, tapik hèhoh-hèhoh Eh rik bebaptis.) Dak Yèsus naperak nòm negerik Yudéya nak dak namak samak mèn hèhoh Eh ma tèk Galiliya. Èn nèbchib umnak, Yèsus nalèkh Allah nachèn Rik Nak namwad nòm belah Samariya.
Jadik umlòy ma tèk rik Yakob, yak dòt bej kaum Israꞌèl, naꞌog ma kuwòt eh Yusop. Dak èn anak tik mok néy perigi rik Yakob nachelòkh nèng-nèng tòp. Tempad nak tilok ma néy kampong èn Samariya rik bekenëh Sikar. Yèsus nagahèl sebab nèbchib umnak jerok, dak Nanak nagel èn béng perigi nak. Bil nak hòj ès-is, dak mèn hèhoh Eh umwèk ma kampong mubèꞌlik nèygéy.
Pas nak nalãj lah néy babok sènꞌòy Samariya ma perigi nak untok namkod òng. Dak Yèsus nachal ma babok nak, “Hamꞌog òng nak ma Yék imꞌòng.”
Dak babok nak nasaꞌod ma Rik Nak, “Hãk nak sènꞌòy Yahudi, bok yék doh sènꞌòy Samariya, tok yah Hãk hamꞌoj òng ma yék?” Babok nak nabèlꞌih gerèk nak sebab sènꞌòy Yahudi umbechòd ma sènꞌòy Samariya nak bok tok umbeꞌiroh.
Yèsus nasaꞌod ma rik nak, “Hãk tik tok halèng-lèkh ilok rik Allah dapad namꞌog ma hãk. Kalòw hãk halèkh Chok rik sènymany òng ma hãk, pastik lah hãk hasemany ma Yék, bok Yék iꞌog ma hãk òng rik èg-og nèsgos.”
Babok nak nachal, “Yãng, Hãk tok mèk-mok bèldi, bok perigi doh jerok geb. Bok nòm lok Hãk hamdapad òng rik èg-og nèsgos nak? Bok hasabok Hãk nak lebéh rayak nòm Yakob, yak dòt bej èk? Nanak irik èg-og perigi doh ma kandék. Nèng-nèng tòp Yakob, mèn kuwòt eh, ròb kenèmbek chok bènleh eh umꞌòng nòm perigi doh.”
Dak Yèsus nasaꞌod, “Chok rik èng-òng òng nòm perigi doh akal nasagòl wèl. Tapik chok rik èng-òng òng rik Yék iꞌog ma umnak, umnak akal tok umbesagòl wèl sampéy bilok-bilok. Bok òng rik Yék iꞌog nak akal najadik gerèk òng rik hèg-hòg bok naꞌèb-ĩb èn kelòj sènꞌòy nak, bok naꞌog ma umnak nèsgos rik jalꞌéng.”
Babok nak nachal, “Yãng, og lah che yék òng nak, supaye yék tok ibesagòl wèl bok tok payah imlès-los wèl ma doh untok imkod òng!”
Yèsus nachal ma rik nak, “Wèk lah kòw ma tòw hãh nak, dak los lah ma doh samak tòw hãh nak.”
Babok nak nasaꞌod, “Tapik yék tok betòw yéh.”
Dak Yèsus nachal ma rik nak, “Hek, tehad ilok rik hãk hachal nak, hãk tok betòw hãh. Che kènmën eh, hãk hòj haselòg ma limak tòw hãh bok haperak. Dak babeh rik puꞌdoh nagèl-gel samak hãk nak kedak tòw hãh keꞌjèk! Jadik mémang kemën lah ilok rik hachal nak.”
Babok nak nachal, “Yãng, puꞌdoh bok yék ilèkh Hãk nak néy sènꞌòy nabi! Jadik yék imtanyak ma Hãk: kandék sènꞌòy Samariya ròb yak dòt bej kandék selaluk kisindol ma Allah èn pok doh, tapik nyob sènꞌòy Yahudi nyob chal had èn Yèrusalèm hék tempad rik boléh èmsindol ma Allah. Chok rik kènmën?”
Yèsus nasaꞌod ma babok nak, “Pechaye lah ilok rik ichal ma hãk doh: akal nalòy mase eh sènꞌòy boléh umsindol ma Allah Apak èn lok-lok, bok tok payah wèl èj-òj ma pok atòw pon wèk-wèk ma Yèrusalèm. Nyob sènꞌòy Samariya nyob sindol ma Allah, tapik tok nyob kèlnal ma Rik Nak. Tapik kandék sènꞌòy Yahudi kisindol ma Allah bok kikenal ma Rik Nak, sebab nòm kaum Yahudi lah Allah natèrꞌèn terèngos Eh ma duniak. Tapik mase eh akal nalãj — che kènmën eh, hòj nalãj puꞌdoh — bil sènꞌòy rik kemën-kemën besindol akal umsindol ma Allah Apak nòm ruway bok nòm chare rik kènmën. Sènꞌòy rik umbesindol gerèk nak lah rik Allah nakèk untok musindol ma Rik Nak. Allah nak Ruway, dak rik umbesindol ma Rik Nak haros lah umsindol nòm ruway bok nòm chare rik kènmën.”
Dak babok nak nachal ma Yèsus, “Yék ilèkh Mèsias nak, rik èkòw Kristus, akal nalãj. Bil Nanak nalãj, Nanak akal naꞌoglèkh tèꞌlalah ma kandék tentang kenèmbek eh nak.”
Dak anak Yèsus nasaꞌod ma rik nak, “Yék lah iRik Eh Nak — Yék rik becharak samak hãk puꞌdoh.”
Bil nak hèhoh-hèhoh Eh umlos, dak umnak umbèlꞌih bil umnéh Yèsus nabecharak samak babok. Tapik tok mèk-mok néy sènꞌòy pon èn umnak namtanyak, “Ilok hachèn?” atòw “Nahey Hãk habecharak ma rik nak?”
Babok nak naperak tabol òng eh bok namak ma kampong. Dak rik nak naꞌoglèkh ma sènꞌòy gèhnih, “Jok lah bok néh! Èn tuy mok sènꞌòy rik hòj naꞌoglèkh ma yék tentang kenèmbek ilok rik yék hòj pernah iteꞌèl! Sabok kah Nanak nak Mèsias lèk-lok?” Jadik sènꞌòy kampong nak pon umhuwòl dak umwèk munéh ma Yèsus.

Asoh babok naꞌtèk naꞌèg-oglèkh ma sènꞌòy èn kampong nak tentang Yèsus, dak mèn hèhoh Yèsus umsèryéh ma Rik Nak, “Guruk, jok lah èmgéy!”
Tapik Yèsus nachal ma umnak, “Yék mok nèygéy rik nyob tok lèng-lèkh.”
Dak mèn hèhoh Eh nak umcha-chal kaban rik um, “Ke hòj mok sènꞌòy naꞌèn nèygéy ma Rik Nak?”
Yèsus nasaꞌod ma umnak, “Nèygéy inak yihoh ma nènchèn Rik Nak rik terèn-èn ma Yék, bok imtèrsòj kèrjak rik Nanak hòj naꞌog ma Yék. Bok nyob selaluk nyob chal nak, ‘Tik empad gechèk wèl bok boléh ètòg.’ Néh lah! Yék ichal ma nyob, peleng lah mad nyob nak bok néh lah! Mok jajéh sènꞌòy rik tèk-tik tok umpechaye, umnak gerèk nègtòg èn selay rik hòj umtuhak — hòj boléh ètòg! Dak puꞌdoh chok rik tèg-tòg selay nak bok umꞌéd sènꞌòy muhoh ma Yék, sènꞌòy nak hòj umtekèd umterime upah um. Bok hasil rik umtòg nak sènꞌòy rik umꞌéd untok mugos jalꞌéng, supaye rik tèm-tap ròb rik tèg-tòg nak boléh umbeꞌadés samak-samak. Kemën lah ilok rik sènꞌòy selaluk umchal nak: ‘Mok rik tèm-tap, dak mok rik tèg-tòg.’ Yék nèng-nèng tòp hòj iꞌor ma sènꞌòy gèhnih mutap. Dak puꞌdoh iꞌor ma nyob nyomtòg ma selay inak, bok nyomkod hasil nòm kèrjak umnak.”

Jajéh sènꞌòy Samariya nòm kampong naꞌtèk umpechaye ma Yèsus sebab babok nak hòj nachal ma umnak, “Rik Nak naꞌoglèkh ma yék tentang kenèmbek ilok rik hòj pernah yék iteꞌèl!” Jadik bil sènꞌòy Samariya nak umlãj untok mutèrbuk ma Yèsus, umnak umsemany lèdbëd supaye Rik Nak namgel samak umnak. Jadik Yèsus nagel èn anak nar arik.
Dak umnak umkeyòkh ma tenènglèkh Yèsus, dak jajéh sènꞌòy wèl èn umnak umpechaye ma Rik Nak. Dak sènꞌòy èn kampong nak umchal ma babok nak, “Hatòp nak kandék kipechaye sebab ilok rik hãk hachal nak ma kandék. Tapik puꞌdoh kandék kipechaye sebab kandék hòj kikeyòkh gèntòkh rik kandéh, bok kilèkh mémang kemën lah Rik Nak irik terèsgos ma duniak!”

Hòj sòj nar arik èn kampong Sikar nak, Yèsus samak mèn hèhoh Eh umchib wèl ummak ma Galiliya. Yèsus hòj pernah nachal: bil néy sènꞌòy nabi namak ma kampong rik eh, umnak tok umbehormad ma rik nak. Tapik sènꞌòy Galiliya nak hòj umnéh kenèmbek ilok rik Yèsus nateꞌèl èn Yèrusalèm bil Arik Raye Paskah. Jadik bil Yèsus nabeleh ma Galiliya, sènꞌòy èn anak umsambud méj ma Rik Nak.
Yèsus nagagoh wèl ma kampong Kana èn tèk Galiliya, tempad Rik Nak hatòp nasanglik òng biyase najadik òng anggor. Bil nak mok néy pegaway kerajaꞌan, nanak mok kuwòt babeh eh rik najèk-jik èn kote Kapernaum. Bil nanak nakeyòkh Yèsus hòj nalãj nòm Yudéya ma Galiliya, nanak nawèk namtèrbuk ma Yèsus. Nanak nasemany lèdbëd supaye Yèsus namwèk bok namtèrhakh ma kuwòt eh rik tèꞌlok namkèsbes nak. Tapik Yèsus nachal ma pegaway nak ròb kenèmbek sènꞌòy rik mok èn anak, “Nyob doh kalòw tok nyob nèh-néh tande ròb tènꞌèl kuwase, nyob tok nyob pechaye!”
Dak pegaway nak naseꞌëd wèl, “Yãng, tulong lah lãj lulòw, èn tèk-tik kuwòt yék tok nakèsbes!”
Yèsus nasaꞌod, “Mak lah, kuwòt hãh nak hòj nahakh bok tok nakèsbes.”
Dak nanak napechaye ma nèlchal Yèsus dak nawèk namèk-mak. Bil èn gagid tèk, nanak natèrbuk ma kuli eh rik umlãj nòm dékh eh nak. Dak umnak umchal ma rik nak, “Kuwòt hãh hòj nahakh.”
Pegaway nak natanyak ma umnak, “Jam maròp nanak nahakh?” Dak umnak umchal, “Is hatòp jam satu ès-is, tok-tok esik eh rik bèd-bëd hòj hõy!” Dak nanak nabelekh is hatòp Yèsus nachal ma rik nak tehad jam satu ès-is, “Kuwòt hãh hòj nahakh.” Jadik nanak ròb kenèmbek sènꞌòy èn dékh eh umpechaye ma Yèsus.
Doh lah tande kuwase rik kedua Yèsus nateꞌèl èn Galiliya, bil Nanak hòj namak nòm Yudéya.

Listen to Yohanès 4