If you would like a copy of this version please contact info@davaraudiobibles.org

Lhomi New Testament

हीनी स पीम्‍बल ङीत्‍तुव दी यो़नी, स ङीमे ॱङेट्‌टो दी थोर्च्‍याल मरीयम् मग्‍दलीनी धङ् मरीयम् च्‍यीक्‍पु दी रो बेक्‍सल तदु युङ बेत्। ॱनी हुदु म दीरङ् ॱसेर छ्‌यीम्‍मु च्‍यीक् ज्‍यप्‍न, इगी तेङ् यी़नी मल्‍ल चोव ज्‍यीन्‍दक्‍की भङ्‌ज्‍येम्‍ब च्‍यीक् भप्‍न युङ्‌न हुगी दो दी सुर्ल टीन हुगी खल रोरङ् देत्‍न यो़प्‍प बेत्। हुगी सी़ दी टक्‍सी डुक्‍की च्‍यीलागी ओ़त् डस्‍सी धङ् घो़ दी खा डस्‍सी च्‍यत् थीङीय यो़प्‍प बेत्। ॱनी उन ॱरुङ्‌गेन् गोराब दीब हुल टक्‍प सेत्‍न ज्‍यीबे दर्न, म दीरङ् ॱस्‍यीनर डस्‍सील ॱसोङ बेत्।
हुगी भङ्‌ज्‍येम्‍ब दीगी भुमु ॱङीबु दील खीत्‍रङ् ज्‍यीब मत् झ्‍यीत्। खीत्‍रङ् कुरुस्‍ल ताबे येशु ॱयेङ्‌दु युङ हीम्‍ब ङल ॱस्‍यो़च्‍च्‍ये यो़त्। खोङ् हीन मीप्‍प बेत्। खोङ्‌गी एल्‍ला ॱस्‍येत्‍न यो़प्‍पल डीक्‍प खोङ् ॱसोम्‍बुल लोङ् छर बेत्। तदु ॱस्‍योक्। खोङ्‌गी कुबुर् स्‍योक्‍स दील तो़। हुनी खीत्‍रङ् ढीम्‍बु झ्‍यीन लोक्‍ल ज्‍युक्‍ल खोङ्‌गी ॱलोप्‍टुक् घयेत् दीबल अक् हीन्‍दुक् सीन्‍न ॱस्‍यो़त्। खोङ् ढोङ्‌नी यङ् ॱसोम्‍बुल लोङ बेत्। खोङ् खीत्‍रङ्‌ले एल्‍ला गालीलाल डोगेन् बेत्। ॱनी हुदु खीत्‍रङ्‌ल ठेक्‍केन् बेत्। तेदे खीत्‍रङ्‌ल ङे हीगो ॱस्‍येप्‍पेनो सीन्‍न ॱङाब बेत्। हुनी भुमु ॱङीबु दी ज्‍यीब अक् झ्‍युङ्, यङ् गेस अक् लङ्‌गील्‍ल रो बेक्‍स दीनी लोक्‍न ढीम्‍बु ज्‍युन युङ्‌न येशुगी ॱलोप्‍टुक् दीबल ॱस्‍यो़त्‍तु फीम्‍ब बेत्।
हुनी भुमु दीबल ॱस्‍यर्च्‍यक् येशु लम्‍ल ठेप्‍प बेत्। येशुगी हुबल खीत्‍रङ्‌ल दीव युङ्‌ज्‍ये यो़प्‍प स्‍योक्‍च्‍यीत् झ्‍यीब बेत्। हुनी हुबे खोङ्‌ल छ्‌यक् छेन खोङ्‌गी कङ्‌बनी सीम्‍ब बेत्। ॱनी खोङ्‌गी हुब ॱङीबुल खीत्‍रङ् ज्‍यीब मत् झ्‍यीत्। ह ज्‍युक्‍ल ङे पी़न्‍ज्‍या घयेत्‍ल हुब गालीलाल ज्‍युक्। ॱनी हुदु ङ ठेक्‍केन् बेत् झ्‍यी सीन्‍न ॱङाब बेत्।

ॱनी हुगी भुमु दीब ॱसोङ्‌नी, उन यो़क्‍केन् गोराब दीबे हुदु झ्‍युङे केच्‍च्‍य घयेत् दी सार्ल फीन्‍न छ्‌यो़प्‍पो़न् चो छ्‌यीया घयेत् दीबल हुबे ॱस्‍येप्‍प बेत्। हुनी छ्‌यो़प्‍पो़न् चो छ्‌यीया घयेत् धङ् लुङ्‌बे गेम्‍बा चो छ्‌यीया घयेत् दी छोन ढो़ झ्‍यीब बेत्। ॱनी हुबे गोराब दीबल पयीसक् गज्‍येन् बीन्‍न खीत्‍रङ्‌गी केच्‍च्‍य दी हीन्‍दुक् सीन्‍न ॱस्‍यो़त्। ङीत् छेम्‍मु ॱङीत्‍ल ॱसोङल हुगी ॱलोप्‍टुक् दीब युङ्‌न हुगी रो दी की़न खुर्नत्‍तुक् सीन्‍न मी घयेत्‍ल ॱस्‍यो़त्। हीगी केच्‍च्‍य हीगो लुङ्‌बे पेम्‍बु छ्‌यीम्‍मी़ ॱह घोसोङ्‌न ॱनी, हुगो ङीक्‍की ख कक् तङ्‌गी। खीत्‍रङ् ॱसीम्‍दुक् मत् झ्‍यीत् सीन्‍न ॱलब बेत्। हुबे ॱलब दील नेन्‍न पयीसक् दी ॱलङ्‌नी, गोराब दीबे हुगी तम् दी ॱस्‍येत्‍न टम्‍ब बेत्। हुनी झ्‍यीनी दङ् हरीङ् थुक् यहुदी घयेक्‍की घुङ्‌दु हुगोरङ् च्‍योर्केन् बेत्।

हुनी ॱलोप्‍टुक् च्‍युज्‍यीक्‍पु दी येशुगी ॱस्‍येत्‍न स्‍यक्‍पे गालीलागी लदोक् दील फीम्‍ब बेत्। ॱनी हुबल हुदु येशु ठेत्‍नी, खोङ्‌ल हुबे छ्‌यक् छेब बेत्। ॱनी यरीबे ॱसीम्‍ल यङ् हीम्‍ब न मेम्‍ब न? ॱनो़ब आक् झ्‍युङ बेत्। ॱनी येशु छुल्‍ल लोल युङ्‌न हुबल इगी तेङ् यी़ धङ् ॱस जम्‍बुलीङ्‌गी थोक्‍ल डोगेङ्‌गी ॱवङ् की़न् ङल टेत्‍न यो़त्। हीगो झ्‍यीनी, खीत्‍रङ् ज्‍युक्‍ल ज्‍यी़त् ज्‍यी़त् घयेत् ङे ॱलोप्‍टुक्‍ल सो़लेत्। हुनी हुब यप्, ॱरेबु, धम्‍बे थु झ्‍यीबे मीङ्‌नी बप्‍तीस्‍ल ॱलुक्‍च्‍यीत्। ॱनी ङे खीत्‍रङ्‌ल घङ् ॱलप्‍न झ्‍यीत्‍तु ची़प्‍प घयेत् दी हुबल अक् खीत्‍रङ्‌गी हुन्‍दुक् दीरङ् ॱलप्‍न नेन्‍न झ्‍यीक्‍केल्‍ल सो़ज्‍यीत्। तेदे ङ धी़ ज्‍यी़न्‍दु स्‍युक् थमे धी़ थुक्‍ल खीत्‍रङ्‌दङ् दल दो़क्‍केन् हीनो झ्‍यीब बेत्।

Listen to मत्‍ती 28