These Scriptures are a new translation into the Naskapi language spoken at Kawawachikamach, Quebec. We the Naskapi people have been eager to have our own translation of the Bible. For many decades we have had to make do with Scriptures that were translated for indigenous languages that are different from our own: most notably Bishop Horden's Moose Cree New Testament and prayer book, and Rev. W. G. Walton's prayer book. The Naskapi Development Corporation has been engaged with this work since the 1990s, facilitated by Wycliffe Bible Translators and the Canadian Bible Society. The Naskapi community grateful acknowledges the help of all who participated with us in producing these Scriptures. Our prayer is that these Words of God will be cherished by our people for generations to come.

ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ The Naskapi text is copyright © Naskapi Development Corporation Naskapi Development Corporation Kawawachikamach, Québec G0G 2Z0 Canada New Testament published by the Canadian Bible Society (CBS) © 2007 Canadian Bible Society 10 Carnforth Road, Toronto Ontario M4A 2S4 Canada

ᒋᓴᒪᓂᑐᐤ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ God's Word in Naskapi

“ᐃᔭᒂᒥᒄ ᑕᓐ ᐊ ᐃᓯ ᒥᔪᑐᑕᒐᔭᒄ᙮ ᐊᑲᐎᔾ ᓇᔅᒡ ᐎᓄᑯᐃᑎᓱᒄ ᐊᓐᑕ ᐊ ᒥᒐᑎᓇᓄᐅᒡ ᒥᒄ ᐊ ᐃᑕᔨᑎᒪᒄ ᒐᒋ ᐛᐱᒥᑕᑯᒡ ᐊᐛᓐᒋ, ᐛᔅ ᐅ ᐃᑐᑎᒪᒂ, ᐊᑲᐎᔾ ᐱᑯᓴᔨᑎᒧᒄ ᒐᒋ ᑎᐸᐊᒪᑕᒄ ᒍᑕᐎᐛᐤ ᒋᒋᒋᓯᑯᒡ ᐊ ᑕᑦ᙮”
“ᑭᔭ ᐊ ᒥᔨᑦ ᐊᐛᓐ ᒐᒂᔪᐤ ᐊ ᐃᓯ ᓄᑕᐱᔨᑦ, ᐊᑲᐎᔾ ᐃᑐᑕ ᐅ ᒥᓯᐛ ᐊᐛᓐ ᒐᒋ ᒋᔅᒐᔨᑕᐧᒃ, ᐛᔅ ᐊᓐᒡ ᐎᔨᐛᐤ ᑲ ᐊᔭᒪᐊᐧᑲᓱᒡ ᓇᔅᒡ ᐎ ᑲ ᒐᔅᒐᔨᑕᑯᐅᒡ ᑕᓐ ᐊ ᐃᓯ ᒥᔪᑐᑕᒡ᙮ ᒥᒄ ᐊ ᐃᑕᔨᑎᒥᐃᑯᒡ ᒐᒋ ᒪᒥᒋᒥᑯᒡ ᐊᐛᔪᐛ᙮ ᑕᑈ ᒋ ᐎᑎᒪᑎᓇᐛᐤ, ᓴᔅ ᒋᓴᒡ ᒥᔭᑭᓄᐎᒡ ᐅᑎᐸᐊᒪᑯᓯᐅᓄᐛᐤ᙮ ᒪᒃ ᐊ ᐎᒋᐃᑦ ᐊᐛᓐ ᐊ ᒋᔅᑎᒪᑎᓯᑦ, ᐊᑲᐎᔾ ᐱᐸᒪᒋᒧ ᑕᓐ ᑲ ᐃᓯ ᐛᐎᒋᐃᑦ᙮ ᒥᒄ ᒋᔾ ᒋᐸ ᒋᔅᒐᔨᑕᓐ ᑕᓐ ᐊ ᐃᓯ ᒥᔪᑐᑎᒥᓐ᙮ ᐊᑯ ᒪᒃ ᒍᑕᐎᔾ ᒋᒋᒋᓯᑯᒡ ᐊ ᑕᑦ ᒐ ᑎᐸᐊᒪᔅᒃ, ᐛᔅ ᒋᓴᒪᓂᑐᐤ ᒥᓯᐛ ᐛᐸᑎᒻ ᑕᓐ ᐊ ᐃᑐᐅᑦ᙮”


“ᑭᔭ ᐊ ᐊᔭᒥᐊᔭᑯ, ᐊᑲᐎᔾ ᒋᑭ ᓂᔅᐱᑐᐛᐛᐅᒡ ᐊᓐᒡ ᑲ ᐊᔭᒥᐊᐧᑲᓱᒡ᙮ ᐛᔅ ᓇᔅᒡ ᒥᔽᔨᑎᒧᒡ ᐊ ᓇᓂᐳᐅᒡ ᐊ ᐊᔭᒥᐊᒡ ᐊᓐᑕ ᐊᔭᒥᐊᐅᒋᐛᐱᒡ ᑭᔭ ᐊᓐᑕ ᓴᓯᑲᓐ ᒥᓯᐛ ᐊᐛᔪᐛ ᒐᒋ ᐛᐱᒥᑯᒡ᙮ ᒋ ᐎᑎᒪᑎᓇᐛᐤ ᓴᔅ ᐅᒡ ᐊᔭᐅᒡ ᐅᑎᐸᐊᒪᑯᓯᐅᓄᐛᐤ᙮ ᒪᒃ ᐊ ᐊᔭᒥᐊᔨᓂ, ᒋᑲᐱᔅᒋᒐᔭᒥᒡ ᐃᑐᑕ ᑭᔭ ᒋᐸᐎᓱ, ᐃᔅᐱ ᒪᒃ ᒋ ᒋᐸᐎᓱᔨᓇ ᐊᑯ ᒐ ᐃᔨᒥᐃᑦ ᒍᑕᐎᔾ ᐊᑲ ᐛᐱᒪᑭᓄᐅᑦ᙮ ᒋ ᐛᐱᒧᒄ ᐎᔾ ᑕᓐ ᐊ ᐃᑐᐅᑦ ᐊᑲ ᑯᑎᒃ ᐊᐛᓐ ᐛᐱᒥᔅᒃ, ᐎᔾ ᒪᒃ ᒋᑭ ᑎᐸᐊᒪᒄ᙮”
“ᑭᔭ ᐊ ᐊᔭᒥᐊᔭᑯ, ᐊᑲᐎᔾ ᐊᐱᒋᑕᒄ ᐃᔨᒧᐅᓐ ᐊᑲ ᒐᒂᓐ ᓇᔅᒡ ᐃᔅᒋᔄᒥᑲᒡ ᒧᔭᒻ ᐊᑎᒡ ᐊᓐᒡ ᐊᑲ ᑕᑈᔭᔨᒪᒡ ᒋᓴᒪᓂᑐᐛ, ᐛᔅ ᐃᑕᔨᑎᒧᒡ ᒐ ᐸᑕᑯᒡ ᒋᓴᒪᓂᑐᐛ ᒥᒄ ᐊᓂᔭ ᓇᐅᔅ ᐊ ᐊᔭᒥᐊᒡ᙮ ᐊᑲᐎᔾ ᓂᔅᐱᑐᐛᐧᑯᒡ ᐅᒡ᙮ ᐛᔅ ᒍᑕᐎᐛᐤ ᒋᔅᒐᔨᑎᒻ ᓴᔅ ᑕᓐ ᐊ ᐃᓯ ᓂᑐᐛᔨᑎᒪᒄ ᐊᒺᔭ ᑯᒂᒋᒪᒄ᙮ ᐊᐅᒄ ᐅ ᒐ ᐃᓯ ᐊᔭᒥᐊᔭᒄ᙮
ᓄᑕᐎᓇᓐ ᒋᒋᒋᓯᑯᒡ ᐊ ᑕᔨᓐ, ᓂᑦ ᐊᔭᒥᐊᓇᓐ ᒋᑦ ᐃᓯᓂᐧᑲᓱᐅᓐ ᐊ ᐸᔭᒋᓯᒥᑲᒡ ᒐᒋ ᒋᔅᑕᔨᑕᑯᑕᑭᓄᐅᒡ᙮
ᒋᒋᓴᐅᒋᒪᐅᓐ ᒋᑭ ᐎ ᐅᑎᒋᐱᔪᐤ, ᒋᑦ ᐃᑕᔨᑎᒧᐅᓐ ᒋᑭ ᐎ ᐃᑐᑕᑭᓄᐤ ᐅᑕ ᐊᔅᒋᒡ ᒧᔭᒻ ᒋᒋᒋᓯᑯᒡ᙮
ᒥᔨᓇᓐ ᐊᓄᒡ ᐊ ᒋᓯᑲᒡ ᐸᒂᓯᑭᓐ ᒐ ᐅᒋ ᐱᒪᑎᓯᔭᒡ᙮
ᐛᐸᔨᑎᒧᐅᓇᓐ ᓂᒥᒋᑥᐅᓇᓇ ᐛᔅ ᑭᔭ ᓂᔭᓐ ᓂ ᐛᐸᔨᑎᒧᐅᓇᓐ ᒥᓯᐛ ᐊᐛᓐ ᑲ ᒥᒋᑐᑐᐎᔨᒥᑦ᙮
ᐊᑲᐎᔾ ᒪᒃ ᐃᑐᑕᐃᓇᓐ ᐊᓐᑕ ᒐᒋ ᐃᓯ ᑯᒂᒋᐃᑯᐅᔭᒡ᙮ ᒥᒄ ᐸᒋ ᒥᑕᒂᓇᒧᐅᓇᓐ ᐊᓐ ᑲ ᒪᔭᑎᒡ᙮ ᐛᔅ ᒋᔾ ᒋ ᑎᐱᔨᐛᐅᓯᓐ ᐅᒋᒪᐅᓐ ᑭᔭ ᑭᔅᒋᐅᓐ ᑭᔭ ᒋᔅᑕᔨᑕᑯᓱᐅᓐ ᒧᔅ ᑲᒋᒡ, ᐊᒥᓐ᙮” ᐊᐅᒄ ᒪᒃ ᐅᔭ ᒋᓴᔅ ᑲ ᐃᓯ ᒋᔅᑯᑎᒪᒐᑦ ᒐ ᐃᓯ ᐊᔭᒥᐊᓄᐎᒡ᙮
“ᐛᐸᔨᑎᒧᐛᒂᐛ ᑯᑎᑭᒡ ᑕᓐ ᑲ ᐃᓯ ᐅᓂᑐᑕᑕᑯᒡ, ᒍᑕᐎᐛᐤ ᒋᒋᒋᓯᑯᒡ ᐊ ᑕᑦ ᒋᑭ ᐛᐸᔨᑎᒪᑯᐛᐤ᙮ ᐊᑯ ᒪᒃ ᐊᑲ ᐛᐸᔨᑎᒧᐛᒂᐛ ᑯᑎᑭᒡ ᓇᒪ ᑭᔭ ᒍᑕᐎᐛᐤ ᒋᒋᒋᓯᑯᒡ ᐊ ᑕᑦ ᒋᑭ ᐅᒋ ᐛᐸᔨᑎᒪᑯᐛᐤ ᑕᓐ ᑲ ᐃᓯ ᐅᓂᑐᑎᒪᒄ᙮”

“ᒪᒃ ᐃᔅᐱ ᐊᑲ ᐅᑎᓂᒪᒂ ᒥᒋᒻ ᒥᒄ ᐊ ᐎ ᐊᔭᒥᐊᔭᒄ, ᐊᑲᐎᔾ ᓂᔅᐱᑕᐧᑯᒡ ᑲ ᐊᔭᒥᐊᐧᑲᓱᒡ᙮ ᐊᒪᒋᒂᔨᒡ ᒐᒋ ᐛᐱᒥᑯᒡ ᐃᔪᐛ ᐊ ᐊᑲ ᒥᒋᓱᒡ ᒥᒄ ᐅᓴ ᐊ ᐊᔭᒥᐊᒡ᙮ ᑕᑈ ᒋᑦ ᐃᑎᓇᐛᐤ ᓴᔅ ᒋ ᒥᔭᑭᓄᐎᒡ ᐅᑎᐸᐊᒪᑯᓯᐅᓄᐛᐤ᙮ ᐃᑎᔨᓇ ᒪᒃ ᐊᑲ ᒥᒋᓱᔨᓐ ᓯᑲᐅᐎᓱᐤ ᑭᔭ ᐛᐸᑲᐎᓱᐤ᙮ ᐊᑲᐎᔾ ᒋᔅᒐᔨᑕᑯᐤ ᐅ ᐊ ᐃᑎᔨᓐ᙮ ᒥᒄ ᒍᑕᐎᔾ ᐊᑲ ᐛᐱᒪᑭᓄᐅᑦ ᒋᑭ ᒋᔅᒐᔨᑎᒻ᙮ ᐎᔾ ᒋᑭ ᐛᐱᒥᒄ ᐅᔭ ᐊ ᐃᑐᐅᑦ ᐊᑲ ᑯᑎᒃ ᐊᐛᓐ ᐛᐱᒥᔅᒃ, ᐎᔾ ᒪᒃ ᒋᑭ ᑎᐸᐊᒪᒄ᙮


ᐊᑲᐎᔾ ᒪᐅᒋᑎᒪᓱᒄ ᐛᔪᑎᓯᐅᓐ ᐅᑕ ᐊᔅᒋᒡ, ᐊᓐᑕ ᒐ ᓂᓱᐅᓇᒋᑕᒡ ᒥᓐᑐᓯᒡ ᑭᔭ ᒐ ᐊᒂᒂᐱᔅᑲᒋ ᐊᓐᑕ ᑭᔭ ᑲᓂᑕᐅᒋᒧᑎᒡ ᒐᒋ ᒋᒧᑎᒡ᙮ ᒪᒃ ᒪᐅᒋᑎᒪᓱᒄ ᐛᔪᑎᓯᐅᓐ ᐊᓐᑕ ᒋᒋᒋᓯᑯᒡ, ᐊᓐᑕ ᒐ ᐊᑲ ᒋ ᓂᓱᐅᓇᒋᑕᒡ ᒥᓐᑐᓯᒡ ᑭᔭ ᒐ ᐊᑲ ᒋ ᐊᒂᒂᐱᔅᑲᒋ ᑭᔭ ᒐ ᐊᑲ ᒋ ᒋᒧᑎᒡ ᑲᓂᑕᐅᒋᒧᑎᒡ᙮ ᐛᔅ ᐊᓐᑕ ᐊ ᐃᓯ ᑎᒂᒡ ᒋᐛᔪᑎᓯᐅᓐ ᐊᑯᑕ ᑭᔭ ᒐ ᑎᒂᒡ ᒋᑕᐃ᙮”


“ᒋᔅᒋᓯᒂ ᐊᐅᒄ ᐅᔭ ᒋᔪᐤ ᐅᐛᔅᑕᓂᐱᒪᑭᓇ᙮ ᐊ ᐸᔭᐧᑭᓂᔨᒋ ᒪᒃ ᐊᐛᓐ ᐅᔅᒋᓯᒂ ᓇᔅᒡ ᒋᑭ ᓴᑭᔅᒋᓇᔅᑲᑯ ᐛᔅᑕᐅᓂᔪᐤ ᐎᔭᒡ᙮ ᐊᑯ ᒪᒃ ᒥᔭᔭᑎᓄᒂᓂ ᒋᔅᒋᓯᒂ, ᒥᓯᐛ ᒋᔪᐤ ᓇᔅᒡ ᒋᑭ ᓴᑭᔅᒋᓇᐤ ᐅᑲᔅᑕᔭᐅᓐ᙮ ᒧᔭᒻ ᒪᒃ ᐊᓐ ᐛᔅᑕᐅᓐ ᑲ ᐱᒋᔅᑲᑯᔨᓐ ᐊ ᐅᑲᔅᑕᔭᐅᓂᒂ, ᑕᑈ ᑭᑈ ᓄᐛᒡ ᐅᑲᔅᑕᔭᐤ᙮”


“ᓇᒪ ᐊᐛᓐ ᒋᑭ ᒋ ᐊᑐᔅᑯᐛᐤ ᓂᓱ ᐅᒋᒪᐛ, ᐛᔅ ᐸᐃᒄ ᐊᓂᔭ ᒋᑭ ᓴᒋᐊᐤ, ᑭᔭ ᑯᑎᑲ ᒋᑭ ᐛᐧᑲᑕᐤ᙮ ᑭᔭ ᒪᒃ ᒋᑭ ᒋᔅᑕᔨᒪᐤ ᐊᓂᔭ ᐸᐃᒄ, ᑯᑎᑲ ᒪᒃ ᒋᑭ ᐊᑐᐛᔨᒪᐤ, ᓇᒪ ᒋᑭ ᒋ ᐊᑐᔅᑯᐛᐤ ᒋᓴᒪᓂᑐᐛ ᐊᔪᐤ ᒪᒃ ᓱᒃ ᐊ ᐊᑐᔅᒐᑦ ᐊ ᐎ ᐛᔪᑎᓯᑦ᙮”
“ᐊᐅᒄ ᒪᒃ ᐛᒋ ᐃᑎᑎᑯᒡ ᒐ ᐊᑲ ᐊᔨᒪᔨᑎᒪᒄ ᒐᒂᓐ ᒐ ᒥᒋᔭᒄ ᑭᔭ ᒐᒂᓐ ᒐ ᒥᓂᔭᒄ ᒐᒋ ᐅᒋ ᐱᒪᑎᓯᔭᒄ ᑭᔭ ᒪᒃ ᒐᒂᓐ ᒐ ᒋᔅᑭᒪᒄ᙮ ᓇᒪ ᓇ ᐅᔅᑕ ᒋᔅᑕᔨᑕᑯᓐ ᐱᒪᑎᓯᐅᓐ ᐃᔅᐱᔅ ᒥᒋᒻ, ᒪᒃ ᑭᔭ ᒥᔪᐤ ᐃᔅᐱᔅ ᐊᐱᒋᑕᐅᓇ ? ᑭᓄᐛᐱᒪᐧᑯᒡ ᐱᔭᓯᓯᒡ, ᓇᒪ ᓂᑕᐅᒋᑕᐅᒡ ᒐᒂᔪᐤ, ᓇᒪ ᑭᔭ ᒪᒧᓴᒋᓂᒐᐅᒡ ᑭᔭ ᓇᒪ ᒪᐅᒋᑕᐅᒡ ᒥᒋᒥᔪᐤ ᐊᐛᓯᓯᐅᒋᐛᐱᒡ, ᐃᔭᐱᒡ ᒪᒃ ᒍᑕᐎᐛᐛ ᒋᒋᒋᓯᑯᒡ ᐊ ᑕᔨᒋ ᐊᓯᒥᑯᐅᒡ᙮ ᓇᒪ ᓇ ᒋᔨᐛᐤ ᐅᔅᑕ ᒋᑦ ᐃᑕᔨᑕᑯᓯᓇᐛᐤ ᐃᔅᐱᔅ ᐱᔭᓯᓯᒡ ? ᐊᐛᓐ ᐊᑎᓯᔭᒄ ᒐᒋ ᐊᑎᑐᐤ ᔭᒋᑕᑦ ᐅᐱᒪᑎᓯᐅᓐ ᐊᔨᒪᔨᑎᒥᐃᑯᑦ ᒐᒂᔪᐤ ?”
“ᒐᒂᓐ ᐛᒋ ᐊᔨᒪᔨᑎᒥᐃᑯᔭᒄ ᐊᐱᒋᑕᐅᓇ ? ᑭᓄᐛᐸᑎᒧᒄ ᒪ ᐛᐱᑯᓇ ᓂᑕᐅᒋᑕᑭᓂᒡ ᑕᓐ ᐊ ᐃᓯ ᒥᔪ ᓂᑕᐅᒋᒋ ᑭᔭ ᐊ ᐃᔅᐱᔅ ᒥᔽᓯᔨᒋ᙮ ᓇᒪ ᐊᑐᔅᒐᒥᑭᓇ, ᓇᒪ ᑭᔭ ᐛᑕᔅᐱᓱᒥᑭᓇ᙮ ᐊᑯ ᒪᒃ ᒋ ᐎᑎᒪᑎᓇᐛᐤ, ᐊᑎ ᐊᓂᔭ ᒋ ᐃᔅᐱᔅ ᐛᔪᑎᓯᑦ ᐊᓂᔭ ᒋᓴᐅᒋᒪᐤ ᓴᓚᒥᓐ ᓇᒪ ᐅᒋ ᐃᔅᐱᔅ ᒥᔽᓯᔪᐛ ᐅᑦ ᐊᐱᒋᑕᐅᓇ ᐊ ᐃᔅᐱᔅ ᒥᔽᓯᔨᒋ ᐛᐱᑯᓇ᙮ ᒪᒃ ᒧᔭᒻ ᒋᓴᒪᓂᑐᐤ ᐅᒪ ᐃᓯ ᐊᒂᓇᐊᒧᒂ ᒥᔅᑯᓱᐛ ᓂᑕᐅᒋᑕᑭᓂᒡ, ᐊᓄᒡ ᐊ ᒋᓯᑲᒡ ᑲ ᑎᒂᒋ, ᐛᐸᒐ ᒪᒃ ᐃᔅᑯᑕᒡ ᒐ ᐃᓯ ᐛᐱᓇᑭᓄᐅᒋ, ᓇᒪ ᓇ ᐅᔅᑕ ᒋᔨᐛᐤ ᒋᑭ ᐛᑕᔅᐱᑎᑯᐛᐤ, ᐅ ᒋᔨᐛᐤ ᑲ ᐊᐱᓴᔅ ᒋᑕᑈᑎᒧᐅᓄᐛᐤ ?”
“ᐊᑲᐎᔾ ᒪᒃ ᒧᔅ ᒪᒥᑐᓇᔨᑎᒥᒄ ᒐᒋ ᐃᔅᒋᔄᔭᒄ, ‘ᒐᒂᓐ ᒐ ᒥᒋᔭᒡ ?’ ᑭᔭ ᒪᒃ ‘ᒐᒂᓐ ᒐ ᒥᓂᔭᒡ ?’ ᑭᔭ ᒪᒃ ‘ᒐᒂᓐ ᒐ ᒋᔅᑭᒪᒡ ?’ ᐛᔅ ᐊᐅᒄ ᐅᔭ ᒐᒂᔪᐛ ᒧᔅ ᐊ ᐃᑕᔨᑎᒥᐃᑯᒡ ᐊᓐᒡ ᐊᐛᓐᒋ ᐊᑲ ᑕᑈᔭᔨᒪᒡ ᒋᓴᒪᓂᑐᐛ᙮ ᐊᑯ ᒪᒃ ᒋᔨᐛᐤ ᒍᑕᐎᐛᐤ ᒋᒋᒋᓯᑯᒡ ᐊ ᑕᑦ ᒋᔅᒐᔨᑎᒻ ᒥᓯᐛ ᑕᓐ ᐊ ᐃᓯ ᓂᑐᐛᔨᑎᒪᒄ᙮ ᐅᔅᑕ ᐃᑕᔨᑕᑯᓐ ᓂᔅᑎᒻ ᓱᒃ ᒐᒋ ᓇᓂᑐᐛᔨᑎᒺᒄ ᒋᓴᒪᓂᑐᐤ ᐅᒋᓴᐅᒋᒪᐅᓐ ᑭᔭ ᒐᒋ ᐃᑐᑎᒺᒄ ᑕᓐ ᐊ ᐃᓯ ᓂᑐᐛᔨᒥᑕᒄ ᒐ ᐃᑐᐛᒄ, ᐊᑯ ᒐ ᒥᔨᑕᒄ ᒥᓯᐛ ᑕᓐ ᐊ ᐃᓯ ᓄᑕᐱᔨᐛᒄ᙮ ᐊᑲᐎᔾ ᐊᔨᒪᔨᑎᒧᒄ ᑕᓐ ᒐ ᐃᔅᐱᔨᒡ ᒐ ᐛᐸᒡ, ᐛᔅ ᒐ ᐛᐸᒡ ᒋᑭ ᐊᔨᒪᔨᑎᒧᒥᑭᓐ᙮ ᐛᔅ ᓴᔅ ᐃᔅᐱᔪᐤ ᑕᓐ ᒐ ᐃᓯ ᐊᔨᒪᔨᑎᒥᓐ ᐊᓄᒡ᙮”

Listen to ᒪᑎᔪᐤ 6