Bundeli Holy Bible Translation Project

तब योना ने बड़ी मछरिया के पेट में सें अपने यहोवा परमेसुर सें बिनती करके कई,
“मैं बिपदा में पड़ो हतो और उतईं सें मैंने यहोवा परमेसुर हों टेरो,
और ऊने मोरी सुन लई आय;
अधलोक के पेट के भीतरे सें मैं चिल्‍लया पड़ो,
और ऊने मोरी सुन लई।
तेंने मोय गैरे समंदर की थाह लौ डाल दओ
और मैं समन्दर के हिया में पड़ो हतो;
तोरी सबरी लहरें, जिनहों तेंने हुकम दओ हतो,
मोरे ऊपरै सें बह गईं।
फिन मैंने कई, ‘मैं तोरे सामूं सें काड़ दओ गओ आंव;
फिन भी तोरे पवित्तर भवन कुदाऊं फिन सें हेर हों!’
मैं पानू सें इतै लौ घिरो हतो कि
मोरे प्रान कड़बेवारे हते;
गैरो समंदर मोरे चारऊं कोद हतो,
और मोरी मूड़ में समुद्री सैवाल सो लिपटो हतो।
मैं पहाड़न की जड़ लौ पोंच गओ हतो;
मैं हमेसा के लाने धरती में बन्‍द हो गओ हतो;
फिन भी हे मोरे यहोवा परमेसुर, तेंने मोरे
प्रानन हों खदरा में सें उठा लओ आय।
जब मैं गैरहोस होन लगो, तब मैंने यहोवा परमेसुर हों
याद करो;
और मोरी बिन्‍ती तोरे लिगां बल्‍कि तोरे पवित्तर
भवन में पोंच गई।
जौन औरें बेकार की मूरतन पै हिया
लगात आंय,
बे अपने दया करबेवारे परमेसुर हों छोड़ देत आंय।
परन्‍त मैं ऊंचे सब्‍द सें धन्‍यवाद करके तोहों
बलिदान चढ़ैहों;
जो मानता मैंने मानी, ऊहों पूरी करहों।
कायसे यहोवा परमेसुरई बचाबेवारो आय!”
तब यहोवा परमेसुर ने बड़ी मछरिया हों हुकम दओ और ऊने योना हों सूखी धरती पै उगल दओ।

Listen to - योना 2