SAGARIA 13:1-9
SAGARIA 13:1-9 Bybel vir almal (ABA)
Daardie dag sal daar 'n fontein wees waar die nageslag van Dawid en die mense van Jerusalem hulle sonde en onreinheid kan afwas. Die Here wat oor alles regeer, sê: “Daardie dag sal Ek die name van die afgode laat verdwyn. Niemand in die land sal weer aan die afgode dink nie. Ek sal ook die profete en almal wat onrein is, wegvat uit die land. As daar nog iemand is wat 'n profeet wil wees, dan sal sy eie ouers, sy pa en sy ma, vir hom sê: ‘Jy mag nie lewe nie, want jy vertel leuens en dan sê jy die Here het jou gestuur.’ “Sy eie ouers, sy pa en sy ma, sal hom doodsteek omdat hy 'n profeet wil wees. “Elke profeet sal daardie dag skaam wees omdat hy gesê het die Here het vir hom gewys wat sal gebeur. Hy sal ophou om klere aan te trek wat mense laat dink hy is 'n profeet. Hy sal nie 'n rok aantrek van bokhaar-materiaal nie. Hy sal sê: ‘Ek is nie 'n profeet nie, ek is 'n boer. Ja, ek werk in my eie grond vandat ek jonk was.’ En as iemand vir hom vra: ‘Hoekom het jy stukkende plekke op jou bors?’ dan sal hy sê: ‘Iemand het my so geslaan toe ek by vriende gekuier het.’ ” Die Here wat oor alles regeer, sê: “Swaard, jy moet kom, jy moet die skaapwagter doodsteek wat naby My is. Jy moet die skaapwagter doodsteek, dan sal die skape weghardloop van mekaar. Dan sal Ek die lammers ook doodmaak. Die skape is my volk. Twee derdes van die mense in die hele land sal sterf, maar een derde van hulle sal oorbly. En Ek sal hierdie een derde wat oorbly, skoonmaak soos 'n mens silwer en goud in vuur smelt en skoonmaak. Dan sal my volk tot My bid, en Ek sal luister na hulle gebed. Ek sal sê: ‘Hulle is my volk,’ en hulle sal sê: ‘Die Here is ons God.’ ”
SAGARIA 13:1-9 Afrikaans 1933/1953 (AFR53)
IN dié dag sal daar 'n geopende fontein wees vir die huis van Dawid en vir die inwoners van Jerusalem teen sonde en onreinheid. En in dié dag, spreek die HERE van die leërskare, sal Ek die name van die afgode uit die land uitroei, sodat aan hulle nie meer gedink sal word nie; en ook die profete en die onreine gees sal Ek uit die land laat wegtrek. En as iemand nog wil profeteer, sal sy vader en sy moeder wat hom verwek het, vir hom sê: Jy mag nie langer lewe nie, want jy het leuens in die Naam van die HERE verkondig; en sy vader en sy moeder wat hom verwek het, sal hom deurboor as hy wil profeteer. En in dié dag sal elkeen van die profete, as hy profeteer, hom skaam oor sy gesig; en hulle sal die harige mantel nie aantrek om te lieg nie. Maar hy sal sê: Ek is geen profeet nie, ek is 'n man wat die grond bewerk; want iemand het my van my jeug af as slaaf gekoop. En as iemand vir hom sê: Watter wonde is daardie tussen jou hande? dan sal hy antwoord: So is ek geslaan in die huis van my vriende. Ontwaak, o swaard, teen my herder, en teen die man wat my metgesel is! spreek die HERE van die leërskare. Slaan die herder, sodat die skape verstrooi word; en Ek sal my hand weer uitstrek oor die geringes. En in die ganse land, spreek die HERE — twee-derdes sal daarin uitgeroei word, sal sterwe, maar een-derde daarin oorbly. Dan sal Ek die derde deel in die vuur bring en hulle smelt soos 'n mens silwer smelt en hulle toets soos 'n mens goud toets. Hulle sal my Naam aanroep, en Ek sal hulle verhoor. Ek sê: Dit is my volk! En hulle sal sê: Die HERE, my God!
SAGARIA 13:1-9 Afrikaans 1983 (AFR83)
Daardie dag sal daar 'n fontein oopgemaak word om die koningshuis van Dawid en die inwoners van Jerusalem te reinig van hulle sonde en hulle vuilheid. Daardie dag, sê die Here die Almagtige, laat Ek die gedagtenis aan die afgode verdwyn uit die land. Daar sal nie meer aan hulle gedink word nie. Ek gaan ook die profete en die gees van onreinheid uit die land verwyder. Wanneer iemand nog profeet probeer wees, sal sy eie pa en ma sê: “Jy mag nie lewe nie, want jy praat leuens in die Naam van die Here.” So 'n man se eie pa en ma sal hom doodsteek omdat hy profeet probeer wees. Daardie dag sal elke profeet in die verleentheid wees met die gesigte wat hy as profeet sien, en hy sal nie meer harige profeteklere aantrek om met sy bedrog aan te gaan nie. Hy sal sê: “Ek is nie 'n profeet nie, ek werk op die lande, iemand het my verkoop toe ek nog jonk was.” En as iemand vir die profeet sê: “Wat se wonde het jy dan op jou bors?” sal hy antwoord: “Iemand het my so geslaan in die huis van my vriende.” Kom, swaard, tref die herder in my diens, sê die Here die Almagtige, tref die man wat so na aan My is. Maak dood die herder, dat die skape uitmekaargejaag kan word. Ek sal self optree, ook teen die kleinstes onder hulle. Dwarsoor die land, sê die Here, sal twee derdes van hulle uitgeroei word en omkom. Daar sal net 'n derde van hulle oorbly in die land, en dié derde sal Ek met vuur louter soos silwer gelouter word. Ek sal hulle suiwer soos goud gesuiwer word. Hulle sal My aanroep, en Ek sal hulle gebede verhoor. Ek sal sê: “Hulle is my volk.” En hulle sal sê: “Die Here is ons God.”
SAGARIA 13:1-9 Die Bybel 2020-vertaling (AFR20)
“ Op daardie dag sal 'n fontein oopgemaak word waar die huis van Dawid en die inwoners van Jerusalem hulle sondes en •onreinheid kan afwas. “Op daardie dag,” is die uitspraak van die HERE, Heerser oor alle magte, “sal Ek die name van die afgode in die land uitwis, sodat hulle nie meer onthou sal word nie; en Ek sal ook die profete en die gees van onreinheid uit die land verwyder. En as iemand nog wil profeteer, sal sy vader en moeder wat hom in die wêreld gebring het vir hom sê, ‘Jy mag nie langer leef nie, want jy het leuens in die Naam van die HERE verkondig.’ Sy vader en moeder wat hom in die wêreld gebring het, sal hom deurboor as hy wil profeteer. “ Op daardie dag sal elkeen van die profete skaam wees vir sy visioen toe hy geprofeteer het. Hulle sal nie 'n harige kleed aantrek met die doel om te bedrieg nie, maar sal sê, ‘'n Profeet is ek nie, ek is iemand wat die grond bewerk, want iemand het my in my jeug al as slaaf gekoop.’ As iemand dan vra, ‘Wat is hierdie letsels op jou lyf? ’ sal hy antwoord, ‘Dit is hoe ek geslaan is in my vriende se huis.’ ” “Swaard, word wakker teen my herder, en teen die man uit my gemeenskap,” is die uitspraak van die HERE, Heerser oor alle magte. “Vel die herder neer, sodat die kleinvee uitmekaar gejaag word. Ek sal selfs my hand teen die geringes draai. In die hele land sal dit gebeur,” is die uitspraak van die HERE, “twee-derdes sal uitgeroei word, omkom, en 'n derde sal oorbly. En die derde deel sal Ek na die vuur bring en hulle louter soos 'n mens silwer louter, en hulle toets soos goud getoets word. Hulle sal my Naam aanroep en Ek sal hulle antwoord. Ek sal sê, ‘Hulle is my volk,’ en hulle sal sê, ‘Die HERE is ons God.’ ”
SAGARIA 13:1-9 Contemporary Afrikaans Bible 2023 (CAB23)
In dié dag sal daar 'n fontein wees vir die huis van Dawid en vir die inwoners van Jerusalem vir sonde en vir onreinheid. En in dié dag, spreek die HERE van die leërskare, sal Ek die name van die drekgode uit die land uitroei, sodat aan hulle nie meer gedink sal word nie; en Ek sal ook die profete en die onreine gees veroorsaak om uit die land te gaan. En as iemand nog profeteer, dan sal sy vader en sy moeder wat hom verwek het, vir hom sê: Jy sal nie lewe nie; want jy spreek leuens in die Naam van die HERE, en sy vader en sy moeder wat hom verwek het, sal hom deurboor as hy profeteer. En dit sal gebeur in dié dag dat die profete beskaamd sal staan, elkeen oor sy gesig as hy geprofeteer het; en hulle mag geen growwe kleed dra om te bedrieg nie; Maar hy sal sê: Ek is geen profeet nie, ek is 'n landbouer; want die mens het my geleer om vee te bewaar van my jeug af. En iemand sal vir hom sê: Wat is hierdie wonde in jou hande? Dan sal hy antwoord: Diegene waarmee ek in die huis van my vriende gewond is. Ontwaak, o swaard, teen my herder en teen die man wat my metgesel is, spreek die HERE van die leërskare: slaan die herder, en die skape sal verstrooi word, en Ek sal my hand teen die kleintjies draai. En dit sal gebeur dat in die hele land, spreek die HERE, twee dele daarin uitgeroei sal word en sterwe; maar die derde moet daarin oorbly. En Ek sal die derde deel deur die vuur bring en hulle smelt soos silwer gelouter word, en Ek sal hulle toets soos goud beproef word: hulle sal my Naam aanroep, en Ek sal na hulle luister: Ek sal sê: Dit is my volk: en hulle sal sê: Die HERE is my God.
SAGARIA 13:1-9 Die Boodskap (DB)
Wanneer die dag kom wat hulle verwag, sal ’n waterfontein oopgemaak word. By hierdie fontein sal Dawid se nageslag en die mense wat in Jerusalem bly, hulle was. Soos ’n mens jou was met water om skoon te kom, so sal hulle hulle was om ontslae te raak van alles wat hulle verkeerd gedoen het. Die Here is sterker en magtiger as alles en almal. Hy sê: “In dié tyd sal Ek sorg dat niemand in die land eens aan afgode sal dink of hulle name sal onthou nie. Ek sal nog verder as dit gaan. Ek sal al die mense wat maak of hulle profete van die Here is, uit die land laat verdwyn. Daarmee saam sal Ek die lus wegvat wat mense het om ander gode te aanbid. As iemand nog maak of hy so ’n profeet is, sal sy eie ma en pa vir hom sê: ‘Jy moet nie langer bly leef nie, want jy vertel leuens en dan maak jy of jy dit wat jy sê, by die Here gekry het.’ Sy eie ma en pa sal hom doodsteek omdat hy vals is.” In dié tyd sal die profete skaam wees om vir mense te vertel van die drome wat hulle gehad het. Hulle sal mense ook nie meer probeer flous nie. Daarom sal hulle nie die klere aantrek waaraan ’n mens kan sien dat hulle profete is nie. Hulle elkeen sal sê: “Nee, ek is nie ’n boodskapper van die Here nie, ek is ’n boer. Ek werk nog my hele lewe lank as ’n boer.” As iemand hom sou vra oor die littekens wat op sy bors is, sal hy antwoord: “Ek was by vriende se huis toe ek gewond is.” Die Here is magtiger en sterker as alles en almal. Hy sê dat die man wat vir Hom werk en sy volk oppas soos ’n herder skape oppas, met ’n swaard doodgemaak sal word. As hy dood is, sal die skape in verskillende rigtings uitmekaarspat. Die Here sal ook nie die gewone mense spaar nie. Twee derdes van die mense sal uit die land weggeneem word en hulle sal doodgaan. Die ander derde sal in die land agterbly. Die Here sê: “Ek sal hierdie derde van die mense wat in die land agterbly, suiwer maak. Ek sal dit doen soos daar gewoonlik met goud gemaak word. Die goud word in vuur gesmelt en suiwer gemaak. My volk sal deur moeilike omstandighede gaan, maar hulle sal beter mense anderkant uitkom. Hulle sal in gebed met My praat en Ek sal hulle antwoord. Ek sal sê: ‘Hulle is my eie mense, hulle behoort aan My.’ Op hulle beurt sal die mense sê: ‘God is ons Here.’”
SAGARIA 13:1-9 Nuwe Lewende Vertaling (NLV)
“Op daardie dag sal daar ’n oop fontein vir die koningshuis van Dawid en die inwoners van Jerusalem wees, ’n fontein om hulle skoon te maak van al hulle sonde en vuilheid. “Daardie dag, sê die HERE, die Almagtige, sal Ek die name van die afgode uit die land uitroei. Selfs die name van die afgode gaan nie meer onthou word nie. Ek gaan ook die vals profete en die onrein geeste wat hulle inspireer, verwyder. As iemand weer begin profeteer, sal sy eie pa en ma vir hom sê: ‘Jy mag nie lewe nie, want jy het leuens in die Naam van die HERE geprofeteer.’ Dan sal sy eie pa en ma hom doodsteek. “Op daardie dag sal niemand spog met sy gawe van profesie nie. Niemand sal profeteklere dra met die doel om ander te bedrieg nie. Hy sal sê: ‘Ek is nie ’n profeet nie; ek is ’n boer. Ek het my bestaan uit die grond gemaak vandat ek nog baie jonk was.’ “As iemand dan vra: ‘Wat is daardie wonde aan jou hande?’ sal hy sê: ‘Ek het die wonde gekry by die huis van my vriende!’” “Swaard, word wakker teen my skaapwagter, teen die man wat so naby aan My is, sê die HERE, die Almagtige. Tref die skaapwagter sodat die skape verstrooi kan word en Ek teen die lammers kan optree. Twee derdes van die inwoners van die land sal afgesny word en omkom, sê die HERE. Een derde sal oorbly in die land. Ek sal daardie groep deur vuur laat gaan en hulle suiwer, net soos silwer en goud deur vuur gesuiwer word. Hulle sal my Naam aanroep en Ek sal hulle antwoord. Ek sal sê: ‘Hulle is my volk,’ en hulle sal sê: ‘Die HERE is ons God.’”