2 Tésalonika 3
3
Ya pagsekat ni Pablo na panawagtawagan sakanan na mangintu-uway adti Tyumanem
1Na, sa diliꞌ pa nami tigkasen ya sulat ini, awun sekaten nami kamayu. Kay manga inulug, panawagtawagi beg kami adti Tyumanem na maksay mapa-edeꞌ ya Madyaw na Ubat-ubat kan Jisus adti madég pa na manga utaw aw dawaten nilan, kasiling na pagdawat mayu idtu muna. 2Aw panawagtawagi kami uman adti Tyumanem na tamengan kami nan adti manga utaw na mangkalatay, kay diliꞌ ya kadég na utaw alag nyangintu-u kan Kristu.
3Manang kasaligan saba ya kanaten Matas na Pangulu. Pakabagsegen nan ya pagpangintu-u mayu, aw tamengan kamu nan lekat adti manga kapandayan ni Satanas. 4Aw syumalig kami sa kanaten Matas na Pangulu na pigdalug mayu ya kadég na pigsuguꞌ nami kamayu aw padelegen pa mayu ya pag-imoꞌ seiy. 5Gagaden galu na Tyumanem ya kamayu anenganeng pada kalabetan mayu ya kadakulaꞌ na pagginawa nan aw tabangan kamu nan na mati-is mayu ya manga kalugan kasiling na kan Kristu.
Ya palna-u ni Pablo sa manga utaw na diliꞌ malim magtalabahu
6Na, kay manga inulug, magi sa katundanan na pig-atag kanami na kanaten Matas na Pangulu na si Jisu-Kristu, awun suguꞌ nami na dalugun mayu: Kun awun manga mangintu-uway na diliꞌ malim magtalabahu aw diliꞌ dumalug sa palna-u nami kamayu, pagpa-awat kamu kanilan. 7Kya-ede-an da mayu saba kun unu ya madyaw imo-un kay nya-imoꞌ kami pundinganan adti kamayu talana pa nami adti sayid mayu idtu na muna. Migtalabahu kami 8aw walaꞌ kami pagsekat sa makan na walaꞌ nami bayadi adti kamayu. Gabi aw allaw migtalabahu kami aw to-o kami nyapagud kay diliꞌ kami malim na kabegatan kamu asuntu kanami. 9Pig-imoꞌ nami yeiy pada silingan mayu kami, pangkay awun katundanan nami lekat adti kan Kristu na umbaꞌ kami galu atagan sa manga pigkapelek nami. 10Kay talana nami adti sayid mayu, maynini ya pigsuguꞌ nami kamayu: Pangkay singalan ya diliꞌ magtalabahu, diliꞌ sakanan pakanen.
11Pigpa-anenganeng nami yeiy kamayu kay pigdengeg nami na awun kunu manga utaw dun ni kamayu na diliꞌ magtalabahu. Kaliman nilan oloꞌ ya mangilabet adti manga imo-unun na eped na manga utaw. 12Yanagaw, asuntu na awun katundanan nami lekat adti kanaten Matas na Pangulu na si Jisu-Kristu, sumuguꞌ kami sa manga utaw yan na magtibulluk silan magtalabahu pada awun kakamangan nilan sa kanilan kapelekan.
13Manang kamu, kay manga inulug, diliꞌ kamu magkalumay dun ni imo-unun mayu na madyaw. 14Kun awun utaw adti kamayu na diliꞌ dumalug sa palna-u nami asini sulat ini, bantayi mayu sakanan aw diliꞌ kamu magpa-iyeped kanan, pada mamulamula sakanan. 15Diliꞌ mayu sakanan pag-imo-un po-on, manang palna-uwi mayu baling, kay inulug mayu sakanan dun ni pagpangintu-u.
Ya kamoliyan na piglong ni Pablo
16Na, ya kanaten Matas na Pangulu na lyekatan sa kalinaw, atagan kamu nan galu na kalinaw pangkay unu ya dumateng kamayu. Aw gayed kamu nan agad-agadan.
17Aku si Pablo ya migpirma asini katigkasan na sulat ini, kay yan ya kanak katanem adti kadég na sulat ku pada ka-ede-an mayu na ya sulat yeiy tengteng lekat adi kanak. 18Ayin pa aku galu na awun gayed ni kadég mayu ya grasya na kanaten Matas na Pangulu na si Jisu-Kristu.
Tans Gekies:
2 Tésalonika 3: klgv
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
© 2024, Wycliffe Bible Translators, Inc. All rights reserved.