2 Tésalonika 2
2
Ya utaw na to-o malatay na un dumateng adti kamoliyan na manga allaw
1Na, kay manga inulug, kaliman nami na to-o pa mayu mabangal ya paglikuꞌ na kanaten Matas na Pangulu na si Jisu-Kristu aw ya pagtipun nan kanaten dun ni dalem na langit. Migsekat kami na 2diliꞌ magkasagunut ya anenganeng mayu kun awun utaw na maglong na dyumateng da kunu ya allaw na paglikuꞌ ni Jisus. Diliꞌ mayu pagbetang adti kamayu ginawa ya piglong nilan, pangkay pigpa-edeꞌ kunu silan na Ispiritu Santo, aw pangkay miglong silan na yan kunu ya kanami pigpalna-u aw pigsulat. 3Diliꞌ kamu magka-agad-agad sa paglongun nilan. Pa-edeꞌ ku kamayu ya tengteng matinaw: Sa diliꞌ pa lumikuꞌ si Jisus, madég ya mayaw sa kanilan pagpangintu-u sa Tyumanem. Aw dun da kabukasi ya sambuk na utaw na to-o malatay na gayed mag-atu sa kadég na manga suguꞌ na Tyumanem, aw ya un nan datengan ya pa-emel-emelen na walaꞌ ya tyamanan. 4Ampangan nan ya kadég na pigsimba na utaw aw patasen nan ya kanan pagka-utawun. Mingkud sakanan adti seled na Témplo na Tyumanem pada kita-en na kadég na utaw, aw maglong sakanan, “Aku ya Tyumanem.”
5Kay manga inulug ku, walaꞌ pa gya mayu kalingawi ya kadég yeiy na piglong ku kamayu sa adtu pa aku ni sayid mayu dun ni Tésalonika. 6Kya-ede-an da mayu kun unu ya nyakatagen sa utaw yan taman adun na walaꞌ pa dateng ya allaw na bukasan sakanan. 7Pangkay adun migpalekat da na tagu-taguꞌ ya malatay na imo-unun na utaw yeiy. Aw magpadeleg na diliꞌ ka-ede-an mendaꞌ sa allaw na makamang da ya nyakatagen kanan. 8Aw pagkatigkas yan, bukasan da ya utaw yan na gayed lyumakad sa manga suguꞌ na Tyumanem. Manang sa paglikuꞌ na Matas na Pangulu tadun na si Jisus, degen nan ya utaw yan aw patayen nan magi dun ni kanan pag-eyep. 9Na, pada ka-ede-an mayu, sa diliꞌ pa degen ya utaw yan, una sakanan mag-imoꞌ sa madég na sallong kunu na milagru aw manga pangilala magi sa katulus ni Satanas. 10Aw imo-un nan ya kadég na punganan na malatay pada kagawayan ya manga utaw na agpet da pa-emel-emelen asuntu na walaꞌ nilan ginawayi ya katinawan na makapaluwaꞌ galu kanilan. 11Yanagaw pabaya-an da silan na Tyumanem na kagawayan silan pada pangintu-uwan baling nilan ya galuꞌ. 12Aw ya sampetan yeiy, pa-emel-emelen silan na Tyumanem kay pigkele͡an nilan ya matinaw aw pagkatutukan silan sa manga imo-unun na malatay.
Ya pagpaluwaꞌ sa manga utaw adti pa-emel-emel
13Kay manga inulug na pigginawa͡an na Tyumanem, gayed kami migpasalamat kanan asuntu kamayu. Kay lekat pa asini muna, dadan da kamu nan pigpamalliꞌ na un kamu paluwa-en magi dun ni paglinis na Ispiritu sa kamayu anenganeng aw magi sa pagpangintu-u mayu sa katinawan na lekat adti Tyumanem. 14Aw pigtawag kamu nan magi sa Madyaw na Ubat-ubat kan Kristu na pigpa-edeꞌ nami kamayu, pada makasambuk kamu dun ni kadyawan na kanaten Matas na Pangulu na si Jisu-Kristu. 15Yanagaw, kay manga inulug, pakasaliga mayu ya kamayu pagpangintu-u aw pagbetangan mayu sa ginawa ya kadég na pigdengeg nami na pigpalna-u nami kamayu, pangkay piglong da nami dun ni sayid mayu aw pangkay adti manga sulat na pigpadala nami.
16Na, nyanawagtawag kami adti kanaten Matas na Pangulu na si Jisu-Kristu aw adti Tyumanem na kanaten Ama, kay yan ya gyuminawa kanaten aw migpakabagseg sa kanaten ginawa na walaꞌ ya tyamanan aw nyatag sa dakulaꞌ to-o na pag-iman magi dun ni kanan grasya. 17Pakaganen galu na Tyumanem ya kamayu ginawa aw pakabagsegen kamu nan dun ni kadég na pigpan-imoꞌ mayu na madyaw aw kadég uman na piglong mayu.
Tans Gekies:
2 Tésalonika 2: klgv
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
© 2024, Wycliffe Bible Translators, Inc. All rights reserved.