2 Tésalonika 1
1
1Aku si Pablo aw ya kanak manga eped na si Silas aw si Timotiyo un magpadala sa sulat ini adti kamayu na awun ni syudad na Tésalonika na gayed migkatipun nyanimba sa Tyumanem na kanaten Ama aw kan Jisu-Kristu na kanaten Matas na Pangulu.
2Padatengen galu kamayu ya grasya aw kalinaw na lyumekat adti Tyumanem na yan ya Ama tadun aw adti kan Jisu-Kristu na kanaten Matas na Pangulu.
Ya pagpakabagseg ni Pablo sa manga mangintu-uway
3Kay manga inulug na nyangintu-u kan Kristu, diliꞌ mabatug na diliꞌ kami gayed magpasalamat sa Tyumanem asuntu kamayu. Yan ya umbaꞌ nami imo-un kay tyumulin ya kamayu pagpangintu-u aw migkadakulaꞌ ya paggaginawa͡ay na kadég mayu. 4Yanagaw pigsayaꞌ kamu nami adti manga mangintu-uway na migkatipun nyanimba sa Tyumanem adti eped na manga banwa, asuntu na nyati-is mayu ya kadég na manga kalugan aw manga pagpamulayam aw nyakapadeleg kamu dun ni kamayu pagpangintu-u.
5Aw yeiy ya puliba na matinaw ya pagbayaꞌ na Tyumanem sa pag-ukum nan sa manga utaw. Madég ya nyati-is mayu dun ni pagdalug mayu sa Tyumanem, yanagaw adti anenganeng nan umbaꞌ kamu maka-akup dun ni Kasakupan na Pighari-an nan. 6Kya-ede-an tadun na matinaw saba ya kanan pag-ukum dun ni pagpamulayam nan sa manga utaw na nyamulayam kamayu. 7Aw kamu na gayed pigpamulayaman, un kamu nan palagdengen eped nami. Ma-imoꞌ yeiy kagaya dun ni allaw na lumikuꞌ da ya kanaten Matas na Pangulu na si Jisu-Kristu eped nan ya kanan matulus na manga anghil. 8Dumateng sakanan na ka-epedan na laga aw un nan pa-emel-emelen ya manga utaw na migpalipaslipas sa Tyumanem aw ya manga utaw na walaꞌ dalug sa Madyaw na Ubat-ubat kan Jisus na kanaten Matas na Pangulu. 9Magti-is silan sa pa-emel-emel na walaꞌ ya tyamanan, aw ka-eletan silan adti Tyumanem, aw diliꞌ da nilan uman kita-en ya dakulaꞌ na kadyawan na katulus nan. 10Aw dun ni allaw na paglikuꞌ ni Jisus, to-o sakanan deyen na manga mangintu-uway aw to-o silan ma-enneng-enneng asuntu sa kadakulaꞌ na kadyawan na pagka Tyumanem nan. Aw maka-eped kamu saba kanilan kay nyangintu-u la kamu sa tingeg na Tyumanem na pigpalna-u nami kamayu.
11Aw yeiy ya du-an na gayed kamu nami pyanawagtawagan adti Tyumanem na imo-un kamu nan manga utaw na umbaꞌ sa pagtawag nan kamayu lekat pa asini muna. Aw migsekat kami kanan na gagaden kamu nan magi sa kanan katulus na un mayu tumanen ya kadég na kamayu pagkaliman na madyaw aw mabus mayu matigkas ya kadég na imo-unun na lekat adti kamayu pagpangintu-u, 12pada magi kamayu deyen na manga utaw ya ngalan na kanaten Matas na Pangulu na si Jisus, aw kamu uman madeyen asuntu kanan. Aw ma-imoꞌ ya kadég yeiy asuntu sa kallat na kanaten Tyumanem aw sa kallat ni Jisu-Kristu na kanaten Matas na Pangulu.
Tans Gekies:
2 Tésalonika 1: klgv
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
© 2024, Wycliffe Bible Translators, Inc. All rights reserved.