1 Tésalonika 5
5
1Na, kay manga inulug, walaꞌ da ya du-an na sulatan pa kamu nami kun kinunu ya pagkatuman na kadég yeiy aw unu alag ya un ma-imoꞌ kun malapit da ya allaw yan, 2kay kya-ede-an da mayu na diliꞌ imanmanen ya allaw na paglikuꞌ ni Jisus, kasiling na matakaw na diliꞌ mu imanmanen na dumateng sakanan na gabi. 3Maglong ya manga utaw, “Malinaw da! Walaꞌ da ya un tadun kallekan!” Manang biglaꞌ dumateng kanilan ya pa-emel-emel, kasiling na ka͡ubayan na biglaꞌ pyetesan, aw pangkay sambuk walaꞌ ya makapalaguy.
4Manang kamu, kay manga inulug, bekeꞌ kamu na utaw dun ni kangitngitan, kay kya-ede-an da mayu ya un dumateng, yanagaw diliꞌ kamu kabigla-an pangkay ya pagdateng na allaw yan kasiling na matakaw. 5Kay ya kadég tadun na nyangintu-u kan Kristu awun da ni kalalamdag aw walaꞌ da dun ni kangitngit. 6Yanagaw diliꞌ da tadun pagsilingan ya manga utaw na walaꞌ ya pagpangintu-u, kay kasiling silan na utaw na nyakatulug na walaꞌ nilan pag-imanmana ya un dumateng. Manang mag-inap aw magpakatanaw baling kitadun. 7Kay ya gabi, yan ya udas na pagpakatulug na manga utaw aw yan uman ya udas na pagkalangulangu na manga mag-inemay. 8Manang asuntu na kya-ilawan da kitadun na tingeg na Tyumanem, magpakatanaw kitadun kasiling na sundalu na syumut sa manga pagkanaꞌ na pigtampeng sa aba aw ulu nan. Maynan uman naten tamengan ya kanaten pagka-utawun magi sa pagpadeleg sa kanaten pagpangintu-u, aw ya pagginawa tadun sa manga eped na utaw, aw ya pag-awid sa kanaten pag-iman na paluwa-en kitadun. 9Kay pigtawag kitadun na Tyumanem. Aw ya pagtawag nan kanaten, bekeꞌ na pa-emel-emelen kitadun adti kamoliyan na allaw, manang yan baling ya tud nan na paluwa-en kitadun magi sa kanaten Matas na Pangulu na si Jisu-Kristu. 10Dun ni pagkamatay nan, yan da ya dyumawat sa pagpa-emel-emel asuntu sa manga salaꞌ tadun. Yanagaw, pangkay kun utaw pa kitadun sa pagdateng nan aw pangkay kun nyatay da, mabatug kitadun pa-eya-en adti tampid nan. 11Yanagaw padelega mayu ya pagpakabaseg sa ginawa na tagsambuksambuk kamayu aw ya pagpakasalig sa pagpangintu-u na kadég mayu, kasiling na pig-imoꞌ da mayu adun.
Ya katigkasan na palna-u ni Pablo
12Kay manga inulug, manginayuꞌ kami kamayu na basa͡an mayu ya manga nyapagud dun ni imo-unun na Tyumanem na awun ni kamayu. Silan ya miggagad aw migtuladaꞌ kamayu dun ni pagdalug mayu sa kanaten Matas na Pangulu na si Jisus. 13Aw ginawayi mayu silan asuntu sa kadyaw na manga pigpan-imoꞌ nilan. Aw pagsambuka ya ginawa na kadég mayu.
14Na, kay manga inulug, pigpakabagseg nami ya ginawa mayu na palna-uwan mayu ya manga mangkataka na magkaseb galu silan. Aw pakabagsega ya kamayu manga eped na malumay da ya ginawa. Aw tabangi mayu ya manga nyampakasungkul dun ni pagpangintu-u nilan. Aw pakatasa ya kamayu pasinsiya adti kadég na utaw. 15Diliꞌ mayu pagpakalaten ya manga migpakalat kamayu, manang gayed baling pakadyawa ya manga eped mayu aw kadég na utaw.
16Na, gayed kamu pagleya. 17Aw ya-i mayu pagbotoni ya pagpanawagtawag adti Tyumanem, 18aw pasalamati mayu sakanan pangkay unu ya un dumateng. Kay yeiy alag ya pagkaliman na Tyumanem na imo-un mayu, asuntu na nyakasambuk da kamu kan Kristu Jisus.
19Diliꞌ mayu pagbalabagan ya imo-unun na Ispiritu Santo adti kamayu. 20Aw diliꞌ mayu pagpalipaslipasan ya pag-ubat-ubat na utaw na pigsuguꞌ na Tyumanem. 21Manang pagtanda-en mayu ya kadég na piglong nilan, kun lyumekat adti Tyumanem aw walaꞌ. Kun unu ya madyaw, yan ya daluga mayu, 22aw pagpakawat kamu sa kadég na punganan na malatay.
23Na, ya Tyumanem na lyekatan sa kalinaw, yan ya gayed maglinis kamayu. Aw tunggu-an nan ya kadakulaꞌ na pagka-utawun mayu, dala ya anenganeng mayu aw ya kamayu kalaluwa aw lawas, pada walaꞌ ya pagsalaꞌ kamayu dun ni allaw na paglikuꞌ na kanaten Matas na Pangulu na si Jisu-Kristu. 24Ya Tyumanem na migtawag kanaten, kasaligan sakanan aw un nan saba yeiy tumanen.
25Kay manga inulug, panawagtawagi kami gayed adti Tyumanem. 26Aw pangumusta͡an kami adti kadég na inulug tadun na mangintu-uway. 27Aw magi sa katundanan na pig-atag kanak na kanaten Matas na Pangulu, paglongun ta kamu na diliꞌ mayu pagkalingawan ya pagbasa sa sulat ini adti asdangan na kadég na mangintu-uway.
28Ayin pa aku galu na awun gayed ni kamayu ya grasya na kanaten Matas na Pangulu na si Jisu-Kristu.
Tans Gekies:
1 Tésalonika 5: klgv
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
© 2024, Wycliffe Bible Translators, Inc. All rights reserved.