1 Corinto 7
7
Ya tubag ni Pablo sa manga usip aw ya palna-u nan sa kapangugnanay
1Na, awun manga usip na pigpadala mayu kanakeꞌ magi sa kamayu sulat. Ya sambuk na usip mayu: “Unu, matinaw ya palna-u na dyengeg nami na madyaw kun ya utaw diliꞌ mangugnan?” 2Ini ya tubag ku: Asuntu na awun madég na utaw na migkasala-enen, madyaw kun ya tagsambuksambuk na eseg awun ka͡ubayan nan aw yan da oloꞌ ya ipidan nan. Aw maynan uman ya tagsambuksambuk na ka͡ubayan mipid oloꞌ sa kanan eseg. 3Ya eseg na nyangugnan da, atag nan adti ka͡ubayan nan ya kanan pagka-utawun, aw maynan uman ya ka͡ubayan na nyangugnan da, atag nan adti eseg nan ya kanan pagkaka͡ubayan. 4Kay ya ka͡ubayan bekeꞌ nan ya tagtun sa kanan lawas manang yan saba ya tagtun ya eseg nan. Aw maynan uman ya eseg, bekeꞌ nan ya tagtun sa kanan lawas manang yan ya tagtun ya ka͡ubayan nan. 5Yanagaw dun ni kamayu kapangugnanay, ya-i mayu pagdemetan ya pagka-utawun mayu kantaw kun awun pakang mayu na diliꞌ pa kamu mag-ipid pada matibulluk ya pagpanawagtawag mayu adti Tyumanem, manang diliꞌ to-o madugay. Pagkatigkas yan, bagu la kamu uman mag-ipid pagaw magagad kamu ni Satanas adti imo-unun na malatay asuntu na diliꞌ mayu katagenan ya pagkaliman na kamayu pagka-utawun.
6Ini ya kanak mapaglong kamayu kun unu ya madyaw imo-un, aw bekeꞌ yeiy na suguꞌ na Tyumanem. 7Kaliman ku galu na masiling kamu kanak na walaꞌ pangugnan. Manang walaꞌ pag-unawa ya pig-atag na Tyumanem adti tagsambuksambuk kanaten.
8Na, awun paglongun ku kamayu na walaꞌ pa pangugnan aw sa manga nyabalu la. Madyaw pa na diliꞌ kamu mangugnan, kasiling na kanaken. 9Manang kun diliꞌ mayu katagenan ya pagkaliman na kamayu pagka-utawun, pangugnan da baling kamu. Madyaw pa na mangugnan ya utaw kay sa ti-isen nan ya pagkalim nan na diliꞌ katagenan.
Ya palna-u sa mangugnanay na kaliman nilan galu mag-ayaw
10Na, ini ya kanak paglongun adti manga mangugnanay na nyangintu-u la, aw bekeꞌ yeiy oloꞌ na kanak palna-u manang lyumekat saba adti kanaten Matas na Pangulu: Ya ka͡ubayan ka-ilangan diliꞌ nan pag-ayawan ya kanan eseg. 11Manang kun ayawan nan ya kanan eseg, ka-ilangan diliꞌ sakanan mangugnan sa eped na eseg. Madyaw pa na mag-uli-ay silan ya eseg nan. Aw maynan uman, ya eseg diliꞌ nan pag-ayawan ya ka͡ubayan nan. Yanagaw, diliꞌ madyaw na mag-ayaw ya manga mangugnanay.
Ya pagpangugnan na mangintu-uway sa utaw na walaꞌ pangintu-u
12Na, ini pa uman ya kanak paglongun adti eped. Walaꞌ ku ka-ede-i kun awun palna-u na kanaten Matas na Pangulu, manang ini ya kanak anenganeng: Kun awun eseg na nyangintu-u la manang ya ka͡ubayan nan walaꞌ pangintu-u, aw kun kaliman na ka͡ubayan na magsambuk pa silan, na, ka-ilangan diliꞌ pag-ayawan na eseg ya ka͡ubayan nan. 13Aw maynan uman, kun awun ka͡ubayan na nyangintu-u la manang ya eseg nan walaꞌ pangintu-u, aw kun kaliman na eseg na magsambuk pa silan, na, ka-ilangan na diliꞌ pag-ayawan na ka͡ubayan ya eseg nan. 14Asuntu saba sa ka͡ubayan na nyangintu-u la, ya eseg nan uman magkalapit da sakanan adti Tyumanem na un pa galu mangintu-u. Aw maynan uman, ya ka͡ubayan na walaꞌ pangintu-u magkalapit da sakanan adti Tyumanem asuntu sa eseg nan na nyangintu-u la. Yanagaw adti anenganeng na Tyumanem ya manga mangayseꞌ nilan magkalinis da uman. 15Manang kun awun mangugnanay dun ni kamayu na walaꞌ pangintu-u ya sambuk aw kaliman nan mayaw sa ka͡ubayan nan aw kun bekeꞌ yan sa eseg nan, pabaya-i la sakanan. Kun yeiy ya nya-imoꞌ, makaluwaꞌ da ya eped nan adti kapangugnanay nilan. Ya tengteng pagkaliman na Tyumanem na awun kalinaw na pag-eyaꞌ tadun. 16Kay walaꞌ mu ka-ede-i, ikaw na ka͡ubayan, pagaw mangintu-u pa ya eseg mu aw makaluwaꞌ adti pa-emel-emel na Tyumanem. Aw maynan uman, ikaw na eseg, walaꞌ mu ka-ede-i na mangintu-u pa ya ka͡ubayan mu aw makaluwaꞌ uman sakanan.
Ya pagdalug sa pagkaliman na Tyumanem
17Na, ya tagsambuksambuk kamayu na nyangintu-u la kan Kristu, padelega mayu kun unu ya pigpabetangan na Tyumanem kamayu kasiling na idtu na pagtawag nan kamayu. Yeiy ya piglong ku adti kadég na manga mangintu-uway pangkay ayin na banwa. 18Alimbawaꞌ, kun awun eseg na walaꞌ pa sakanan tawaga na Tyumanem aw migpatuliꞌ da sakanan kasiling na pigsuguꞌ dun ni Uldin na manga Judiyu, diliꞌ da nan pag-umanen ya pangilala sa pagpatuliꞌ nan. Aw idtu uman na walaꞌ pa katuliꞌ sa pagtawag kanan na Tyumanem, diliꞌ da ka-ilangan na magpatuliꞌ pa sakanan. 19Kay adti Tyumanem, pangkay pigtuliꞌ da kaw aw walaꞌ kaw tuli-a, mig-unawa la kitadun alag adti kanan. Manang ya dakulaꞌ na ma-untung tadun, yan saba ya pagdalug sa manga suguꞌ nan. 20Yanagaw ya tagsambuksambuk kamayu, padelega mayu kun unu ya pigpabetangan kamayu na Tyumanem kay pigtawag kamu nan. 21Aw kamu na manga allang na nyangintu-u la, diliꞌ da magkalat ya ginawa mayu. Manang madyaw pa galu kun paluwa-en kamu lekat adti pagka-allang mayu. Aw kun paluwa-en da kamu, magpadeleg kamu dun ni manga imo-unun na Tyumanem. 22Kay adti Tyumanem, ya allang na pigtawag da na Matas na Pangulu tadun, walaꞌ da sakanan ka-allang. Aw maynan uman, pangkay ya utaw na bekeꞌ na allang, manang kun pigtawag da na Matas na Pangulu tadun, nyatagtun da sakanan ni Kristu. 23Kay pigbayadan da kamu ni Kristu, yanagaw diliꞌ da kamu magpa-allang sa pangkay unu na asini tas na lupaꞌ. 24Yanagaw, kay manga inulug, ya tagsambuksambuk kamayu na nyangintu-u la kan Kristu, katingen kamu dun ni pigpabetangan kamayu na Tyumanem aw padelega ya pagdalug sa pagkaliman nan kay pigtawag da kamu nan saba.
Ya palna-u adti manga utaw na walaꞌ pa pangugnan
25Na, nyusip kamu uman kanak sa manga walaꞌ pa pangugnan. Walaꞌ ya suguꞌ na Matas na Pangulu tadun seiy, manang pigpakitaꞌ nan adi kanak ya kanan kallat pada makasalig kamu sa pangkay unu na paglongun ku. Aw ini ya kanak anenganeng: 26Asuntu na madég ya kalugan adun na manga allaw yeiy, kun unu ya kyabetangan mu, madyaw pa na padelegen mu. 27Ikaw na eseg, kun awun da tawas mu, ya-i pagbugtu-a ya pakang mu kanan. Kun walaꞌ pa ya tawas mu, madyaw pa na diliꞌ da kaw magpangugnan. 28Manang bekeꞌ saba na salaꞌ ya pagpangugnan. Aw bekeꞌ uman na salaꞌ kun mangeseg ya dalaga. Manang madyaw pa na diliꞌ da kamu magpangugnan kay kaliman ku na diliꞌ mayu ka-agiyan ya malug na pagpakabetang asini tas na lupaꞌ.
29Na, piglong ku yeiy, kay manga inulug, asuntu na tagbiꞌ dakman ya manga allaw tadun asini tas na lupaꞌ. Yanagaw lekat adun, diliꞌ mayu pagtumbay na ya kapangugnanay mayu yan ya magtagen kamayu sa pag-imoꞌ sa manga imo-unun na Tyumanem. 30Aw ya pagleya aw ya kakalatan na ginawa aw pangkay ya nyatagtun mayu, diliꞌ mayu pagtumbay na makatagen yeiy kamayu dun ni pag-imoꞌ sa pagkaliman na Tyumanem. 31Ya manga asini tas na lupaꞌ awun ma-untung tadun, manang diliꞌ mayu pagtibullukun ya anenganeng mayu dun, kay dumateng saba ya allaw na ya kadég yeiy alag ma-uman.
Ya manga kakaypengan na manga eseg aw manga ka͡ubayan
32Kaliman ku galu na walaꞌ ya kakaypengan mayu asini tas na lupaꞌ. Ya eseg na walaꞌ ya ka͡ubayan, mabatug nan tibullukun ya anenganeng nan adti imo-unun na Tyumanem aw kun unu ya makatutuk kanan. 33Manang ya eseg na awun ka͡ubayan nan, madég ya kanan kakaypengan sa pagpakabetang nilan asini tas na lupaꞌ, aw kun unu ya makatutuk sa ka͡ubayan nan, 34aw gayed matengaꞌ ya kanan anenganeng adti manga eped na imo-unun. Maynan uman ya ka͡ubayan na walaꞌ da ya eseg, aw ya dalaga na walaꞌ pa ya eseg nan, mabatug nilan tibullukun ya kanilan anenganeng adti pagkaliman na Tyumanem. Manang ya ka͡ubayan na awun da eseg, madég ya kanan kakaypengan sa pagpakabetang nilan asini tas na lupaꞌ, aw kun unu ya makatutuk sa eseg nan.
35Piglong ku yeiy pada sa kadyawan mayu, aw bekeꞌ na tud ku ya pagtagen kamayu. Kay kaliman ku na awun kalinaw na kamayu pag-eyaꞌ aw walaꞌ ya makabalabag sa kamayu imo-unun adti Tyumanem.
Ya eseg na awun da tawas nan
36Na, kun awun eseg na nyaypeng na pagaw diliꞌ maksay matuman ya pakang nan adti kanan tawas, aw diliꞌ da nan katagenan ya kanan ginawa na mangugnan, na, madyaw pa na mangugnan da silan. Kun mangugnan silan, bekeꞌ saba na salaꞌ. 37Manang ya eseg na masalig ya anenganeng nan, kun walaꞌ pa ya pakang adti mangkatikadeng na dalaga na pigginawa͡an nan, yanagaw yan ya magbayaꞌ kun mangugnan aw diliꞌ, aw madyaw pa na diliꞌ da mangugnan. 38Yanagaw ya eseg na mangugnan sa tawas nan, madyaw ya pig-imoꞌ nan. Aw ya eseg na diliꞌ mangugnan, to-o pa madyaw ya kanan pig-imoꞌ.
Ya palna-u sa nyabalu
39Na, ya ka͡ubayan na utaw pa ya kanan eseg, kenneꞌ nan saba kya-eketan na kapangugnanay nilan ya eseg nan. Manang kun matay da ya eseg nan, makapangugnan da sakanan adti eped na eseg na pigkaliman nan, aw ka-ilangan na mangintu-uway sa Matas na Pangulu tadun ya eseg na kaliman nan. 40Manang kun aku ya pabaya-en, madyaw pa ya kana ka͡ubayan na nyabalu kun diliꞌ da sakanan salut mangugnan. Aw ya kadég na pigpalna-u ku yeiy, kya-ede-an ku na piggagad na Ispiritu Santo ya kanak anenganeng.
Tans Gekies:
1 Corinto 7: klgv
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
© 2024, Wycliffe Bible Translators, Inc. All rights reserved.