1 Corinto 8
8
Ya pagkan sa pigdugsuꞌ adti tyumanem na galuꞌ
1Na, tubagen ku uman ya sambuk na usip na pigpadala mayu kanakeꞌ. Nyusip kamu: “Unu, tumbay kanami ya pagkan sa unud na ayep na pigdugsuꞌ na eped na utaw adti kanilan tyumanem na galuꞌ?”#8:1 Madég ya manga tyumanem na galuꞌ na pagdugsu-an aw pagsimba͡en na manga utaw dun ni Corinto. Aw pagsimba͡en nilan uman ya impirador na migdumala sa kasakupan na Roma. Matinaw saba na awun kya-ede-an tadun seiy asuntu na nyangintu-u la kitadun kan Kristu. Manang awun dun ni kamayu na iman nilan aw dakulaꞌ pa ya kanilan kya-ede-an kay sa kanilan manga eped. Yanagaw gayed silan migpatastas. Manang ya paggaginawa͡ay, yan saba ya tengteng migpa-iganget sa kadég tadun. 2Aw kun awun utaw na iman nan aw dakulaꞌ ya kya-ede-an nan, yan ya utaw na diliꞌ pa umbaꞌ ya kanan kyataga͡an. 3Manang ya utaw na dakulaꞌ ya pagginawa nan sa Tyumanem, yan ya pigkilala na Tyumanem na kanan utaw.
4Yanagaw ya usip mayu kun tumbay kamayu ya pagkan sa pigdugsuꞌ na eped na utaw adti kanilan tyumanem na galuꞌ, ini ya palna-u ku kamayu: Kya-ede-an da tadun na ya manga inutaw diliꞌ saba tengteng tyumanem kay pig-imoꞌ oloꞌ na utaw. Aw kya-ede-an da tadun uman na sambuk da oloꞌ ya Tyumanem aw walaꞌ da ya eped. 5Pigsaligan na eped na manga utaw ya madég kunu na manga tyumanem aw manga diliꞌ pagkita-en na awun ni dalem na langit aw asini kadakulaꞌ na banwa, aw pigsimba nilan. 6Manang kanaten na nyangintu-u la, sambuk da oloꞌ ya Tyumanem aw yeiy ya Ama na mig-imoꞌ sa kadég. Pig-atagan kitadun nan na ginawa pada basa͡an aw deyen tadun sakanan. Aw sambuk da oloꞌ ya kanaten Matas na Pangulu, na yan si Jisu-Kristu. Aw magi kanan nya-imoꞌ ya kadég, aw magi uman kanan awun ginawa na kadég tadun.
7Manang awun manga mangintu-uway na walaꞌ pa paka-edeꞌ kun tumbay kanilan ya kuman sa unud na pigdugsuꞌ adti tyumanem na galuꞌ. Aw asuntu na madég ya nyanalam sa pagsimba sa tyumanem na galuꞌ idtu muna, yanagaw kun kuman pa silan sa pigdugsuꞌ, adti anenganeng nilan liwan na kenneꞌ pa nilan migsimba sa tyumanem na galuꞌ. Yanagaw adti anenganeng nilan nyakasalaꞌ silan aw kyalipa-an uman ya kanilan anenganeng. 8Manang paglongun ta kamu na ya pagkan walaꞌ ya labet sa pagpalapit tadun adti Tyumanem. Kun kuman kitadun sa pigdugsuꞌ aw kun diliꞌ, diliꞌ saba ma-uman ya pagtandaw kanaten na Tyumanem.
9Manang miglong aku kamayu na magpakatanaw kamu sa pagkan mayu sa pigdugsuꞌ. Pagaw yan ya du-an na makasungkul baling ya manga eped na utaw na walaꞌ pa pakadalid ya kanilan pagpangintu-u. 10Alimbawaꞌ, kun awun utaw na walaꞌ pa pakadalid ya pagpangintu-u nan, aw ikaw na nyakadalid da ya pagpangintu-u, kyinitaꞌ kaw nan adti kakananan dun ni seled na témplo na pagsimba͡an na manga utaw sa tyumanem na galuꞌ, na, unu kaꞌ ya anenganeng nan? Pagaw magagad baling sakanan kuman, pangkay adti kanan anenganeng salaꞌ yan adti tengteng Tyumanem. 11Diliꞌ mayu pagkalingawan na nyatay uman si Kristu pada sa utaw yan. Aw pagaw magkalumay baling ya pagpangintu-u nan asuntu na kyuman kaw sa pigdugsuꞌ kay adti anenganeng mu bekeꞌ na salaꞌ adti Tyumanem. 12Aw yanagaw, nyakasalaꞌ kaw adti inulug mu kay nya-uman mu ya anenganeng nan aw migduwaduwa la baling sakanan. Kun imo-un mayu yeiy, nyakasalaꞌ kamu uman adti kan Kristu! 13Yanagaw, kun ya kanak pagkan, yan ya du-an na makasalaꞌ aw makasuway ya kanaken inulug, madyaw pa na diliꞌ da aku kuman sa unud na ayep pada diliꞌ makasalaꞌ ya kanak inulug.
Tans Gekies:
1 Corinto 8: klgv
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
© 2024, Wycliffe Bible Translators, Inc. All rights reserved.