1 Corinto 6
6
Ya manga lalimanda͡ay na alag mangintu-uway
1Kun awun sambuk dun ni kamayu na maglimanda sa eped nan na mangintu-uway, unu, madtu kaꞌ sakanan ni asdangan na mag-usayay na walaꞌ pangintu-u sa tengteng Tyumanem? Anangaꞌ diliꞌ nan baling dala͡en adti asdangan na manga mangintu-uway? 2Unu, walaꞌ mayu ka-ede-i na kagaya kamoliyan na allaw, kitadun na manga mangintu-uway ya mag-ukum sa kadég na manga utaw na walaꞌ pangintu-u sa Tyumanem? Yanagaw kun kamu ya un mag-ukum kanilan, anangaꞌ diliꞌ mayu mabatug usayan ya manga tagbiꞌ na usayenen? 3Walaꞌ kaꞌ mayu uman ka-ede-i na kitadun saba ya mag-ukum sa manga anghil? Kun maynan, mabatug saba mayu usayan ya mangkayantek na limanda dun ni kamayu. 4Yanagaw kun awun manga lalimanda͡ay dun ni kamayu, anangaꞌ mayu dala͡en adti manga mag-usayay na walaꞌ kilala͡a na manga mangintu-uway? 5Miglong aku sa maynini pada mamulamula kamu. Unu kaꞌ, walaꞌ ya manga utaw dun ni kamayu na matadeng mag-usay pangkay sambuk? 6Manang kamu la baling na alag mangintu-uway ya miglalimanda͡ay, aw adtu pa mayu pa-usayan ni asdangan na manga utaw na walaꞌ pangintu-u sa Tyumanem!
7Dun ni paglalimanda͡ay mayu, yan ya migmatinaw na pigdeg da kamu, kay yeiy ya bet na diliꞌ umbaꞌ sa manga utaw na dyumalug kan Kristu. Madyaw pa na ti-isen da mayu ya pagpakalat kamayu aw madyaw pa na kamu ya limbungan. 8Manang kamu la baling ya mig-imoꞌ sa malatay aw miglimbung sa kamayu manga inulug na nyangintu-u! 9Unu, walaꞌ mayu ka-ede-i? Ya manga utaw na mig-imoꞌ sa malatay, diliꞌ silan maka-akup adti manga kadyawan na awun ni Kasakupan na Pighari-an na Tyumanem. Yanagaw diliꞌ mayu paggawayan ya kamayu pagka-utawun. Ya manga magkasala-enen, aw ya manga utaw na magsimba sa tyumanem na galuꞌ, aw ya manga maglakadenen, aw ya manga magkakalimay na alag eseg aw maynan uman ya alag bubay, 10diliꞌ silan maka-akup adti Kasakupan na Pighari-an na Tyumanem. Aw maynan uman ya manga mangkatakaw, aw ya magkamang sa pangkay unu na pigkaybegan nilan, aw ya manga pala-inem sa magpakalangulangu, aw ya maglong sa malatay adti eped na utaw, aw ya manga matilimbungay. 11Aw ya eped kamayu idtu muna kasiling na maynan ya imo-unun. Manang piglinisan da kamu sa manga salaꞌ mayu aw pigtani la kamu na Tyumanem. Aw pigdawat da kamu nan kasiling na walaꞌ da ya salaꞌ magi sa kanaten Matas na Pangulu na si Jisu-Kristu aw magi sa pigpan-imoꞌ na Ispiritu Santo dun ni kamayu anenganeng.
Ya lawas na mangintu-uway eya-anan na Ispiritu Santo
12Pagaw awun utaw dun ni kamayu na maglong, “Pigtumbay kanak ya pag-imoꞌ sa pangkay unu.” Matinaw yan, manang diliꞌ ya kadég na pig-imoꞌ mu alag makakadyaw kanmu. Pangkay pigtumbay kanak ya pag-imoꞌ sa pangkay unu, manang diliꞌ aku magpa-allang sa pangkay unu na asini tas na lupaꞌ. 13Miglong ya utaw, “Ya kakan pig-imoꞌ pada seled adti buntit, aw ya buntit pada seledan na kakan.” Matinaw yan, manang dumateng ya allaw na lanasen na Tyumanem ya pagkaliman na lawas aw buntit. Aw ya tud na lawas na utaw bekeꞌ na pagkasala-enen, manang pig-imoꞌ ya lawas pada imo-un nan ya makatutuk sa Matas na Pangulu tadun, kay sakanan saba ya Pangulu sa lawas. 14Aw ya lawas tadun matawun na Tyumanem adti kamoliyan magi sa katulus nan, kasiling na pagmataw nan sa kanaten Matas na Pangulu. 15Unu, walaꞌ mayu kaꞌ ka-ede-i na ya kamayu lawas sugpat saba na lawas ni Kristu? Aw kun nyatagtun da ni Kristu ya kanaten lawas, diliꞌ saba tumbay adti eseg na atag nan ya kanan lawas adti bubay na miggalin sa pagkaka͡ubayan nan. 16Aw walaꞌ kaꞌ mayu uman ka-ede-i na ya eseg na mipid sa ka͡ubayan na maynan, ma-imoꞌ da sambuk ya lawas nilan? Kay yan ya pigpasulat na Tyumanem asini muna, “ya duwa silan ma-imoꞌ da sambuk.”#6:16 Mabasa adti Génésis 2:24. 17Manang ya utaw na nyakasambuk da adti Matas na Pangulu tadun na si Kristu, ya ispiritu na utaw yan nyakasambuk da uman adti kanan.
18Yanagaw pagpakawat kamu adti pagkasala-enen! Ya eped na manga salaꞌ na pig-imoꞌ na utaw, walaꞌ ya labet na lawas, manang kun magkasala-enen ya utaw, nyakasalaꞌ sakanan adti kanan lawas. 19Unu, walaꞌ mayu ka-ede-i na ya kamayu lawas, témplo saba na Ispiritu Santo na nyeyaꞌ dun ni seled mayu? Ya Ispiritu pig-atag kamayu na Tyumanem. Aw bekeꞌ mayu ya tagtun sa kamayu pagka-utawun 20kay pigbayadan da kamu nan. Yanagaw pagbasa͡an mayu ya Tyumanem dun ni kamayu lawas.
Tans Gekies:
1 Corinto 6: klgv
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
© 2024, Wycliffe Bible Translators, Inc. All rights reserved.