Psalm Late 94
94
A Theampo Thukhenpa Pathian
1 Topa awng, nangma in daan a pia Pathian na hi hi;
na thin uukna kilanghsak in!
2Nang sia mihing theampo ii thukhenpa na hi hi;
hong tho ta'n a, a kiphasakte amate taw a kiphu bangin daan na pia in!
3Mihing seksolte bang tanvei lungdam lai tu ziam?
Topa awng, bang tan khuangei lai tu ziam?
4Khialna lian neite bang tanvei kiphasak lai tu a,
amate khialna liante tungah bang tanvei kisuangtaak lai tu ziam?
5 Topa awng, amate in
na mite sucip hi;
amate in nangma ii mite
nengcip hi.
6Amate in meingong tangate thatlum uh a,
ih ngam sungah a teang
khualmite suamlum uh hi.
7Amate in, “Topa in ei hong mu ngawl hi;
Israel te ii Pathian in hong phawk ngawl hi,” ci uh hi.
8Ka mite awng, bangbangin
tuaza dongin mawmaw in ngoai thei nu ziam?
Bang hun ciangin tel tu nu ziam?
9Eite bil a vawt Pathian in za thei ngawl tu ziam?
Eite mittang a vawt Pathian in mu thei ngawl tu ziam?
10Minamte a hil a pau pa in
amate daan pia ngawl tu ziam?
Mihing theampo ii syapa ahi
ama in pilna nei ngawl ziam?
11Amate ngaisut sia Topa in he hi;
Amate khua ngaisutna telmeal a om ngawlzia ama in he hi. #1 Cor 3:20
12 Topa awng, nangma ii na lamlakte,
nangma ii na thukham na hil mite in bangza a lungdamte ahi ziam!
13Mihing seksolte mat natu in
vuum a kitaw dong
nangma in ama sia ngimna
hunte pan na ommuangsak hi.
14 Topa in a mite
nusia ngawl tu hi;
ama ii neisa mihingte
taisan ngawl tu hi.
15Thukhenzumte ah thutang khenna hong piang kik tu a,
a thutang mihing theampo in
tua thutang khenna panpui tu hi.
16Mihing seksolte langpanin
kei atu akua ding ziam?
Siatna a vawtte langpanin
kei sangah akua
hong pang ziam?
17 Topa in hong hu ngawl hi ka pole
a thimthuna ngam, a manlang tak ka zot zawk ngei zo tu hi.
18“Kei ka liik laitak hi” ka ci hi;
ahihang Topa awng,
nong itna kip in
hong khuangkhosak hi.
19Thintoi a ka thin a ngim simin,
nangma in nong heeneam a nong lungdamsak hi.
20Sumnguk ne thei thukhenmangte,
a khaikim ngawl thu, thutak a suate,
21Mihing phate a thasawmte
a maw ngawl khat thidaan a piate sia nang taw a kipawl thei bua uh hi.
22Ahihang Topa in kei
hong hung hi;
ka Pathian in kei hong dal hi.
23Ama in amate ngitlo hu in daan pia tu a,
a mawnate hu in susia tu hi;
Topa ih Pathian in amate lalcipsak tu hi.
Tans Gekies:
Psalm Late 94: SCB2
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
Siyin Chin Bible © Bible Society of Myanmar, 2016