Ọda 6
6
Ọda ene huu kere-kere
1“Imosiisi ka Ẹnẹyịmavara ana vị Ohomorihi Ansirẹrị ka ọnị ọ̀ sị ọda anị zụ wa, agụvị dị e saasa a ẹ̀ẹ naa sị ngụ ịnị ẹtẹ ọnị ọnị vaa sị yị wa. 2Ẹnịrị ezi anị, ne beri aazị ne chire ẹmaazị ẹ̀ẹ ka enee ku orubo, àa nyị ka e hị́ angwa Ẹnẹyịmavara, dị ẹ rẹ saasa ọda anị pooro. 3Batọ, wàa sị vụrị dị u saasa ọda ọnọọ nị, ẹhẹ awụ e zoza, dị wáa yara ịnị ẹtẹ ozoza ọnị Ẹnẹyịmavara ana vị Ohomorihi ohiku awụ nịnị hị́ eku anị yị wa. 4#Ịmk 12.29Batọ ẹwụ nịnị Anisirẹrị, Ẹnẹyịmavara ana vị Ohomorihi vị ọnyara. 5#Imt 22.37; Ịmk 12.30; Irk 10.27Sị avaba ayị awụ sì ịrẹyị Ẹnẹyịmavara ana vị Ohomorihi awụ, beri avaba ivehu ọnịrị avaba ụkata awụ. 6#Ọda 11.18-20Asị ụ hi ayị avaba ịrẹyị ana a ka yị wụ nịnị ajịnị aanị o. 7Tangwa sị ịrẹyị ẹnẹẹ zụ ezi ewu, waa ka yị wa ẹ̀ẹ yaayịtẹ, ịnị eehi, ẹnịnị àa zị ụsẹ oze, ẹnịnị ẹ hụ tịtẹ ọnịrị ẹ̀ẹ ha kwẹẹtẹ. 8Chẹrẹ ẹ tịtẹ sụ́ ọ kara ụvọ, sị mẹ amu kú, agụvị dị oō tama wa ayị. 9Chẹrẹ ẹ tụ́ ịnị ọchị oze ịnị eehi ọnịrị oze ọbanyị.
Ẹnẹyịmavara ộ kà ọ̀nọ̀ akamawụ
10 #
Oyn 12.7;
Oyn 26.3;
Oyn 28.13
“Ẹnẹyịmavara vaa sị ụ vẹ ịnị ẹtẹ ọnị ọ hị́ eku anị yị ohiku awụ nịnị Abụrahamị ọnịrị Ayiziiki ne beri Ijekọvụ. Ẹtẹ ọnọọ vaa nyị ẹkụra ẹbanyị-ẹbanyị ọnị we yị sị ụvọta awụ nịnị da. 11Irehi awụ nịnị vee hi yị ịsa irenyi-irenyi ọnị ikangga ọnị wẹ yị chị. Ụbazị awụ vee hi yị ọchị ịvayịnị ọnịrị orivi ọnị ẹ yị chire. 12Asị ụ hi ayị Ẹnẹyịmavara ana tụ wụ hụụnị irehi ọrịhị ịnị Ijipiti. 13#Imt 4.10; Irk 4.8Hi angwa Ẹnẹyịmavara ana vị Ohomorihi awụ, dị wa hẹkẹ ẹ, dị wa sị ịrẹha kẹnẹ hị́ eku. 14Asị ụ hẹkẹ ori ọnị aza ana kara wụ aa hẹkẹ. 15Wàa vavọọ mẹ Ẹnẹyịmavara ana vị Ohomorihi awụ vaa kụ́ ayị hi wu ẹtẹẹtẹrẹ. Ọ vaa vu wu hụrẹ ịrẹsụ ẹtẹ agụvị ka ọnị ana ya pe wu vị Ohomorihi anaā kụ́ ụhị. 16#Imt 4.7; Irk 4.12; Kụra 17.1-7Asị ụ zama Ẹnẹyịmavara re anka ụ mẹ mẹ Umasa. 17Re ka, waa saasa ọda Ẹnẹyịmavara ana vị Ohomorihi sị yị wụ. 18Mẹ ịsa ana vọrọ dị o zoza eyi Ẹnẹyịmavara waa vavọọ aa mẹ̀ ẹ o vee zee yị wụ, dị ụ dọ ẹtẹ ozoza ọnị Ẹnẹyịmavara hị́ eku anị yị ohiku awụ nịnị. 19Eyi awụ Ẹnẹyịmavara aa dụ ọnịvị awụ anka ọ mẹ ka a. 20Ụmẹ vaa vẹ ọnị ezi ewu nịnị vaa họ̀ wụ ụsẹ ka ịsị ẹ vị uruvo ọda ọnị Ẹnẹyịmavara ana vị Ohomorihi aanị vị. 21Ka yị wa ka ọrịhị ohinọyị Anijipiti ụ vịdị vị nị, dị Ẹnẹyịmavara va sị ụkata anị tụ́ wụ nịnị hụụ ịzọọ nị. 22Eyi awụ nịnị Ẹnẹyịmavara mẹ̀ ịvọpa ene hi ọza irenu ene chire Anijipiti ọnịrị Uhwarawo ne beri ovwoovu anị angwa. 23Ẹnẹyịmavara ọ kú wụ nịnị jịnẹ hụụ ịzọọ vaa ngụ ịzẹnị, ọnị ộ wo oto anị yị ohiku awụ nịnị nị. 24Dị Imosiisi ka Ẹnẹyịmavara ana vị Ohomorihi ẹnịnị ộ kà a ka ẹnị saasa ọda ọnọọ, dị ẹnị nyị angwahi anị nị, ọda ẹnẹẹ vị anaa mẹ ka o sere ẹnị. Avọọ ọ mẹ ya pooro tu ajịnị nị. 25Yaà sị ịzẹyịza saasa avaba ọda ọnị Ẹnẹyịmavara mẹ ẹhẹ ayị vị ana va hine Ohomorihi ayị.
Tans Gekies:
Ọda 6: EBTP
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
Ebira First Bible © Bible Society of Nigeria, 2014.
