1 Ịsamụwẹrị 1
1
Erikana ọnịrị anovwoovu anị
1Â nyị ụmẹ ọnya, dị a nyị ọnọrụ ọnya aanị ana aā hị́ Erikana ana ra Iraama. Iraama vị ọnyara ịnị ẹkụra ana yà ịrẹsụ ataba ịnị ẹtẹ Ehwireemi. Ada anị ọbanyị ịrẹmị-ịrẹma ọ rị Izuhwi nị. Ada Erikana ọ rị Ijerohami nị. Ijerohami vị ozi Erihu ana ada anị rị Itohu. Ada Itohu ọ rị Izuhwi nị. Ẹnịnị vị Anehwireemi. 2Erikana ộ nyị ọnẹẹ ẹẹva. Ọnyara ọ rị Ịhaana, dị ọsa ọnị rị Ipenina nị. Ipenina ọnị ộ ma ozi, ama Ịhaana ọnị vị ọbọrị. 3Erikana vị ana aā hụrẹ ẹkụra anịị nọ Isiro ịrayị-ịrayị naa hẹkẹ Ẹnẹyịmavara Ochẹtẹẹngụ dị ọ rẹ mẹ̀ ịsọvọ. Eri ọnịrị ezi anị ẹyịva ana aā hị́ Ihohwini ọnịrị Ihwinehasi vị ohirẹsụ irehi Ohomorihi.
Ayamụkụ ọhịnị
4Ịrayị-ịrayị Erikana ọọ̄ mẹ̀ ịsọvọ, dị ọ dà uye yi Ipenina ọnịrị avaba ezi anị ọnọrụ ọnịrị ọnẹẹ. 5Ịjị òo tu ka ọ̀ dà uye yị Ịhaana, dị ọ vara ụvọ dà a irenyi agụvị ka ọ nyayịnẹ sì ịrẹyị anị Ẹnẹyịmavara mẹ daka mẹ̀ ẹ ka ọ̀ vị ọbọrị nị. 6Ọhịnị anị Ipenina vị eneē sii ka ọnị ọọ̄ sune ayị ka ọ vị ọbọrị. 7Avọọ oō mee du ọ ayị ịrayị-ịrayị ẹnịnị ẹẹ nọ ịnị irehi Ẹnẹyịmavara nị. Dị ahịka Ịhaana ee sụ ùnè, dị ọ yị rị ịsa nị. 8Ọ̀ọ vavọọ ee sụ ùnè, di Erikana ọva anị re ne tù ọ dị ọ ka, “Ịhaana, sị ẹ vẹ di wee sụ ùnè dị wẹ̀ yị rị ịsa? Úú mee re? Aanị ka ẹmị ọnọnị o yi huna ezi ẹẹwụ yị wụ?”
Ịhaana ô pa ozi hụụnị Ohomorihi
9Ịjị ịsọvọ ta mẹ̀, dị ệ sị ịsa rị Isiro, dị Ịhaana kwẹẹtẹ dị ọ na mẹ̀ aduwa ọvịdị Ẹnẹyịmavara nị. Eri ana vị ohirẹsụ irehi Ohomorihi vị ana yaayịtẹ ịnị aga ọgụrị enoze irehi Ẹnẹyịmavara. 10Ayị Ịhaana vị ana nyayịnẹ du, di ee sụ ùnè ọ maa mẹ̀ aduwa hi Ẹnẹyịmavara. 11#Ịrị 6.5Ọ kà, “Ẹnẹyịmavara Ochẹtẹẹngụ, wèe re ụya ọnị maa rị aanị, dị ụ sị ozi ọnọrụ ọnyaa yị mị, ẹwụ mị vaa varẹma sịị yị pooro ịnị avaba ẹhẹ anị nị. Mẹ yị vaa kụ́ ọ ịrẹsụ pooro.” 12Ịhaana mẹ vavọọ tangwa aa mẹ̀ aduwa, di Eri ee re e nị. 13Eri ô re e ka irenu anị aa ha peepee ama ẹ yị kà ịrẹyị tụ́ ẹhẹ, di o ro ka vị Ịhaana sị eche hú nị. 14Di Eri va hí Ịhaana dị ọ ka, “Áá vọrọ ka we hu eche va ngụ ịzẹnị? Wẹ rẹ hụụnị eche ọyị hú ọgọnị.” 15Di Ịhaana ka, “Nda, me yi hú eche o! Ịrẹyị ịnị ẹngụ amị ana va mị ẹngụ hi m maa kà zụ̀ Ẹnẹyịmavara nị. 16Aarịhịnị asị u ro o ka ọnẹẹ odivi mị vị nị. Ịrẹyị ịnị ẹngụ amị ene ee du mi ayị ẹtẹẹtẹrẹ m maa dá ịpẹ anịị yị Ohomorihi nị.” 17Di Eri va ka ọọ na, ka ẹ yị vaa nyị ịrẹyị. Ọ kà Ohomorihi Anisirẹrị vaa sị ịsị ee sìi yọ. 18Dị Ịhaana kụ́ ọ avọ, dị ọ varẹma nọ ịnị eehi, dị ọ ngwara eyi hi, dị ọ rị ịsa nị.
Ịhaana ộ ma Ịsamụwẹrị
19Ịnị ẹnẹnẹ viri-viri eyinẹhẹ anị, dị ẹ kwẹẹtẹ, dị ẹ na hẹkẹ Ẹnẹyịmavara, dị ẹ varẹma nọ Iraama ana vị eehi ẹnịnị nị. E mè tù eehi, di Erikana nọ ịda Ịhaana ana vị ose anị nị. Ẹnẹyịmavara ộ wụ́ aduwa Ịhaana, 20Ịjị ọ naa mẹ ụmẹ chee, dị Ịhaana zyẹẹ, dị ọ ma ozi ọnọrụ nị. Dị ọ ka ịrẹha ozi anị ọnọọ ọ rị Ịsamụwẹrị nị. Ọ kà ọnị ộ pa a hụụnị ụvọ Ẹnẹyịmavara.
Ịhaana ộ sị Ịsamụwẹrị na yị Ohomorihi
21Ị́rayị mẹ̀ rẹ sị gẹ, di Erikana ọnịrị aneehi anị rẹ nọ Isiro ka ẹnị ẹ̀ na mẹ̀ ịsọvọ ẹnị ẹẹ̄ mẹ̀ ẹ yị Ẹnẹyịmavara ịrayị-ịrayị. Ọ̀ọ sị ịsọvọ ọnọọ mẹ, di o re sí ịzẹzẹ ọnị ọ zẹẹ Ohomorihi. 22Ịhaana ọnị ọ yị nọ ịnị ịrayị ọnọọ. Dị ọ kà a yị ọva anị ka ozi anị ọ̀ọ sị jị irenu ịrẹva ọnị vaa sị ọ naa yị Ẹnẹyịmavara, dị ọ kụkụ yà ịzọọ pooro. 23Di Erikana ka ooho, ẹ yị nyị ọ mẹ̀ kà. Ọ kà ọ̀ yà ini eehi pooro di ozi anị ọ̀ jị ịrẹva. Dị ọ rẹ ka Ẹnẹyịmavara ọ̀ navọ ọ̀ mẹ̀ ịsa ọnị ọ ka ọnị vaa mẹ. Ịzẹyịza dị Ịhaana yà ini eehi dị aa pa ozi anị pooro dị ọ jị ịrẹva nị. 24Ísamuwẹrị mẹ̀ sị jị ịrẹva dị ọ yị vị ozweyi, dị Ịhaana sị ọ dị ọnịrị ọ zị nọ ịda Ẹnẹyịmavara Isiro nị. Ọ́ màa na, ộ sị imaaru ịrayị ẹẹta ne beri ayị ọgụvọ ẹẹhị ọnịrị eche okoko ọnya za nị. 25Ịjị a sị ịsa ịsọvọ ọnọọ wụ̀, dị ọ sị ozi ọnọọ nọ ịda Eri nị. 26Dị Ịhaana kà, “Nda, wáá kụkụ yẹ mị aanị? Ẹmị ma vị ọnẹẹ ana jẹẹ ịzẹnị aa mẹ̀ aduwa hi Ẹnẹyịmavara ịhị ọnọọ nị. 27Ozi ọnị mị mẹ̀ aduwa ka Ohomorihi ọ̀ sị mị ịhị ọnọọ yị. Ẹnẹyịmavara ọ raà sị yị mị. 28Mị sị ọ vẹ ka ma sị va yị Ẹnẹyịmavara nị. Ịda anị ọ́ kụkụ vaa yà pooro ịnị avaba ẹhẹ anị nị.” Dị ẹ yà ịzọọ dị ẹ hẹkẹ Ẹnẹyịmavara nị.
Tans Gekies:
1 Ịsamụwẹrị 1: EBTP
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
Ebira First Bible © Bible Society of Nigeria, 2014.