John 16

1Ki ináíʼtanistsiiwa omáa Jesus ománikapiimiksi, “Óóki. Kómohtáíkayissanistohpoaawa áámostska ákanistsiistska kááhkohtsayiksiwáatoohsoayi kitomáíʼtakssoaayi aaʼnistsíísaawa. 2Kitsítsitapiihpoaawaiksi amohksi Jews kitákohtsaisskookoaayaawa otsítawaatsímoihkaahpoaawaistsi. Ki ákanistsiiwa omáa kitáksiʼnikkoaawawa ákanistsitsiihtaawa otawáátoaʼpanisttsissi mááhkaahsitakiáttsaahsi Áʼpistotookiyi. 3Ánni ákohtanistaʼpaissiiyaawa otsawáíssksinoahsaawa nínni ki niistóyi. 4Ánnohka kitsíkayissanistohpoaawa otáyakanisttsiihpiaawa. Ki ánniai aáoʼtsstsiisi otsítakanistaʼpaisspiaawa kitákitsaakiaissksinihpoaawa kitsííkaanistohpoaawayi.

Annííhka istsitsáomatapaaoʼsi áámohka kimátsitanistohpoaawa, takaa kitsítohpokaʼpaissiimohpoaawa. 5Ki ánnohkayii táksskitapoo nitóʼtsskooka, ki kitsínaoʼksaohtsopoahtsiiʼsakkihpoaawa nitáyaakitapoohpi. 6Ki kitáánistohsoaayi áámostska kómohtsiitaʼpohkoniitsiihtaahpoaawa. 7Óóki, kitákanistohpoaawa niitsiiyi. Itápssokaʼpiiwa kiistóaawa nitáksistapoohsi. Oʼtsítssksokaʼpiiwa. Nikátaaʼksistapóohtopi, omáahka kitáksspommookoaawahka Natowóttakahka mátakohkottsitapoowaatsi. Ki ayíístapóoiniki nitákitsitapsskoáwa kiistóaawayi. 8Ki ostóyi aáoʼtoosi kitákitaistamáatsookoaawa kátaʼyaomaiʼtakiiksi otsípahtsisskskaaʼtsimaanooayi. Áípahtsisskskaʼtsimiaawa manistsííhpi makáʼpiipaitapiʼssini. Áípahtsisskskaʼtsimiaawa manistsííhpi mokámoʼtsipaitapiiʼsini. Áípahtsisskskaʼtsimiaawa nanistáyaakokakihtsimáyihpiaawa. 9Mátomaiʼtookaiks. Ki ánniai stáminakowa otsípahtsisskskaʼtsissoaayi makáʼpipaitapiʼssini. 10Niistówa nitákitapoo nínna, ki kitáyaaksawattsinookihpoaawa. Ki ánniai ákstaminakowa otsípahtsisskskaʼtsissoaayi mokámoʼtsipaitapiʼssini manistsííhpi. 11Ki omíiska istínaayiska annóo ksááhkommi, omíiska Makaʼpatoʼsiiyiska ííkaiksistokakihtsimatawa. Ki ánnimayi stáminakowa otsípahtsisskskaʼtsissoaayi nanistáyaakokakihtsimáyihpiaawa.

12Óóki. Ánnoohka itsíístapakawoyi kááhkanistohpoaawaistsi. Ánnohka kimátakohkottanistohpoaawaistsaawa. Kitákiikómayikiʼtsiihpoaayaawa. 13Ki omáahka kitákohkokkoaawahka mokámoʼtaʼpiiyi, omáahka Natowóttakahka aáoʼtoosi kitákitókamoʼtsípiookoaawa kááhkiitaʼpokámootssksinimáatsookoohsoaayi. Anníístsiska kitákaistamattsíyiihpoawayistska ostóyi mátakohtoʼtsstsííwaistsaawa. Áánistahpistsi, ánnistskaoʼki kitákaistamáatsookoaawa. Ki kitáksíkayissaistamáatsookoaawa otáyaakanistsiihpi. 14Ákaistamatstohkatoma nanístsspsspi. Niistóyi ákohtoʼtoʼtsima anníístsiska kitákaistamátsiyihpoaawaistsi. Ákohtsitaistamatstohkatom nanístsspsspi. 15Nínna otsitapííwahsistsi ninóohkattohkanaináanatoohpiaawa. Ki ánnihkayi kómohtanistohpoaawa Natowóttaka ákohtoʼtoʼtsima niistói anníístsiska kitákaistamáttsiyihpoaawaistsi.

16Óóki. Mátaksisamowa kimátakattsinookihpoaawa. Ki áksipstsiksisamowa kitákattsitsinookihpoaawa.”

17Óóki. Istsíkiksi anníksiska ománikapiimikska sotámanisttsiiyaawa, “Tsaahtaa ááhkanistapawaanííwahtaoʼtsiks amoohka áámohka otáánikkihpihka, mátaksisamowa ákitsawattsinoawa; áksipstsiksisamowa ki ákattsitsinoawa. Ki tsááhtaa ááhkanistapawaaniiwa ákitapoowa ónni.” 18Ki máttaniiyaawa, “Tsáa niitapáwaaniiwa áámohka otaníssi, áksipstsiksisamowa. Místawaaniihpi.”

19Óóki. Jesus issksinóyiiwaiksi otsitsííhtaani mááhksopoahtsiisáyissaiksi. Sotámanistsiiwaiksi, “Óóki. Kómohtaisopoahtsiʼsattsiiyihpoaawa áámohka táániihpihka, mátaksisamowa kitákitsainookihpoaawa, ki áksipstsiksisamowa kitákattsitsinookihpoaawa. 20Óóki, kitákanistohpoaawa niitsiiyi. Kiistóaawa kitáyaakásanihpoaawa, kitáyaakaoyiʼtakihpoaawa. Kii kátaʼyaomaiʼtakiiksi áksotamiʼtaamssiaawa. Ki kiistóaawa ki táksikihkíniʼtakihpoaawa. Kii aipstsíksisamosi kitákitahtsoaiʼtaamssáttsootspoaawa. 21Ánnohka kiistóaawa niʼtói niitsiiwa omáa aakííwa áítamaaksikamotaawa. Issksiníma okáóʼtsstsissi otsítaksisttsoohkoyiʼpi; ki aiksistsípokaamisi omáa aakííwa mátakattohtsiksimsstááwa otsísttsoohkoyiʼssi. Áksotamikakohtsiʼtaamssiwa óómi otssitsímaani, otsipokááiʼssayi. 22Ki ánnohka niʼtói niitsiiwa, kiistóaawa kitáyaaksikihkíniʼtakihpoaawa. Kii kitákitamattsinoohpoaawa, ki ánnimayii kitákstonnatohsiʼtaamsspoaawa. Ki mátakitsstsiihpa kitóʼtomookoaayi kitsíʼtamssoaawayi. 23Ki ánniayii aʼnistáʼpisi kitákitsawattokamanikkihpoaawa. Kitákanistohpoaawa niitsiiyi. Áámostska kitsííkamanistahpoaawayi nínna, ikkámohtókamaniinoainiki kitámssoaayi omííksisk itomáíʼtakiiksi niistóyi kitákitohkokkoaawaistsi. 24Ánni kimátomaikakanistokamanistawaawa nínna. Ánnohka áókamanistok nínna. Kitákohtsitsiitaʼpiʼtaamsspoaawa.

25Omíístsi kitáánistohpoaawaistsi, nitsísttsksiʼpoatoohpiaawa. Ki áyaakoʼtsstsiiwa kitsítaksawattsisttsksiʼpoatohpoaayi, kitákohtsitsiʼtskaanistohpoaawa nínna. 26Ki ánnihka ksiistsikóyihka kitákohtokamanistawaawa nínna kitámssoaayi amííksisk itomáíʼtakiiksi niistói. Nimátawaaniihpa niistówa kitákanistomoohpoaawa nínna. Kitákohkottawattokamanistawaawa. 27Ostóyi kitákomimmokoaawa. Kiistóaawa kitákomimmokihpoaawa, ki kitáómaiʼtsiihpoaawa nómohtsistapoʼtoohsi nínna, ki ánnihkayii kómohtakomimmokoaawa. 28Nómohtsiistapoʼtoo nínna, ki annóo ksááhkommi nitsítoʼtoo. Ki nitáksiistapáatoohpa. Nitáksskitapoo nínna.”

29Óóki. Ki ánniai ománikapiimiksi otsítanikkaiksi, “Ki ánnohka kitáíʼtskanikkihpinnaana. Kimátsistsksiʼpoakkihpinnaan. 30Ki ánnohkayii nítssksiniihpinnaan kiistówa kitsíʼtsinissksiniʼpa. Omáa iikámsstaasi matápiiwa mááhkohkoissksinimaahsi kimátakstsinaisopoahtsiiʼsakka. Kiistówa kitáksotamikakanistawa otsitsííhtatoohpi mááhkssksinissi. Ki áámohkayii nómohtaomaiʼtsiihpinnaan kómohtoʼtoohsi Áʼpistotookiwa.”

31Jesus itanístsiiwáíksi, kááhksawáíʼtáʼpomaiʼtakihpoaawa. 32Ísstsiiyik. Áyaakoʼtsstsiiwa kitsítakohkanaisskikkihpoaawayi. Kitákohkanawániitoohpoaawa. Kitákitohkanawaaniitahkayihpoaawa. Kitákitsiʼtsítaisskikkihpoaawa. Ki niistówa nimátakitsiitaʼpiʼtsitaisskikkowa. Nínna nítohpokaʼpaissiimoka.

33Anníístska kitáánistohpoaawaistska, nómohtanistoohpiaawa kááhkohtoʼtoʼtsissoaayi iʼtáámáʼpi. Kitákohtsitoʼtoʼtsiihpoaawa iʼtáamaʼpii niistówa. Annóo ksááhkómma kitákítsinaokohkoyiʼpoaawa. Iikáʼkimaaka. Niistówa táítamaakssikaatstoʼpa saommitaʼpi annóo ksááhkomma.

Tans Gekies:

John 16: BLA

Kleurmerk

Kopieer

Vergelyk

Deel