John 15

1Óóki. Jesus sotámitotoisapsskanistsiiwa omónikapiimiksi, “Niistówa ánnaoʼka annaahka niitáʼpamiwahka ánni óómistska otsítaisaisskiihpi soyikapínniihpi. Ki nínna ánni áótoitsikatoomi amostsiska. 2Óóki. Omáa matápiiwa, áótoitsikatooma soyikapínniihpists, áakssaʼtsimiaawa. Ikkamítsstsiihki otsiníʼpi saoʼkaníksi mátohtohkoikioʼpi otsítsawayíínaʼsspi, áksotámsaoʼtsima. Kii omíístsi otsítayiinaʼsspi, áíksiʼkkaahkaanistotsimaistsi. Ki ánniai ákitsistapakayiinaʼsiyaawa. Niʼtóí niitsiiwa nínna ki niistówa.

3Kiistóaawa nínna kikáísikkaʼpssakkoaawa kisáómmitsitapiʼssoaawa. Kitáánistohpoaawaistsi, ánnihkaoʼka kómohtsiksikkaʼpistotootspoaawa. 4Óóki. Omiiya saoʼkániksi, manistsípoʼtsstsiihpi amíi mistsísi, niʼtóí kitáksstsinaaʼnistsakiohpipaitapiiyihpoaawa niistówa. Ki nitáksaakiohpipaitapii kiistóaawa. Omííya saoʼkániksi ikkámsawattsitsipoʼtsstsisi omiia miistsísi ákitsawattáyiinaʼsiwa. Kii niʼtóí niitsiiwa: kiistóaawa ikkámsawattohpipaitapiiyinoainiki niistówa, kipáítapiʼssoawaistsi mátakattohpanioʼpa. 5Niistówa ánni omii miistsísi. Kiistóaawa ánni annístsi sáoʼkaniksiistsi. Omáa ikkámohpipaitapiisi niistóyi, kii ikkámohpipaitapiiniki ostóyi iikákakawoi otánisttsissistsi iihtohkóíkioʼpistsi. Kiistóaawa ikkámsawattohpokaʼpaissiimokiinoainiki mátaakattónoaohtaohkoyikioʼpi kiistóaawa. 6Omííksi kátaʼohpipaitapiiksi niistóyi, niʼtói ákanistotoayi ánni kátaʼohpanioʼpists saoʼkániksiistsi. Amíístsi saoʼkániksistsi áksistapaapiksiihpi. Ki aihkitsíksiisoyisaawa ákitomoipohtoohpiaawa. Ákitsóyaapiksiihpiaawaa amiia pakóyittsi. Ákohpitohpakoyittsiiyaawa. Ánnia ákanistotoayaawa omííksikátaʼohpipaitapiiksi niistóyi.

7Óóki. Ikkámohpipaitapiiyinoaainiki niistówa, kii ikkámsawaatstoominoainiki nítssksinimaatstohkihpistsi, kitáksotamanikkihpoaawa kitáyaakanikkihpoaawayi, ki ánniai ki tákitanisttotomoohpoaawa. 8Kiistóaawa iikákakawo iihtohkóíkioʼpistsi kitánisttsissiistsi, ki ánnihkayi nínna ákohtsitsspimmawa. Ki ákstaminako kiistóaawa kitámssoayi omiiksiska itomáíʼtakiiksi niistói.

9Nanistákomimmíyihpi nínna, kitáítotoisapakomimmohpoaawa. Pinipóʼtsita kitákomimmohsoaayi. 10Óóki. Ikkamánistaiʼtsiminoainiki, nitokákihtsimaanistsi, kitákohtitsayipoʼtsiihpoaawa kitákomimmohsoaayi. Niiʼtói nanistánistaiʼtsiihpiaawa nínna otokákihtsimaanistsi ki ánnihkayii nómohtsayipoʼtsiihpa nitákomimmíyisi.

11Óóki. Áámostsi nómohtanistoohpi kááhkitaikakitaiʼtaamiʼtakssoayi. Nitááhsiʼtakssini kitákohtoʼtsiiʼtaamsspoaawa, ki ánnihkayii nómohtanistoohpa amóstska kitáánistohpoaawaistska.

12Óóki. Áwakomimmotsiiyika. Ánniai kanistókakohtomoohpoaawa. Kanistákomimmohpoaawayi, istotóísapakomimmotsiiyika. 13Kitákanistohpoaawa manistsííhpi istohkanáíʼtaʼpakomimmihtaani: Omáa iimátskaohsiwa mááhkohtahtsawaiʼnssi otákkaaiksi, ánnahkaoʼka istohkanáíʼtaʼpakomimmiiwaiski. 14Kiistóaawa kitákkáamokihpoaawa ikkamánistaiʼtsiminoainiki kitokákohtomoohpoaawaistsi. 15Nimátakattaniihpa kiistóaawa kikákanikapiimatohpoaawa. Takaa omáa áyanikapiimatawa, mátakssksinima anniska otáánikapiimakkiska otáwanisttsiihpiayi. Niʼtói kimátanistsspoaawa. Kítssksinimáatsoohpoaawa nítohkanawaaníyihpistsi nínna. Nááhkanisttsissi. Nimátakattaniihpa kikákanikapiimatohpoaawa. Ánnohkayi tákahtsawaanii kitákkaamohpoaawa.

16Kiistóaawa, kimátssiikoʼtookihpoaawa. Niistówa kítssiikoʼtoohpoaawa. Kanistsípoʼtoohpoaawa kááhkohkanawániitoohsoayi. Kipáítapiʼssoaawayi ákitohtoʼtsistapitsstsiiwa iihtohkóíkioʼpi. Kii áámohka iihtohkóíkioʼpihka mátakssikihtsííwaatsiksi. Ki ánnimayii aokámanistainoainiki nínna ikkámohtokamanistainoainiki kitámssoayi amííksiska itomáíʼtakiiksi niistóyi kitákítohkanaohkokkoaawa kitsííkamanistahpoaawayi.

17Áwaakomimmotsiiyika. Ánniayi kanistókakohtomoohpoaawa.

18Óóki. Aiʼkáímmotsiinoainiki kátaʼyaomaiʼtakiiksi issksiníkaaki niistáwa ánniskaoʼkinayi otsíítomíkaimmawaawayiska. 19Kitsítoʼtsspoaawopi kátaʼyaomaiʼtakiiksi kitákitakomimmokoaayaawa. Áwattakomimmotsiiyaawa. Ki kiistóaawa kómohtssikahksipoʼtoohpoaawa kááhksawattsitoʼtssoaayi kátaʼyaomaiʼtakiiksi, ki ánnimayii kitákohtsíkaimmokoaayaawa.

20Óóki. Pináatstooka anniihka kitáánistohpoaawayihka. Kitsítotoisapsskanistohpoaawa omáa áʼpaoʼtomohkiwa mátoʼtsitsksspssiiwa otsínaaimi. Omííksi kátaʼyaomaiʼtakiiksi nitsaákamoʼsistotookiaawa, kiistóaawa kitákstamoohkattsaókamoʼtsistotookoaayaawa. Mátanistaiʼtsímaiks nitáániihpi. Ki ánnimayi ákstamoohkattsitsawanistaiʼtsimiaawa kitáániihpoaawayi. 21Mátssksinoyiiyaawa anniska nitóʼtsskookiska, Áʼpistotookiiyiska. Ki ánnihkayii kómohtakanisttotookoaayaawa áámostska kanáókaʼpistska. Kitákohtanisttotookoayaawaistsi niistóyi kitomáíʼtookssoaayi.

22Niistówa nikátaiʼtoʼtoohtopi nikátaiʼsitsipssatayaawopi ánnohka mátakohtotoiʼmáwaiksaawa makáʼpii. Ki nítssitsipssatayaawa, ki ánnohkayii mátakohkoiʼpoatomoohsíwaiksa.

23Omáa nitáíkaimmoka, noohkáttsíkaimmiiwa nínni.

24Nitsítsspianisttsiihpistsi ótapiʼssina, mátonoaitsstsiihpa noohkíítssimmi ánni ááhkanisttsi. Nikátaaʼnisttotsiihtopiaawa mátakohtotoiʼmáwaiksaawa makáʼpii. Ki nitánisttotsiihpiaawa, ki ánnohkayii nitsinóókiaawa, ki nimískitsíkaimmokiaawa, kii nínni. 25Áámohka manistáíhkaʼsspiaawa itsíkayissiinaapsskohkatoʼpa natóísinaakssini ákanistaihkaʼsiiyaawa. Ki ánnihkayii iihtanístaisiiwa. Ómohtawaatsímoihkaahpistsi sináákssiistsi, itssínaiʼpa nitáksiksisstoitsíkaimmokiaawa.

26Omááhk kitáksspommookoaawahka ákoʼtoowa. Ostóyi nitákohtoʼtsskoawa anniska nínniska. Ánnahkaoʼka Natowóttakahka. Kitákohkokkoaawa mokámoʼtaʼpi. Ostóyi ákohtoʼtoowa nínni, ki ákaistamatsiiwa matápiiyi nitámihpi. Ki tákohtssksinimaatsookoaawa niistóyi.

27Kii kiistóaawa kitákaistamáatsaawaawa ótapiʼssini nitámihpi. Takaa kiistóaawa kitsítohpokaʼpaissiimokihpoaawa istsitsáomatapaaoʼsi ki ánnohka.”

Tans Gekies:

John 15: BLA

Kleurmerk

Kopieer

Vergelyk

Deel