Sagaria 10
10
Die Here belowe Hy sal sy volk laat terugkom
1Wanneer julle reën nodig het, maar dit reën nie, dan moet julle vir die Here reën vra. Dit is die Here wat die wolke vol water maak sodat dit hard kan reën. Dit is Hy wat reën gee vir die plante in die veld. 2Ja, julle moenie glo wat die afgodsbeelde sê nie, hulle woorde beteken niks en die mense wat dink hulle weet wat ander mense nie kan weet nie, lieg vir julle. Hulle sê hulle het gedroom en hulle sê dit sal reën, maar dit is nie waar nie, daar gebeur niks. Julle het vir die afgodsbeelde en vir daardie mense gevra wat sal gebeur. Daarom kry julle swaar soos skape wat verdwaal het omdat hulle nie 'n wagter het nie.
3Die Here sê Hy is kwaad vir die leiers van die volk en Hy sal hulle straf omdat hulle verkeerd gedoen het. Ja, die mense van Juda is die skape van die Here wat oor alles regeer, en Hy het hulle gestraf. Maar hulle sal nou die Here se perde wees en Hy sal trots wees op hulle. Hy sal hulle gebruik om oorlog te maak. 4Daar sal nou leiers uit Juda kom wat sterk is. Hulle sal so sterk wees soos hoek-klippe en tentpenne. Die Here sal hulle gebruik om oorlog te maak soos 'n mens 'n pyl en boog gebruik. Die vyande wat die mense van Juda verdruk het, sal nou moet vlug. 5Die nuwe leiers sal sterk wees soos soldate wat op die vyande trap, soos 'n mens trap op modder in die strate. Die nuwe leiers van Juda sal oorlog maak teen hulle vyande, want die Here is by hulle. Hulle sal ook die vyande wat op perde ry, laat vlug.
6Die Here sê: “Ek sal die mense van Juda sterk maak, maar Ek sal ook die mense van Israel, die nageslag van Josef, help. Ek sal hulle laat terugkom, Ek sal weer goed wees vir hulle. Dit sal lyk of Ek hulle nooit gelos het nie. Ek sal dit doen, want Ek is hulle God die Here. Ek sal luister na hulle gebede. 7Die mense van Efraim sal soos goeie soldate wees. Hulle sal bly wees soos mense wat wyn gedrink het. Hulle kinders sal sien wat Ek gedoen het, en hulle sal ook bly wees. 8Ek sal vir die mense van Efraim fluit om hulle te roep en Ek sal hulle bymekaarmaak. Ja, Ek sal hulle red, en hulle sal weer so baie wees soos voorheen. 9Ek het hulle weggevat en Ek het hulle tussen ander volke laat woon. Hulle was ver weg in ander plekke, maar hulle het aan My gedink. Daarom sal hulle en hulle kinders lewe, en hulle sal terugkom. 10Ek sal hulle bymekaarmaak en terugbring uit Egipte en Assirië, Ek sal hulle bring na die land Gilead en die Libanon-berg. Daar sal nie genoeg plek wees vir hulle nie. 11Hulle sal deur die water gaan waar dit nie breed is nie. Hulle sal op die branders slaan, en die Nyl-rivier sal droog word, ook die diep plekke in die rivier. Dan sal die mense van Assirië nie hoogmoedig wees nie, en die Egiptenaars sal nie regeer nie. 12Die mense van Efraim sal sterk wees omdat Ek by hulle is. Mense sal sien hulle behoort net aan My.”
Dit sê die Here.
Tans Gekies:
Sagaria 10: ABA
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© Bybelgenootskap van Suid-Afrika 2007. Gebruik met toestemming. Alle regte voorbehou.