Asmani kitab: Sulaimani misal 24
24
Nosiot 19
1Naformanor laḳan tumi, oitae saio na,
tarar loge roibar asha, mono anio na.
2Tarar dile sinta ḳore, zulum ḳorar fondi,
tarar ṭuṭe ḳoy to ḳali, burai korar lagi..
Nosiot 20
3Gian ḳaṭaia gor banae, zogotor shob zone,
aḳol-buddie boail raḳe, ita hoḳoltare.
4Hekmot ḳaṭai hazail oy, goror fura bitor,
dami dami mal-samanae, ḳora oy shundor..
Nosiot 21
5Giani zonor ase nichchoy, bout beshi kemota,
gian-buddie baṛae takkot, forman dey ota.
6Laṛai-zuddot gele tumi, shu-foramish lage,
foramish deora bout oile, zuddor maṭo zite..
Nosiot 22
7Be-aḳol manshor lagi gian, tar lagalor baire,
shomazor mozliso matar, tar shaiddo nai re..
Nosiot 23
8Bod ḳamor niot ḳoria, zei zon gure-fire,
ku-motlobi koia ḍake, hoḳol manshe tare.
9Ammokor monor motlob-u, oilo gia guna,
ṭaṭṭa-moshkora ḳorrare, hoḳole ḳore ginna..
Nosiot 24
10Mosibotor din aise ḳori, leṭi gele tumi,
taile tumar shokti-shaosh, nai to temon beshi..
Nosiot 25
11Moronor rae deḳle tumi, kunu nirdushir ufre,
moutor goro nergi zare, zane basao tare.
12Ḳo zudi, “Zantam na to, i befare kunta,”
dilor uzon ḳoroin zein, deḳoin na ni ita?
Tumar kial raḳoin zein, tain zanoin na ni?
Amol-noma mafik fol to, shobre diba na ni?
Nosiot 26
13Mou ḳaoa to bout bala, ore fut amar,
saḳ bangia mou ḳaile, moza lagbo tumar.
14Gian-o ola tumar lagi, zania rakio ita,
gian faile bobishot faibae, bangto nae to asha..
Nosiot 27
15Naformane ut fatio na, forezgaror baṛite,
binash ḳorio na kunu din, tar boshot ḳanare.
16Shatbar foṛle-o hirbar uṭe, forezgar zon ze,
bifod aile naformane, usṭa ḳaia foṛe..
Nosiot 28
17Tumar dushmon leṭi gele, oio na kushi,
usṭa ḳaile-o tumar dile, na ḳorouk furti.
18Arnae ota dekia hari, bezar Mabude,
tan gusare horailiba, ogur ufor tone..
Nosiot 29
19Ḳobis manush deḳle to, mon ḳaraf ḳorio na,
naformanor laḳan tumi, oitae saio na.
20Bobishot to andair oy, ḳobis-bojjat zonor,
zindegi batti nibi zae, naforman oḳlor..
Nosiot 30
21Mabudre ḍoraio re fut, bashshare-o ḍoraio,
erar dushmonor loge tumi, baiafi na ḳorio.
22Aḳta-u to itar ufre, azibo mosibot,
Mabud ar bashshae ḍaliba, ḳe zane kun gozob?
Gianir aro nosiot
23Giani guni zone to, ota talim hikae,
bisaro fokkofat ḳora, muṭe-u bala nae.
24Dushi zonre zegie ḳoy, “Tumi to nirdushi,”
nanan zati nanan desho, tare ḳoy “Lannoti.”
25Dushire zara “dushi” ḳoy, tarar balai nichchoy,
rohom-borkot tara fae, tara to shuki oy..
26Kula-mela shoṭik zuaf, dile lage zela,
ṭuṭor maze maya dile, moza lage ola.
27Zomin zuit-zait ḳoria, fol-foshol folao,
bairor ḳam shesh ḳoria, nizor gor banao.
28Ari-forir birudde tumi, misa shakki dio na,
tumar mukdi sol-soturi, kunumonte ḳorio na.
29Olaḳan mat matio na, “More ḳorse zeta,
ami-o tare ḳormu ola, dilaimu tar bodla..”
30Alshiar ḳetor galabae, aslam ami zaoat,
be-aḳolor angur baganor, geslam ami kasat;
31ami deḳlam hoḳol zagat, gosae-ḳaṭae bora,
sutra gase gurise zomi, iṭor oal bangia.
32Ota deḳar bade ami, kial ḳori sailam,
kial ḳorae hiklam ami, noya aḳol failam:
33Alshiae ḳoy, “Aro gumai, tuṛa shomoy ungai,
tuṛa aram faoar lagi, at bitre harai.”
34Te aḳta-u aibo aḳal, suror laḳan ḳori,
obab-o aibo ou laḳan, ḍaḳaitor besh dori..
Tans Gekies:
Asmani kitab: Sulaimani misal 24: sylL
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
© Ahle Kitab Society. All rights reserved.