Asmani kitab: Sulaimani misal 14
14
1Giani beṭie shongshar gate,
be-aḳol boue shongshar bange.
2Hok fote solrae ḍorae Mabudre,
ela ḳore tanre beḳa fotie.
3Ammokor muko gorima gozae,
gianir ṭuṭe rehai milae.
4Bolodor bole foshol beshi,
bolod bine ugar ḳali.
5Shoṭik shakkie misa mat na mate,
dome dome misa mate misa shakkie.
6Ṭaṭṭaḳarie tallash ḳori fae na gianre,
aḳoldaror gese ilim dora dey shohoze.
7Ammok taki duroi horo,
ilimor ṭuṭ nai ono.
8Afon fot sina-u aḳoldaror gian,
be-aḳolor ammoki dagabazir ḳam.
9Be-aḳole dush ḳoria tamsha ḳore,
hok manshor maze miṭ-maṭ ase.
10Ḳoto duk koto shuk ase mone,
buze na furafur oinno zone.
11Hok manshor tambur oibo unnoti,
nash oibo naformanor gor-baṛi.
12Ḳeu ḳeu mono ḳore nizor fot-u shoṭik,
shorbonash boail ase i fotor heshor dik.
13Ashir dino-o duḳ ase dilo,
furti fuṛaile zala taḳe mono.
14Be-fotie fol fae ku-ḳamor,
hok manshe fol fae nek kamor.
15Shorol-shidae ekin ḳore hoḳol mat,
aḳoldar hushiar taḳe sola-firat.
16Giani ḍoraia mondo taki duroi roy,
ammoke nizor bole bod shaoshi oy.
17Bod-mizazi zone ammoki kore,
hoḳole ginnae ku-motlobi zonre.
18Shorol-shidar faona ammoki,
aḳoldare furuskar fae buddi.
19Hok manshor gese mata nuae bojjate,
forezgaror duaro noto oy naformane.
20Goribre afon zone-o sine na,
doni manshor bondur obab oy na.
21Ari-forire ela ḳorle guna oy,
gorib-dukire doya ḳorle shuke roy.
22Ku-motlobi zone be-fote zaegi nae ni?
Nek-niotie fae doya-maya, hok-halali.
23Menote ane lab,
beḳama mate obab.
24Don-u to taz gianir lagi,
be-aḳolor ammoki-u be-aḳoli.
25Hok shakkie zane basae,
soturi kore misa matrae.
26Mabudor ḍor-ḳofe zarar asol borosha,
tain-u asroy tarar huruttar lagia.
27Mabudor ḍor-boy zindegir zorna,
moronor fand taki raḳe basaia.
28Bashshar gourob beshi prozae,
proza na taḳle foton oizae.
29Buddimane tar gusare domae,
beshi gusa to ammok deḳae.
30Ṭanḍa mone shorilor shanti,
ingshae fose ḳayar aḍḍi.
31Goribre zulum-u foydaḳarire beijjot ḳora,
ḳangalor ufor doya-u tanre ijjot deoa.
32Nizor naformanit naforman foton oy,
nizor hok-halalit forezgaror asroy.
33Buddimanor dilo gian taḳe,
ammokor mono ita ni mile?
34Forezgarie oy zatir unnoti,
gunae zatire ḳore ḳolonkini.
35Buddiman ḳamlae razar mon fae,
tanre shorom dile to gusa tulae.
Tans Gekies:
Asmani kitab: Sulaimani misal 14: sylL
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
© Ahle Kitab Society. All rights reserved.