دَرگوَز 12
12
سَرگوَزئے ائیید
1هُداوندا مِسرئے مُلکا گۆن موسّا و هارونا گوَشت: 2”اے ماه په شما بِنداتی ماهَ بیت، په شما سالئے ائولی ماهَ بیت. 3اِسراییلئے سجّهێن مهلوکا بگوَشێت که اے ماهئے دَهمی رۆچا هر لۆگ و هاندان په وت پَسے بزوریت، هر لۆگ یکّ پَسے. 4اگن لۆگێئے مردم اَنچۆ کمّ ببنت که پورهێن پَسے په آیان باز ببیت، گڑا آ و آیانی نزّیکترێن همساهگ هۆر ببنت و یکّ پَسے بزورنت. مردمان هساب کنێت و بچارێت که یکّ مردمے چینچُکَ وارت، و هما اَندازَهێن پَسے بزورێت. 5شمئے پَس الّما بےائیب ببیت، اُمرا یکّ سالیے ببیت و نرێنے ببیت. گوَرانڈے زورێت شَرّ و پاچِنے زورێت شَرّ. 6تان اے ماهئے چاردهمی رۆچا بِدارێتی. سجّهێن اِسراییلی مهلوک مگربتهارا وتی وتی پَسا هلار بکنت. 7مردم کمّے هۆن بزورنت و هما لۆگا که اے گۆشتا ورنت، آ لۆگئے دروازگئے چانٹا،#12:7 چانٹ، بزان دروازگ یا دریگئے چَپّ و چاگردئے دار. بزان دروازگئے سربُرا و کَشان اے هۆنا پِر بِمُشنت. 8آ باید اِنت هما شپا گۆشتا آسا بپَچنت و گۆن بێهُمیرێن نگن و تَهلێن کاهُکا بوَرنتی. 9اے گۆشتا هامَگا مئورێت و آپگْرادی هم مکنێت و مئوَرێتی. گۆن سَرَگ و پادَگ و دِلیگ و لاپیگان#12:9 دِلیگ و لاپیگ، بزان دل، جگر، گُٹّگ و لاپئے تۆکئے اے دگه چیزّ. آسا پَچێت و بوَرێتی. 10تان سُهبا چه آییا هچّ پَشت مکپیت. اگن تان سُهبا چیزّے سر آتک، آسا بسۆچێتی. 11چۆ بوَرێتی: وتا په سپرا تئیار بکنێت، سواسان پادا کنێت و اَسایا دستا کنێت و اِشتاپ اِشتاپا بوَرێت. اے هُداوندئے سَرگوَز#12:11 سَرگوَز، بزان یکّ چیزّێئے یله دئیگ و په دومیا رئوگ. اِدا اِشیئے مانا اِش اِنت که هُداوندا اِسراییلی لۆگ یله داتنت و مِسریانی سرا کَهر گوارێنت. په سَرگوَزا اَسلیگێن اِبرانی زُبانا لبز ”پِسَه“ اِنت و ”سَهئے ائییدئے“ نام چه همے گالا جۆڑ بوتگ. اِنت.
12من همے شپا مِسرا گَردانَ بان و مُلکئے سجّهێن ائولی مَردێنچُکّانَ جنان. اِنسانان بگر تانکه دَلوَتانی ائولی چُکّانَ جنان و مِسرئے سجّهێن هُدایان سِزا دئیان. من هُداوند آن. 13لۆگان پِر مُشتگێن اے هۆن شمئے نِشانیَ بیت که اِدا شما اێت. من اے هۆنان که گِندان، چه شما سرَ گوَزان و وهدے مِسرا تباهیئے کَهرے دئورَ دئیان، اے کَهر شمئے سرا نکپیت.
14اے په شما یاتگارێن رۆچے ببیت. شما باید اِنت اے رۆچا هُداوندئے ناما جَشنے بکنێت. اے جشنا نَسلانی نَسل اَبدی پرمانێئے هسابا برجاه بدارێت. 15هپت رۆچا بێهُمیرێن نگن بوَرێت. هرچے هُمیر که شمئے لۆگان هست، ائولی رۆچا دئورِش بدئیێت. چێا که هرکَسا که ائولی رۆچا بگر تان هپتمی رۆچا هُمیری چیزّے وارت، آ مردم چه اِسراییلئے کئوما سِندَگَ بیت.
16ائولی رۆچا پاکێن دیوانے بکنێت و هپتمی رۆچا هم. اے دوێن رۆچان هچّ کار مکنێت، بَسّ په ورگا وراک تئیار کنێت. همے یکّێن کارا کرتَ کنێت. 17بێهُمیرێن نگنئے ائییدا برجاه بدارێت، چێا که همے رۆچا من شمارا رُمب رُمبا چه مِسرا در کرت. نَسلانی نَسل اے رۆچا اَبدی پرمانێئے هسابا برجاه بدارێت.
18ائولی ماها، چاردهمی رۆچئے بێگاها بگر تان بیست و یکّمی رۆچئے بێگاها بێهُمیرێن نگن بوَرێت. 19تان هپت رۆچا شمئے لۆگان هُمیر مبیت. چێا که هرکَسا که هُمیری چیزّے وارت، آ مردم چه اِسراییلئے مهلوکا سِندَگَ بیت، هرکَس ببیت، دَرامَدے یا مُلکی مردمے. 20هچّ هُمیری چیزّ مئوَرێت. وتی سجّهێن مێتگان بێهُمیرێن نگن بوَرێت.“
21موسّایا اِسراییلئے سجّهێن کماش لۆٹاێنتنت و گۆن آیان گوَشتی: ”برئوێت و په وت، په وتی لۆگان پَس بزورێت. اے پَس سَرگوَزئے کُربانیگ اِنت، هلاری کنێت. 22بَندُکے زوپا#12:22 زوپا کاهُکے که ٹالی دْراج اِنت و تاکی پُژّ پُژّ اَنت. اِنگرێزیا ”hyssop“ و پارسیا ”زوفا“ گوَشنتی. بزورێت، تْرَشتئے#12:22 تْرَشت دَرپے. هِلار کرتگێن پَسئے هۆنِش همے تْرَشتا کرتگاَنت. تهئے هۆنانی بجنێت و وتی لۆگانی دروازگئے چانٹا، سَربُر و دوێن کَشانی داران پِری مُشێت، چه همے هۆنان که تْرَشتئے تها اَنت. تان سُهبا چه شما کَسّ چه لۆگئے دروازگا ڈَنّ در مئیئیت. 23هُداوند په مِسریانی جنَگا گَردانَ بیت، بله وهدے شمئے چانٹانی سرئے هۆنانَ گندیت، گڑا چه آ دروازگا سرَ گوَزیت و تباه کنۆکا شمئے لۆگان پُترَگ و شمئے جنَگا نئیلیت. 24اے رسما تان اَبد برجاه بدارێت، اے په شما و شمئے چُکّان ابَدی پرمانے. 25وهدے شما هما مُلکا سرَ بێت که هُداوند وتی وادَهئے هسابا شمارا دنتی، اۆدا اے رسما برجاه بدارێت. 26شمئے چُکّ که چه شما جُستَ کننت که اے چۆنێن رسمے، 27بگوَشێت که اے په هُداوندا سَرگوَزئے کُربانیگے، چێا که هُداوندا، مِسرا اِسراییلیانی لۆگ سَرگوَز کرتنت. وهدے هُداوندا مِسری جَتنت، مئے لۆگانی سرا هئیری کرت.“ گڑا مردمان سر جَهل کرت و پَرستِشا لگِّتنت. 28اِسراییلی شتنت و هما پئیما که هُداوندا موسّا و هارون هُکم داتگاَتنت، هما پئیما کرتِش.
29هما شپئے نێما هُداوندا، مِسرئے مُلکا سجّهێن ائولی مَردێنچُکّ جتنت. شاهی تَهتا نِشتگێن پِرئونئے ائولی چُکّا بگر تان زندانا نِشتگێن بندیگێئے ائولی چُکّ، و مال و دَلوَتانی سجّهێن ائولی نَرێن چُکّ، سجّهێن مُرتنت. 30شپا پِرئون و آییئے سجّهێن هِزمتکار و سجّهێن مِسری پاد آتکنت. مِسرا مزنێن گرێوَگ و زاریے چِست اَت. چشێن لۆگے نێستاَت که اۆدا یکّے نمُرتگاَت. 31شپئے شپ پِرئونا موسّا و هارون لۆٹاێنتنت و گوَشتی: ”چِست بێت و چه منی مُلک و مردمان دور بێت، شمئے جند و سجّهێن اِسراییلی. برئوێت و هُداوندا پرستش کنێت، هما پئیما که شما وت گوَشتگ. 32وتی رمگ و گۆرُمان هم برێت گۆن، هما پئیما که شما وت گوَشتگ. په من هم برکت بلۆٹێت.“
چه مِسرا در رئوَگ
33مِسریان اِسراییلی هُجّ کرت#12:33 هُجّ کنگ، بزان زۆر دئیَگ، مجبور کنگ. و گوَشتنت که شما چه مئے مُلکا زوتّ در آێت که ما سجّهێنَ مرێن. 34مردمان تَرّ کرتگێن بێهُمیرێن آرت، چه گوات گِرَگا پێسر گۆن دَرپان زرت و وتی چادِران کرت و بَڈّا جتنت.
35اِسراییلیان هما پئیما کرتگاَت که موسّایا گوَشتگاَتنت. آیان مِسریانی کِرّا گُد و چه نُگره و تِلاها اَڈّ بوتگێن سامان لۆٹتگاَت. 36هُداوندا هم مِسریانی نِزَر په اِسراییلیان نێک کرتگاَت. پمێشکا آیان هرچے لۆٹتگاَت، مِسریان داتگاَت. اے پئیما مِسریانی دئولَتِش برت.
37اِسراییلی چه رَمِسێسا دێم په سُکّوتا سَر گِپتنت. جنێن و چُکّان اَبێد، آ کِساس شَش سد هزار پئیادَگێن مردێن اَتنت. 38هۆر و هئوارێن مردمانی بَلاهێن رُمبے هم گۆن آیان شت گۆن. اِسراییلیان باز رَمگ و گۆرُم، سکّ باز مال و دَلوَت گۆن اَت. 39هما تَرّ کرتگێن آرت که چه مِسرا گۆن اَتنتِش، چه آیان بێهُمیرێن کۆلُکِش#12:39 کۆلُک، بزان گوَنڈُکێن نگن. پَتک. مردم چه مِسرا گلّێنَگ بوتگاَتنت، پمێشکا چانَگ بێهُمیر اَتنت. آیان نَتوانت مَهتل ببنت و په وتی تۆشگا وراک اَڈّ بکننت. 40اِسراییلیان چار سد و سی سال مِسرا گوازێنتگاَت. 41اے چار سد و سیێن سالانی گُڈسرا، گُڈّی#12:41 گُڈّی، بزان آهِری. رۆچئے جندا هُداوندئے سجّهێن مهلوک رُمب رُمبا چه مِسرا دَر آتک. 42اے سجّهێن شپا هُداوندا آیانی نگهپانی کرت که آیان چه مِسرا در بکنت، پمێشکا اے شپ په اِسراییلیان هُداوندئے ناما شَپپاسیے#12:42 شَپپاسی، بزان په کارێا سجّهێن شپا آگَه بئیگ. و باید اِنت سجّهێن اِسراییلی اے شَپپاسیا نَسلانی نَسل برجاه بدارنت.
سَرگوَزئے کانون
43هُداوندا گۆن موسّا و هارونا گوَشت: ”اِش اِنت سَرگوَزئے ورگئے پَرمان: هچّ ڈَنّی مردم اِشیا مئوارت، 44زَرهریدێن#12:44 زَرهریدێن، بزان بَها زرتگێن. گُلام وارتیَ کنت بله چه سُنّت بئیگا رند. 45هما مردم که په گوَنڈێن مُدّتێا آتکگ و نِشتگ، آ هم مئوارت و هما نئوکر هم مئوارت که په زَرّ شمئے کِرّا کارا اِنت. 46یکّێن لۆگئے تها ببێت و بوَرێتی. چه سَرگوَزئے گۆشتا تُشے ڈَنّا مبرێت و پَسئے یکّ هَڈّے هم مپرۆشێت. 47سَرگوَزئے رۆچا اِسراییلئے سجّهێن مهلوک ائیید بکنت. 48اگن شمئے نیاما ڈَنّی مردمے نِشتگ و سَرگوَزئے رۆچا هُداوندئے ناما ائیید کنگَ لۆٹیت، آییئے لۆگئے سجّهێن مردێن پێسرا سُنّت کنگ ببنت. گڑا آ مردم بَهر زرتَ کنت و مُلکی مردمانی پئیما بیت. بله هچّ سُنّت نکرتگێن مردێن اِشیا مئوارت. 49اِشیئے کانون یکّ اِنت، په مُلکی مردمان و په هما ڈَنّی مردمان که شمئے نیاما نِشتگاَنت.“
50هما پئیما که هُداوندا موسّا و هارون هُکم داتگاَتنت، سجّهێن اِسراییلیان هما پئیما کرت. 51هما رۆچئے جندا هُداوندا اِسراییلی، رُمب رُمبا چه مِسرا در کرتنت.
Tans Gekies:
دَرگوَز 12: HPKB
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
© 2016-22 Wycliffe Bible Translators, Inc.
