دَرگوَز 11

گُڈّی کَهر: ائوَلی چُکّانی مَرک

1هُداوندا گۆن موسّایا گوَشت: ”من پِرئون و مِسرئے سرا دگه یکّ کَهرے دئورَ دئیان. اِشیا رند آ شمارا چه اِدا رئوگا کِلّیت. رئوگئے هبرا بِلّ، شمارا سَرجمیا چه اِدا گَلّێنیت. 2مهلوکا بگوَش که هرکَس، هر مردێن و هر جنێن وتی همساهگئے کِرّا چه نُگره و تِلاها اَڈّ بوتگێن سامان بلۆٹیت.“ 3هُداوندا مِسریانی نِزَر په وتی مهلوکا نێک کرت. موسّائے جند هم مِسرئے مُلکا پِرئونئے هِزمتکار و مردمانی چمّان سکّێن مزنێن مردمے بوت.

4موسّایا گوَشت: ”هُداوندَ گوَشیت: ’من شپئے نێما درَ کایان و سجّهێن مِسرا گَردان. 5بادشاهی تَهتا نِشتگێن پِرئونئے ائولی چُکّا بگر تان جِنتِرئے#11‏:5 جِنتِر دو سِنگ اَنت که گۆن آیان دانَ درُشنت و آرتَ کننت. سرا نِشتگێن مۆلدێئے ائولی چُکّا، مِسرا سجّهێن ائولی مَردێن‌چُکَّ مِرنت. سجّهێن مال و دَلوَتانی ائولی نَرێن چُکّ هم مِرنت. 6سَرجمێن مِسرا اَنچێن مزنێن گرێوگ و زاریے چِستَ بیت که نه پێسرا بوتگ و نه دێمترا بیت، 7بله بنی اِسراییلئے سرا کُچِکّے هم نئوَکّیت،#11‏:7 وَکّگ، بزان کُچِکّئے چانگَگ، کُچِکّئے راشَگ. نه مردمێئے سرا و نه دَلوَتێئے سَرا.‘ گڑا شما زانێت که هُداوند اِسراییل و مِسرئے نیاما پرک و پێرَ#11‏:7 پرک و پێر، بزان رو و ریا، یکّێا شَرتِر و یکّێا هَرابتِر زانگ. کنت. 8تئیی اے سجّهێن هِزمتکار منِ موسّائے کرّا کاینت و کۆنڈانَ کپنت و گوَشنت: ’در آ، تئیی جند گۆن هما سجّهێن مردمان که تئیی رَندگیر اَنت.‘ گڑا من چه اے مُلکا درَ کایان و رئوان.“ نون موسّا زهرا زهر چه پِرئونئے کرّا در آتک و شت.

9هُداوندا گۆن موسّایا گوَشت: ”پِرئون شمئے هبران گۆشَ نداریت. پمێشکا مِسرا منِ هُداوندئے مۆجزه گێشترَ بنت.“ 10موسّا و هارونا پِرئونئے دێما اے سجّهێن مۆجزه پێش داشتنت، بله هُداوندا پِرئونئے دل سِنگ کرت و پِرئونا اِسراییلی چه وتی مُلکا رئوگا نه‌اِشتنت.

Tans Gekies:

دَرگوَز 11: HPKB

Kleurmerk

Kopieer

Vergelyk

Deel