Gewilde Bybelverse vanaf Maku 2

Deel

Miꞌi e hap Iesui tikuap hawyi toiꞌatuwesat -Uhytꞌiꞌin yt ariot i ihãite rakaria kape e -Uruto yt uruꞌahuu i e haria kape. Maꞌato Uito ariot iꞌahuu rakaria kape iꞌatumoehãite hamuat e. Yt ariot i wakuaria kape maꞌato yt naku i nug haria iꞌahuu rakaria ewy kape ariot e.

Miꞌi hawyi taꞌakasa yne hawyi Iesui tikuap taꞌyn tomohey iꞌatuepiat hap koꞌi. Miꞌi hawyi toꞌe iꞌahuu rakat pe -Uiwy e koitywy ti yt naku i eminug saꞌag epyꞌa piat atimoweityk raꞌyn e.

-Uhytꞌiꞌin saꞌawyꞌi Tupana tunug tomotypot hap eꞌat hawyi tutum miitꞌin me iꞌatumowepiit hamo tomohey hamuat e. Miꞌi pote mio heꞌat toineꞌen miitꞌin po pe aimowepiit hamo e. Maꞌato yt naku i Tupana motypot eꞌat neꞌi topyhuꞌat aiꞌakag wo waĩꞌe hatno e. Kat pote Tupana tum ahepe teꞌat aimowepiit hamo e.

Maꞌato yt aikopuo kuap i taꞌatuerekosap Iesui kape katupono typyꞌi kahato miitꞌin netap wiat pote hawyi taꞌatuꞌok hot netap Iesui apy tote. Miꞌi hawyi iꞌokhotꞌe hawuo taꞌatumoꞌapyk yt hewyry kuap i rakat yni pe.

Miꞌi hawyi toꞌe i -Taꞌi Miitꞌin Ykeꞌet ti yt nakuap i moweityk kuap hat wuatꞌi yt naku i hep kuap hat wyti Uito e. Miꞌi tupono atimoherep mesup ehepe uhesaika hap yt nakuap i moweityk hamuat e. Miꞌi hawyi Iesui toꞌe i yt hewyry kuap i rakat pe -Epoĩꞌam no hawyi etiꞌokpoꞌi ro eꞌyni hawyi ereto ro eꞌyat kape e.

Kat areꞌe som pyno poꞌog yt niatpo i yt hewyry kuap i rakat pe sio apo koitywy ti yt nakuap i eminug atimoweityk taꞌyn areꞌe sio erepoĩꞌam no hawyi etiꞌokpoꞌi ro eꞌyni hawyi ereto ro eꞌyat kape areꞌe.

Miꞌi hawyi meremo raꞌyn iꞌahuu rakat ipoĩꞌam hawyi toiꞌokpoꞌi teꞌyni hawyi toto raꞌyn wuatꞌi ehamo. Miꞌi hawyi teꞌerahaꞌat kahato hawyi teꞌeruwehum kahato Tupana ete. Miꞌi hawyi teꞌeroꞌe toꞌope -Aito yt karãpe i wataꞌakasa meikotã hap ewy iꞌatuꞌe raꞌyn.