Gewilde Bybelverse vanaf Матвей 6

Deel

Медводз корсьӧй Енлысь Юралӧмсӧ да Сылысь веськыдлунсӧ, сэки тіян ставыс тайӧ лоӧ.

Энӧ майшасьӧй аскиа луныс вӧсна, аскиыс ас вӧснаыс тӧждысяс. Быд лунлы тырмӧ аслас тӧждыс».

«Та вӧсна шуа тіянлы: энӧ майшасьӧй сёян-юан да паськӧм вӧсна. Олӧмныд абу ӧмӧй донаджык сёян-юанысь, а вир-яйныд – паськӧмысь?

Но тэ пыр аслад вежӧсӧ, ӧдзӧстӧ пӧдлав да кевмысь тыдавтӧм Батьыдлы. Гусясӧ аддзысь Батьыд сетас тэныд аддзымӧнъя.

Кевмысьӧй тадзи: – Енэжвывса миян Бать, мед лоӧ вежаӧн Тэнад нимыд. Мед воас Тэнад Юралӧмыд. Мед инас Тэнад кӧсйӧмыд му вылын енэжын моз.

Сет миянлы талун кежлӧ няньнымӧс.

И прӧстит миянлысь мыжъяснымӧс, кыдзи ми прӧститам миян водзын мыжаясӧс.

Эн сет миянлы ылавны, но видз миянӧс омӧльысь. Ӧд Тэнад Юралӧмыд, выныд да дзирдлуныд помасьлытӧм. Аминь.

Прӧститанныд кӧ мӧдлысь мыжъяссӧ, сэки енэжвыв Батьныд прӧститас тіянӧс.

Видзӧдлӧй енэжвыв лэбачьяс вылӧ: найӧ оз кӧдзны, оз вундыны, оз чукӧртны йӧртӧдъясӧ, но енэжвыв Батьныд вердӧ найӧс. Ті ӧмӧй наысь абу донаджыкӧсь?

«Энӧ чӧжӧй аслыныд озырлун му вылын. Тані сійӧс воз да сім сёйӧ, гусясьысь пырӧ да нуӧ сійӧс. Мӧдарӧ, чӧжӧй озырлунтӧ енэжас. Сэні сійӧс воз да сім оз сёй, гусясьысь оз пыр да оз ну сійӧс. Кӧні ӧд озырлунныд, сэні лоӧ и сьӧлӧмныд.

Морт оз вермы кесъявны кык ыджыдлы. Ӧтисӧ кӧ радейтӧ, мӧдсӧ мустӧмтӧ. Ӧтисӧ кӧ пыдди пуктӧ, мӧдсӧ увтыртӧ. Ті онӧ вермӧй кесъявны Енлы, кесъяланныд кӧ озырлунлы».

Енмыс кӧ тадзи пасьтӧдӧ видзвыв турунӧс, коді талун быдмӧ, а аски веськалӧ пачӧ, оз ӧмӧй Сійӧ пасьтӧд тіянӧс, этша эскысьяс!

Корысьлы сетігад шуйга киыд мед оз тӧд веськыд киыдлысь вӧчӧмсӧ. Тэнад бур вӧчӧм йылысь мукӧдлы тӧднысӧ оз ков. Гусясӧ аддзысь Батьыд сетас тэныд аддзымӧнъя».

«Видзчысьӧй, тіян бур вӧчӧмныд мед оз ло йӧз водзын петкӧдлӧм могысь. Тадзи кӧ вӧчанныд, оз ло тіянлы енэжвыв Батьныдсянь удждоныс.

«Видзаліганыд энӧ лоӧй жугыльӧсь кык бана шаньгаяс моз. Найӧ ветлӧны шог чужӧмӧн видзалӧмсӧ петкӧдлӧм могысь. Веськыда висьтала тіянлы: найӧ босьтӧны нин ассьыныс удждонсӧ. Мӧдарӧ, видзалігад юрситӧ шыльӧд, чужӧмтӧ мыськы, йӧзыс мед оз тӧдлыны тэнсьыд видзалӧмтӧ. Видзав аслад тыдавтӧм Батьыд водзын. Гусясӧ аддзысь Батьыд сетас тэныд аддзымӧнъя».