Gewilde Bybelverse vanaf Galasiya 5

Deel

Manang maynini ya bunga na Ispiritu Santo na kita-en dun ni pagka-utawun tadun: Awun pagginawa tadun sa Tyumanem aw sa eped na utaw. Magleya kitadun pangkay unu ya dumateng. Awun kalinaw na kanaten anenganeng. Matas ya pasinsiya tadun sa kanaten eped aw pagkallatan tadun silan. Madyaw ya bet tadun adti eped aw magtabang kitadun kanilan. Aw kasaligan kitadun. Pagpakadyawun tadun ya kadég na utaw. Aw magpakatagen kitadun sa pagkaliman na kanaten pagka-utawun. Kun imo-un tadun ya kadég yeiy, walaꞌ ya manga suguꞌ dun ni Uldin na kalakadan tadun.

Manang ini ya paglongun ku kamayu: Dun ni kadég na imo-un mayu, pagpagagad kamu sa Ispiritu Santo pada diliꞌ mayu ma-imoꞌ ya malatay na pagkaliman na pagka-utawun mayu.

Asuntu na pigbagu la kitadun na Ispiritu Santo, yanagaw dalugun tadun ya kanan pagkaliman.

Aw ya manga utaw na nyakasambuk da kan Kristu Jisus, nyaka-agad da pigkalabuwan adti krus ya pagkaliman na pagka-utawun nilan.

Na, kun dalugun na manga utaw ya pagkaliman na kanilan pagka-utawun, maynini ya imo-unun nilan: Magkasala-enen silan aw gayed malatay ya nyakabetang adti anenganeng nilan. Aw pigpan-imoꞌ nilan ya manga imo-unun na makamulamula͡ay. Magsimba silan sa manga tyumanem na galuꞌ. Mag-imoꞌ silan sa malatay adti eped na utaw magi sa katulus na busaw. Gayed nilan pagdumutan ya eped na utaw, mati-ayil silan, aw matikadaway silan. Maksay silan magkadaman, aw pag-olo-un nilan ya kanilan pagka-utawun, aw gayed mag-atu sa eped na utaw, aw yan oloꞌ ya ubaybayen nilan ya utaw na magka͡agad kanilan. Aw mati-inga-ay silan. Pala-inem silan sa magpakalangulangu, aw magpa-iyeped silan sa manga utaw na mig-imoꞌ sa malatay. Aw madég pa ya kanilan pag-imo-un na diliꞌ madyaw. Salutun ku ya piglong ku kamayu idtu muna: Ya manga utaw na mig-imoꞌ sa maynan, diliꞌ saba maka-akup adti Kasakupan na Pighari-an na Tyumanem.

Na, kay manga inulug ku, pigtawag da kamu na Tyumanem aw nyakaluwaꞌ da lekat adti pagdumala na Uldin. Manang diliꞌ kamu mag-anenganeng na pigtumbay pa nan kamayu ya pagdalug sa pagkaliman na pagka-utawun mayu adti pag-imoꞌ sa malatay. Madyaw pa baling na gayed kamu maggaginawa͡ay aw magtatabangay.

Kay gayed nyatu ya pagkaliman na pagka-utawun tadun adti pagkaliman na Ispiritu Santo. Aw ya Ispiritu nyatu uman sa pagkaliman na kanaten pagka-utawun. Aw ya duwa yeiy gayed silan migtanam adti anenganeng tadun. Yanagaw malug kanaten ya pag-imoꞌ sa madyaw.

Kay ya kadég na suguꞌ na Tyumanem dun ni Uldin, alag da nyaluduk dun ni sambuk na suguꞌ: “Ginawayi ya eped mu na utaw kasiling na pagginawa mu sa kanmu pagka-utawun.”

Diliꞌ kitadun magpatastas, aw diliꞌ gayed magkadaman sa eped tadun, aw diliꞌ kitadun mag-inga-inga-ay.

Asuntu na pigpaluwaꞌ da kitadun ni Kristu lekat adti pag-allang na Uldin, yanagaw pakasaligen tadun ya kanaten pagpangintu-u kanan, aw diliꞌ da kitadun magpa-allang salut sa Uldin.