Gewilde Bybelverse vanaf 2 Corinto 5

Deel

Yanagaw pangkay singalan ya nyakasambuk da dun ni kan Kristu, nyabagu la sakanan. Kay lyumabay da ya dadan aw ya bagu migpalekat da.

Si Kristu, walaꞌ ya salaꞌ dun ni kanan. Manang asuntu sa pagbayaꞌ na Tyumanem, nyakapisan baling adti kan Kristu ya kadég na salaꞌ na manga utaw pada dawaten kitadun na Tyumanem kasiling na walaꞌ da ya salaꞌ.

Kay pangkay walaꞌ pa tadun kita-a ya manga pigpakang kanaten na Tyumanem, manang gayed kitadun migpadeleg nyangintu-u kanan na atag nan ya kadég yeiy.

Aw ya kadég yeiy, Tyumanem oloꞌ ya nyaka-imoꞌ. Kay pigpalikuꞌ kitadun nan magi kan Kristu. Aw pig-atag kanami uman na Tyumanem ya pagpalikuꞌ sa manga utaw adti kanan. Ini ya kanami pig-ubat-ubat: Magi sa pig-imoꞌ ni Kristu adti krus, mabatug da nan paliku-un ya manga utaw na mangintu-u kanan, aw adti anenganeng na Tyumanem walaꞌ da ya kanilan salaꞌ. Aw pig-atag nan kanami ya pag-ubat-ubat pada makalikuꞌ ya manga utaw adti kanan.

Aw pigpadala kami ni Kristu na un maggagad sa manga utaw adti Tyumanem. Yanagaw magi sa katundanan na pig-atag kanami ni Kristu, kasiling na Tyumanem ya nyanginayuꞌ na lumikuꞌ kamu adti kanan.

Aw yan ya du-an na nyatay sakanan asuntu sa kadég na utaw, pada sa pag-eyaꞌ pa tadun asini tas na lupaꞌ diliꞌ da tadun dalugun ya pagkaliman na kanaten pagka-utawun. Manang yan baling ya dalugun tadun ya pagkaliman ni Kristu kay yan ya nyatay pada kanaten aw nyataw uman. Idtu na muna, ya pag-anenganeng nami sa eped na manga utaw taman oloꞌ dun ni pigkitaꞌ nami adti kanilan. Pangkay si Kristu maynan uman ya pag-anenganeng nami kanan. Manang adun, walaꞌ da nami anenganenga ya pigkitaꞌ nami oloꞌ.

Ya kadég na pig-imoꞌ tadun lekat saba adti kadakulaꞌ na pagginawa ni Kristu kanaten. Kay kya-ede-an nami na nyatay si Kristu pada sa kadég na utaw. Aw ya kadég tadun na nyangintu-u kanan, kasiling na nyaka-agad da kitadun dun ni pagkamatay nan.