Gewilde Bybelverse vanaf Galatarya 5

Deel

Kones hi o Debleskro Dourho an peskro dji, dran koleste vella lačepen: Les vell o Debleskro kamlepen oun barht an o dji. Yob kamell kek čingepen. Yob rikrell lauter vin. Yob hi lačes ap i vavarende. Les hi i baro dji i vavarenge. Kova, hoy yob penell, ap kova rikrell pes yob. Yob krell pes gar bares oun lell pes khetne. O Moseskre laba, kolen hi kek zoor pral koleste, koon yaake djivella.

Me penau t'menge: Djivenn yaake, har o Debleskro Dourho t'menge penella! Yob te hi t'mentsa, palle krenn gar o čilačepen, hoy an t'mende hi.

O Debleskro Dourho das men o nevo djipen. Doleske djivas yaake, har yob kamella.

Kolla, kay djivenn o Yezous Kristeha, kolla anan ko tsele čilačo koova, hoy yon kran, pash o Yezouseste. Oun kanna penenn le na-a ap o djoungelo koova, hoy kamell an lengro dji te vell.

T'mer lauter djinenna, har kol menshe djivenna, kay krenn ko čilačepen, hoy an lende hi: I morsha sovenn vavar djouvyentsa. Oun i djouvya sovenn vavar morshentsa. I menshe krenn djoungelo koova oun vi-ladjedo koova. Yon mangenn vavar koova an har o Debles. Yon dourkrenna. Yon kourenn pen oun čingrenn pen. Yon zilverenna, oun len hi rholi ap i vavarende. Yon dikenn ap pende kokres, te djal lenge mishto, oun dikenn gar ap i vavarende, te djal lenge ninna mishto. Yon moukenn pengre phralen oun djan vavarentsa khetne. Yon kamenn kova, hoy o vavares hi. Yon hi pipangre oun rhapangre. Oun boud vavar čilačo koova krenn yon. Me penom t'menge oun penau pale: Koon yaake djivella, vell gar pash o Debleste an o bolepen oun lell gar ko lačo koova, hoy o Debles peskre čavenge hi.

Mire phrala, o Devel das t'men gole, te djivenn i djipen, kay han bouder gar pandlo ap čomone. Kal labentsa penau gar, te krenn t'mer nay, hoy kamenna, oun djivenn nay t'maro phouro djipen. Na-a, avenn yek o vavareske koy! Krenn kova dran o kamlepen!

Kova, hoy an mende hi, kamell gar kova, hoy o Debleskro Dourho kamella. Oun kova, hoy o Debleskro Dourho kamella, hi gar kova, hoy an mende hi. Kol douy zorya čingrenn pen yaake, kay nay krenn t'mer gar ko lačepen, hoy kamenn t'mer te krell.

Te vell yek yaake lačo ap o vavareste har yob lačo ap peste hi, palle krell lo lauter, hoy o Devel lestar kamella.

Mer rodas gar pal kova, te vas bareder oun feteder har kol vavar. Mer čingras gar oun dikas gar čilače yakentsa ap kova, hoy ko vavares hi!

O Yezous Kristo las men vin dran hako koova, ap kova pandlo hams. Ačenn zoreles oun moukenn t'men bouder gar te pandell!