Gewilde Bybelverse vanaf 1. Korintarya 14

Deel

O Devel kamell kek čingepen. Yob kamell, te djal lauter mishto. Kova hi yaake an hake forya, kay i patsle khetne venna.

Krenn lauter, te lenn o Debleskro kamlepen an t'maro dji! Oun rodenn i tselo djiyestar kol zorya, hoy o Debleskro Dourho an t'mende čivella, te nay boudrenna o Debleske! Boudeder har hako vavar koova rodenn koy pal, te penenn nay i menshenge i lab, hoy vella o Deblestar.

Kova, kay penell i menshenge i lab, hoy vella o Deblestar, kova rakrell yaake ap i menshende, te vell lengro patsepen zoreles, oun te venn lengre djia barhteles oun zoreles.

Kova, kay rakrella peske an i rakepen, hoy o Debleskro Dourho les das oun hoy kek hayvella, koleske djal feteder an peskro dji. Kova, kay penell i patslenge i lab, hoy o Deblestar vella, krell kova, te vell kolengro patsepen zoreles.

Yaake hi kova ninna t'mentsa. T'mer kamenn o tselo djiyestar kol zorya te lell, hoy o Debleskro Dourho della. Krenn lauter, te lenn boud kolestar, hoy krell i patslen zoreles an o patsepen!