Gewilde Bybelverse vanaf Filipai 2

Deel

Kevu yovo aguto mallo'mo'mdeyo oo ilomoropunyo'mo'mdeyo tovino womdo puru'monodo kuruv nyumwalpiyo. Toro kuvi kuruv kevu kwako tomuu'aro bwolomoropinapi a'mwo abolo pubuuraino aro kuudo neya jaurogaulo. Oo a'mwo abolo su tobuuro nemi nekuuwolo'mdupudogano. Aki kevu pwolno puru'monodo togaikul kevnokweyogaikulluro noonyumwonyu tonyuno to'no nomollomwalmwalpiyo. Toro kuvi kuruv a'mwo abolo pubuuravuro noonyumwonyu togai'aro kuruv neya domollomwalogaulo.

Kevu kevnokweyogaikulluro akuuto toru Krais Jisasolluro kuudo saullajuko to'busuko kubalno aval'no jou'movlavogaulo.

Krais Jisasol Gooti kuunodo imo'nodowodo kwol kuruv kuudo aro tovi guureji magudupolallajukekono. Oo nuu Gooti kuunodo imo'nodumdo toonyuno tov aval'no neya amwalmo. Toro kuudo tovi guureji magudupolallajukekono. Toro kwol kuruv gavnokweyolluno kuudo su tovi modukwopino sumaiyokwe a'mwo ki'nato womdokwe pwekwobusuko imo'no'no kwako akavida'ai a'mwo kula'nokakwe pwollubusuko sumo'nokaikono. Aki Jisasol kwako akavida'ai a'mwo pwolbusuko kula'noka imo'nyuno sumaiyokwe gavnokweyol abwolomoropinyajukekono. Toro tool Gooti toollu uumjunyuno uumjunyuno sumaiyokwe noromiyoso'mo yodopure kuga kuruv kuuno kuumjunokaikono. Toro uumjunyuno sumaiyokwe i'noguropte tovi yiuno'no sulabolokaikono.

Kuudo neya jaullulo. Gooti tool kemi poowokalago tonyu womdo kuulaikullodowodekono. Womdo kuulaikullodowodo su tovi'aro gamoro ilaiyo winodowo'jure tovi kevu nokwo uumjunmwalpinogaikikono. Aki kevu kuvinono uumjunpino'moneyokwe kuudo tokwe'aro jurogudo tokwe'aro yiuwi'nokai su toval ikubwemwalonekono.

Jisasol su toro me'no somjumovlavoka tovino tov Gooti tool Jisasollu muunyu kai'muu kuunodo toru'no sulomorumwallokaikono. Aki toro toollu Gooti tool yovo aguto tov kuubweyokaikono. Gamoro yovo su tov yiuwi'nokai yovo gabovo tonyu uuwolo'mdowodokwono. Aki Gooti tool Jisasolluno yovo tovi muunyu toru'aro sulomoropiyoka su tov aro tovinokwono. Yiuwi'nokai sulugumdo muunyu akai'muuda'ai mwalodupudo togai'aro aki kwako akavi mwalodupudo togai'aro aki kwako akavi dolago tomuu mwalodupudo togai'aro yiuwi'nokai ton Jisasolluno yovo su tovi kwako tomuu'aro wipureyokwe suduko neya winuguto'numwalpino tovinokwono. Aki yiuwi'nokai su ton kuu'maiyo toru'no aro neya dodowiyoku'bworosunpinogano. “Oo Jisas Kraisol Agutekono.” Toro dodowiyoku'bworosunodopure tovida'ai gami Ganumiyago Gooti tool yovo aguto ma'mwalonekono.

Kevu yiuwi'nokai womdo tonyu mujumovlavopi toga burol yogalo maullajunpinono. Aki womdo su tonyuno yogalo nyoullajunmwalpiyo. Su tov aro tovinokwono. Kevu Gooti toolluro kwoloraiyo togaikul pasudo pworogai kaiyako nomollugolamo'numwalpiyo. Toro kugaikul kuruv kaiya'no nonagutokwe to'no neya jumo'nogaulo. Toro togaikul kwako akavida'ai a'mwo abolo kaiya'nodokwe togai'aro kirovanyuvanyokwe togai'aro tonyu akuuto toru bako pwopiyodowodo to'busuko nokwo wimo'numwalpinogaikikono.

Toro tovino tov miyobuuravoo, kevu Gooti toolluro yogalo tovi yiuwi'nokai toga uumjunodupudogaikikono. Nuu kevuge mwalodore toga kevu pi'mwono kuumjunyajupo to'busuko kubalno aga nuu kevuge mamwalodo'mure kuruv pi'mwono neya duumjunogaulo. Aki kevu kaveno to'no nuumjunpiyo. Toro kugaikul kuruv muunyu toru'aro guureji neya duumjunogaulo. Gooti tool kemi ma'no ma'nodo tovuro kirumwallo tovida'ai me'no abomollurolovekumokalokwokaikono. Su toro tovino kevu a'mwo abolo tonyu kuu'maiyo toru wuuduuwallo'moneyokwe womdo guureji neya jogaulo. Womdo guureji supi toga kevu Gooti toollu kwako tomuu'aro kuunodo wiyo'moneyokwe luko yo'mo togai'aro bu'buto togai'aro to'no womdo neya jogaulo.